ކޮވިޑްގެ ޙާލަތުން އަރައިގަތުމަށް މިވަގުތު އެންމެ އިސްކަމެއް ދެއްވަނީ ވިޔަފާރިތައް ހުޅުވައިލުމަށް: ރައީސް
ކޮވިޑްގެ ޙާލަތުން އަރައިގަތުމަށް މިވަގުތަށް އެންމެ އިސްކަމެއް ދެއްވަނީ ވިޔަފާރިތައް ހުޅުވައިލައި އިޤްތިޞާދު ހިނގައިގަތުމަށް ކުރެވެން ހުރި މަސައްކަތްތައް ކުރެއްވުމަށް ކަމަށް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ އިއްޔެ އޮންލައިންކޮށް މީޑިޔާއާ ބައްދަލުކުރައްވައި ބޭއްވެވި ނޫސްވެރިންގެ ބައްދަލުވުމުގައެވެ. ރައީސް ވިދާޅުވީ ވިޔަފާރިތައް ހުޅުވައިލައި އިޤްތިޞާދު ހިނގައިގަތުމަށް މަސައްކަތް ކުރި ނަމަވެސް ބަލި ފެތުރިގަނެގެން ހިނގައިދާނެތީ ރައްކާތެރިކަމުގެ ގޮތުން އަޅަންޖެހޭ ހުރިހާ ފިޔަވަޅުތައް އަޅަމުން ގެންދާނެކަމަށެވެ.
އެގޮތުން ދިގު މުއްދަތެއްގައި ކޮވިޑް ކޮންޓްރޯލުކުރުމުގެ މަސައްކަތް ކުރިޔަށް ގެންދާއިރު އިތުރު ފެސިލިޓީތައް ޤާއިމު ކުރުމާއި އެމެޖެންސީ މެޑިކަލް ސާވިސް (އީ.އެމް.އެސް) ތަޢާރަފު ކުރުމާއި މޯލްޑިވްސް ހެލްތު ސާވިސް (އެމް.އެޗް.އެސް) ތަޢާރަފުކޮށް ޕްރައިމަރީ ހެލްތުކެއާރގެ ޚިދުމަތް ކުރިޔަށް ވުރެ ރަނގަޅަށް ރާއްޖޭގެ އެކި ސަރަޙައްދުގައި ދެވޭނެގޮތް ހަމަޖެހިގެން ދާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
ކޮވިޑާގުޅިގެން ވިޔަފާރިތަކަށް ދިމާވާ ދަތިތަކަށް ލުޔެއް ދިނުމުގެ ގޮތުން ވޭތުވެ ދިޔަ ތަނުގައި ސަރުކާރުން ހުޅުވައިލި ފުރުޞަތުތަކުގެ ތަފްޞީލުތަ އްވެސް ރައީސް ޙިއްޞާ ކުރެއްވިއެވެ. އަދި ކޮވިޑްގެ ފިވަޅުތައް އަލުން ވަރުގަދަ ކުރުމާ ގުޅިގެން އިތުރަށް ވިޔަފާރިތަކަށް ލިބުނު ގެއްލުންތަކުން އަރައިގަތުމަށް އިތުރު އެހީތައް ދެމުންގެންދާކަން ވެސް ރައީސް ފާހަގަކުރެއްވިއެވެ.
