ފޭސްބުކް އަދި އިންސްޓަގްރާމްގައި ލައިކް ޖަހާ މީހުންގެ އަދަދު ނުފެންނަ ގޮތަށް ހަދަނީ
ފޭސްބުކް، އަދި ފޭސްބުކްގެ ދަށުން ހިންގަމުން އަންނަ އިންސްޓަގްރާމްއިން އެ ޕްލެޓްފޯމްތަކުގައި ކުރާ ޕޯސްޓްތަކަށް ލިބޭ ލައިކް ނުފެންނަ ގޮތަށް ހެނދުމުގެ އިޚްތިޔާރު ޕޯސްޓް ކުރާ ފަރާތްތައް ދޭން ނިންމައިފިއެވެ.
ފޭސްބުކްއިން ބުނެފައި ވަނީ މިގޮތަށް "ލައިކް ހައިޑް" ކުރެވޭ ފީޗަރ ފުރަތަމަ ތަޢާރަފް ކުރެވިގެންދާނީ އިންސްޓަގްރާމަށް ކަމަށެވެ. އަދި މިބަދަލު ގެނައުމަށް ނިންމާފައި ވަނީ ވަރަށް ގިނަ ދުވަހުގެ ތަހްލީލްތަކަށް ފަހުގައި ކަމަށް ފޭސްބުކްއިން ބުނެއެވެ. މިގޮތަށް ހެދުމަށް ފޭސްބުކްއިން ނިންމާފައި ވަނީ ފޭސްބުކް އަދި އިންސްޓަގްރާމް ބޭނުން ކުރާ ފަރާތްތައް ލައިކް ނުލިބޭތީ ނަފްސާނީ ގޮތުން މައްސަލަ ޖެހޭތީ ކަމަށް ބޭރުގެ މީޑިއާތަކުން ބުނެއެވެ.
މި ފީޗަރ މީގެ ކުރިން ވެސް ބައެއް ފަރާތްތަކަށް ޓެސްޓް ކުރުމުގެ ގޮތުން ވަނީ ދޫކޮށްފައެވެ. ފޭސްބުކްއިން ބުނެފައި ވަނީ ކުރިޔަށް އޮތް ހަފްތާގެ ތެރޭގައި އާއްމުކޮށް ގިނަ ބަޔަކަށް މި ފީޗަރ ހުޅުވާލެވިގެން ދާނެ ކަމަށެވެ.
މިކަމާ ގުޅިގެން އިންސްޓަގްރާމްގެ ޗީފް އާދަމް މޮސްރީ ވިދާޅުވީ، މިގޮތަށް ހެދުމަށް ނިންމާފައި ވަނީ އެފަރާތުގެ އެޕް ބޭނުން ކުރާ މީހުންނަށް ފުރިހަމަ ބާރުވެރިކަން ދިނުމުގެ މަގްސަދުގައި ކަމަށެވެ.
"ޔޫޒަރއަށް އިންނާނެ ދެ އޮޕްޝަން. ލައިކް ފެންނަ ގޮތަށް ވެސް ނުފެންނަ ގޮތަށް ވެސް ހެދުމުގެ. ބޭނުން ވަނީ ޔޫޒަރުން ބާރުވެރިކޮށް، އެމީހުން ބޭނުންވާ ގޮތަށް އެޕްލިކޭޝަންތައް ބޭނުން ކުރުމުގެ ފުރުސަތުދޭން" މޮސްރީ ވިދާޅުވިއެވެ.
އިންސްޓަގްރާމްގައި ލައިކްގެ ގޮތުގައި ބޭނުން ކުރެވެނީ ހިތެކެވެ. ފޭސްބުކްގައި ލައިކްގެ ގޮތުގައި އެކި ކަހަލަ ރިއެކްޝަން ހުރެއެވެ. ޕޭޖެއްގެ ނުވަތަ މީހެއްގެ މަޤްބޫލުކަން ދެނެގަތުމަށް އާއްމުކޮށް ބޭނުން ކުރާ އެއް އުކުޅަކީ ޕޯސްޓަކަށް ލިބިފައިވާ ލައިކް ބެލުމެވެ.
