އަޅުގަނޑުގެ މިނިސްޓަރ ކަމުގައި ގޭންގުތައް މައިތިރި ކުރިން: އުމަރު
ހޯމް މިނިސްޓަރކަން ކުރި އިރު ގޭންގުތައް މައިތިރި ކުރަން ބޭނުން ކުރި ޓޫލަކީ ގާނޫނު ކަމަށާއި އެ ބޭނުން ކޮށް ގޭންގްތައް މައިތިރި ކޮށްފައިވާނެކަމަށް ކުރީގެ ރައީސް އަބްދުﷲ ޔާމީންގެ ވެރިކަމުގެ ފުރަތަމަ ހޯމް މިނިސްޓަރ ކުރެއްވި އުމަރު ނަސީރު ވިދާޅުވެއްޖެއެވެ.
ސަންގުޓީވީގެ ހަބަރަށް ފަހު ޕްރޮގްރާމްގައި ވާހަކަދައްކަވަމުން އުމަރު ވިދާޅުވީ ރާއްޖޭގައި ގާނޫނުތައް އެބަހުރި ކަމަށާއި މައްސަލައަކީ އެއްވެސް ވެރިއަކަށް ގާނޫނު ތަންފީޒުކުރަން ނުކެރުން ކަމަށެވެ. އުމަރު ވިދާޅުވީ ގޭންގުތައް ރޫޅައިލުމުގައި މޮނިކޮން ގާނޫނަކީ ވަރަށް މުހިންމު ގާނޫނެއް ކަމަށެވެ.
"ގޭންގުތައް ރޫޅައިލުމަށް ޓަކައި މޮނިކޮން ގާނޫނަކީ ވަރަށް މުހިންމު ގާނޫނެއް. ރާއްޖޭގައި މިހާތަނަށް ގޭންގުތަކާ ދެކޮޅަށް ތެދުވި ހަމައެކަނި މީހަކީ އަޅުގަނޑޭ ވެސް ބުނެވިދާނެ ކަންނޭނގެ ފަހަރެއްގައި. އެކަމު އަޅުގަނޑު ބޭނުންކުރި ޓޫލްއަކީ ގާނޫނު. މޮނިކޮން ގާނޫނޫގެ ސަބަބުން ވަރަށް ބޮޑަށް އެކަންތައް މައިތިރިވި." އުމަރު ވިދާޅުވިއެވެ.
އުމަރު ވިދާޅުވީ މޮނިކޮން ގާނޫނު ރާއްޖޭގައި ހިންގާތާ 5 ވަރަކަށް އަހަރުވާ އިރު ގޭންގްގެ މައްސަލަތައް އޮންނާނީ ގާތްގަނޑަކަށް ހަމަޖެހިފައި ކަމަށާއި ގޭންގުތައް މައިތިރިކުރުމުގައި ރާއްޖޭގައި ޓޫލްސް އެބަހުރި ކަމަށެވެ. އެހެން ނަމަވެސް ރާއްޖޭގައި ނެތީ އެ ގާނޫނުތައް ތަންފީޒު ކުރާނެ ވެރިކަން ކަމަށާއި ވެރިން ގައިގައި ހުންނަން ޖެހޭ ހިތްވަރާއި ގަޓު ނެތީކަމަށް އުމަރު ވިދާޅުވިއެވެ.
އިތުރަށް ވާހަކަ ދައްކަވަމުން އުމަރު ވިދާޅުވީ ގާނޫނުތައް ތަންފީޒު ނުކުރެވުމުގެ ނަތީޖާ ފެންނަމުންދާ ކަމަށާއި ގިނަ ގޭންގްތައް އުފެދިގެން އެގޭންގްތައް ބޮޑެތިވެ އެ ގޭންގުތަކަކީ މަސްތުވާތަކެތި ރާއްޖެއަށް އެތެރެކޮށް ވިއްކާ ބަޔަކަށް ބަދަލުވެފައިވާ ކަމަށެވެ. އަދި އެމީހުންނަކީ ވަރަށް މުއްސަނދި ބަޔަކަށްވެ އެމީހުންގެ އިންފުލުއެންސް ސަރުކާރު ތެރެއަށާއި މަޖިލިސް ތެރެއަށް އަދި ޖުޑީޝަރީ ތެރެއަށް ފޯރައިގެން ގޮސްފައިވާ ކަމަށް ވެސް އުމަރު ވިދާޅުވިއެވެ.
"އޭގެ ނަތީޖާއަކަށްވީ ވަރަށް ގިނަ ގޭންގްތައް އުފެދިގެން އެގޭންގްތައް ބޮޑެތިވެ އެގޭންގްތަކަކީ މަސްތުވާތަކެތި ރާއްޖެއަށް އެތެރެކޮށް ވިއްކާ ބަޔަކަށް ބަދަލުވީ. އެމީހުންނަކީ ވަރަށް މުއްސަނދި ބަޔަކަށް ވެސް އެމީހުންގެ އިންފުލުއެންސް ސަރުކާރުތެރެއަށާއި މަޖިލިސްތެރެއަށާއި ޖުޑީޝަރީތެރެއަށް ފޯރައިގެން. މުޅި ނިޒާމު އެއްކޮށް މިހާރު މިވަނީ ހައިޖެކްވެފަ، މުޅި ނިޒާމު މިވަނީ ޕެރެލައިޒްވެފަ ، ވާވެފަ މިއޮތީ ގާނޫނުތަކާ އެއްޗެހި. އެހެންވީމަ ގޭންގުތައް ރޫޅައިލުން މީކޮންމެހެން ކުރަން ޖެހޭކަމެއް." އުމަރު ވިދާޅުވިއެވެ.
މީގެ އިތުރުން ވެސް އުމަރު ވިދާޅުވީ، އޭނާގެ ރައީސް ކަމުގެ ދައުރެއްގައި ދިވެހި ރާއްޖޭގައި ގާނޫނުގެ ދިގު އަތް ނުފޯރާނެ ހަމަ އެކަކު ވެސް ނުހުންނާނެ ކަމަށެވެ.
ކަލޭގެ ދިގު 12 ފޫޓުގެ 50 ހަރުގަނޑު ނުފޯރި ހިސާބަކަށް ކަލެއަށް އާދެވޭނީ ކިހިނެތްތޯ!! މާ ހަމަޖެހފަ ވެރިކަން ކުރެވޭނެ ކަމަށްދޯ ތި ހުންނަނީ!! އަދި އޮތީ ހަރުގަނޑުގެ މައްސަލައިގަ ވަންނަން އޮތ އޮތް ކުޑަ ގޮޅި ހެހެ ހެހެ!