ނައިފަރުގައި މީހަކަށް އަނިޔާކުރި 3 ފުލުހަކު ވަޒީފާއިން ވަކިކޮށްފި
މިދިޔަ މަހުގެ 16 ވަނަ ދުވަހުގެ ރޭ ޅ. ނައިފަރުގައި އާންމުންގެ މީހަކަށް އަނިޔާކުރި ތިން ފުލުހަކު ވަޒީފާއިން ވަކިކޮށް ދެ ފުލުހެއްގެ ރޭންކް ދަށްކޮށްފިއެވެ.
ފުލުހުންގެ މީޑިއާ އޮފިޝަލަކު "ދެން" އަށް މައުލޫމާތު ދެއްވަމުން ވިދާޅުވީ ނައިފަރުގައި ފުލުހުން މީހަކަށް އަނިޔާކުރި ކަމުގެ ތުހުމަތުގައި ތިން ފުލުހަކު ވަޒީފާއިން ވަކިކޮށް ދެ ފުލުހަކު މިހާރު ހުރި ރޭންކުން އެއް ރޭންކު ދަށްކޮށްފައިވާ ކަމަށެވެ.
މި ފަސް ފުލުހުންނާ މެދު ފިޔަވަޅު އެޅީ ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން ބެލުމަށް ފަހު ޑިސިޕްލިނަރީ ބޯޑަށް ހުށަހެޅުމުން ކަމަށް ވެސް އޮފިޝަލު ވިދާޅުވިއެވެ. އެ ފުލުހުންނަށް ފިޔަވަޅު އެޅީ މި މަހުގެ 22 ވަނަ ދުވަހުގައެވެ.
މި މައްސަލައިގައި އަޅައިފައިވާ ފިޔަވަޅު އިސްތިއުނާފު ކުރުމަށް، ބަންދު ދުވަސްތައް ނުހިމަނައި 7 ދުވަސް، މި މައްސަލައިގައި ފިޔަވަޅު އަޅައިފައިވާ ފުލުހުންނަށް ލިބޭނެ ކަމަށް ވެސް އޮފިޝަލު ވިދާޅުވިއެވެ.
އެނގިފައިވާ ގޮތުގައި ނައިފަރު ޕޮލިސް ސްޓޭޝަންގެ ފުލުހުންތަކެއް އެ ރަށު މުންތަސީރު މުހައްމަދު ކިޔާ މީހަކަށް އަނިޔާކުރީ ފުލުހެއްގެ އަނތްބަކު މަގުމަތިން ދަނިކޮށް، ތުނބުން ފުމެ ފުރައްސާރަ ކުރި ކަމަށް ބުނެއެވެ. އެ ތުހުމަތުތަކަށް އޭނާ އިންކާރު ވެސް ކުރިއެވެ.
މުންތަސީރަށް އަނިޔާ ކުރީ އެ ރަށުގެ ދެކުނު ފަރާތުގައި އޮންނަ ސިނާއީ ސަރަހައްދަށް ގެންގޮސް ކަމަށާއި ފަހުން އެ ރަށުގެ ކުނިގޮނޑު ސަރަހައްދަށް ގެންގޮސް ވެސް އޭނާއަށް އަނިޔާކުރި ކަމަށް އޭނާ ބުނެފައިވެއެވެ. އަދި ވަރަށް ހަޑިހުތުރު ބަހުން އެއްޗެހި ގޮވަމުން، އެ ތަނުން ފުލުހަކު މުންތަސީރުގެ މޫނުމަތީގައި ތިން ފަހަރު ޖެހުމުން ބިންމައްޗަށް ވެއްޓުމުން، އެ ހުރިހާ ފުލުހުން ވެގެން އޭނާގެ ގައިގައި ފައިންނާއި އަތުން ތެޅި ކަމަށް ވެސް އޭނާ ބުންޏެވެ.
Ads by STO
