ތުޅާދޫ ގެއެއްގައި އަލިފާން ރޯވެ، ގެ ހަދަން އެއްކުރި ފައިސާއާއި ގެ ވެސް އަނދައި އަޅިއަށް
ބ.ތުޅާދޫ ގުލްޝަނީހިޔާގައި މިއަދު 11:00ހާއިރު ރޯވީ އެ ގޭގައި އެއްވެސް މީހަކު ނެތް ވަގުތެއްގައެވެ. އެ ގެއަކީ ދެމަފިރިންނާއި އެމީހުންގެ ދެ ދަރިން ދިރިއުޅޭ ގެއެކެވެ. އަލިފާނުގެ ހާދިސާ ހިނގި ވަގުތު އަންހެން މީހާ ދެ ދަރިން ގޮވައިގެން އުޅުނީ އޭނާގެ މަންމަގެ ގޭގައެވެ. އަދި ފިރިމީހާއަކީ ސުކޫލުގައި މަސައްކަތު މީހެއްގެ ގޮތުގައި އުޅޭ މީހަކަށް ވާތީ އޭނާ އެ ވަގުތު އުޅުނީ އޮފީހުގައެވެ.
ނަސީބު ކަން ދިމާ ކުރި ގޮތުން އެ ގޭގައި އަލިފާނުގެ ހާދިސާ ހިނގި އިރު މީހަކު ނެތުމުން އެއްވެސް މީހަކަށް ގެއްލުމެއް ނުލިބެއެވެ. ނަމަވެސް އެއް ކޮޓަރިއާއި ސިޓިންގރޫމެއް ހުންނަ އެގޭގެ ސިޓިންގރޫމުގައި ހުރި ހުރިހައި އެއްޗެއް މި ހާދިސާގައި ވަނީ އަނދައި އަޅިއަށް ވެފައެވެ.
އެގޭގައި ދިރިއުޅޭ ދެމަފިރިންގެ ތެރެއިން އަންހެން މީހާގެ ބޭބެ މުހައްމަދު މުމްތާޒް "ދެން"އާ ވާހަކަ ދައްކަމުން ބުނީ އޭނާގެ ކޮއްކޮއަކީ ގިނަ ވަގުތު މަންމަމެންގެ ގޭގައި އުޅޭ މީހެއް ކަމަށެވެ. އަދި މިއަދު ވެސް އެ ހާދިސާ ހިނގި ވަގުތު ކޮއްކޮ ހުރީ މަންމަމެން ގޭގައި ކަމަށް އޭނާ ކިޔައިދިނެވެ.
މުމްތާޒް ކިޔައިދިން ގޮތުގައި އެމީހުންނަކީ ވަރަށް އާދައިގެ ދިިރިއުޅުމެއް އުޅެމުން ދިޔަ ދެމަފިރިންނެވެ. އެގޮތުން އެ ދެމަފިރިން ކައިވެނި ކޮށްގެން އުޅޭތާ މިހާރު 15 ވަރަކަށް އަހަރު ވެދާނެ ކަމަށާއި އެމީހުން އެގެއަށް ބަދަލުވީތާ ވާނީ ދެތިން އަހަރެއް ކަމަށް އޭނާ ކިޔައިދިނެވެ.
އެ ގޭގެ ސިޓިންރޫމުގައި ހުންނަނީ އައިސް އަލަމާރިއަކާއި އަވަނަކާއި އަދިވެސް އެހެން އިލެކްޓްރިކް ސާމާނެވެ. އަދި އައިސް އަލަމާރި ކައިރީގައި ކުދިން ނިދަން އަޅައިފައި ގޮދަޑިއެއް އޮންނާނެ ކަމަށް ވެސް އޭނާ ކިޔައިދިނެވެ. އަދި އަލިފާނުގެ ހާދިސާ ހިނގީ އައިސް އަލަމާރީގައި ކަރަންޓު ޝޯޓެއް ހިނގައިގެން ކަމަށް ބެލެވޭ ކަމަށް ވެސް އޭނާ ކިޔައިދިނެވެ.
އެތަނުގައި ރޯވީ 11:00ހާއިރު ނަމަވެސް މީހުންނަށް އެނގޭ ވަރުވީ 11:30 ހާއިރުއެވެ. ސަބަބަކީ އެތަނަކީ ބަންދުވެފައި ހުންނަ ތަނެއް ކަމަށް ވާތީއެވެ. އެތަން ނިއްވައިލަން މަސައްކަތް ކުރީ ދޮރު ވައްޓައިލައިގެންނެވެ.
އެތަނުގައި ދިރިއުޅުނު ދެމަފިރިންގެ ކައިވެންޏަށް 15 އަހަރުވެފައިވާއިރު އެމީހުން ފައިސާ އެއްކުރަމުން ދިޔައީ އެމީހުންނަށް ލިބިފައިވާ ގޯތީގައި ގެއެއް އެޅުމަށެވެ. އަދި ކޮންމެ މަހަކު ވެސް ލިބޭ ފައިސާ ގެނެސް ރައްކާ ކުރަނީ ސިޓިންގރޫމުގައި ހުންނަ ގޮދަޑި ދަށުގައި ކަމަށް މުމްތާޒު ކިޔައިދިނެވެ.
"ކޮއްކޮ އިނދެގެން އުޅުނު މީހާއަކީ އެހާ ޓެކްނޮލޮޖީއާ އަހުލުވެރި މީހެއް ނޫން. އެހެންވެ ކޮންމެ މަހަކު ވެސް މުސާރަ ނަގާފަ ގެއަށް ބޭނުންވާ ހަރަދު ކޮށްފަ ގޮދަޑި ދަށުގައި ފޮރުވާ ކަމަށް ވަނީ" މުމްތާޒް ބުންޏެވެ.
އެތަނުގައި ރައްކާ ކުރެވިފައި ވީ ކިހައި ފައިސާއެއްކަން ނޭނގުނު ނަމަވެސް އެ ތަނުގައި ހުރި ހުރިހައި ފައިސާއަކާއި ތަކެއްޗެއް ވަނީ މި ހާދިސާގައި އަނދައި އަޅިއަށް ވެފައެވެ. އެހެންކަމުން މިހާރު އެ ގޭގައި އެ ދެމަފިިރިންނަށް އުޅެވޭކަށް ނެތެވެ.
އާއިލާގެ އެހީތެރިކަމާ އެކު އެމީހުން މިހާރު ދިރިއުޅެމުން އަންނަނީ އަންހެން މީހާގެ މަންމަމެން ގޭގައެވެ. އަދި އެ ދެމަފިރިންނަށް ކައުންސިލުގެ ފަރާތުންނާއި އާންމު ދެ ފަރާތަކުން ވެސް ބޯހިޔާވަހިކަމާއި އެހީތެރިކަން ފޯރުކޮށްދިން ކަމުގައި މުމްތާޒް ކިޔައިިދިނެވެ. އަދި އެމީހުންނަށް މުމްތާޒް ވަނީ ޝުކުރު އަދާ ކޮށްފައެވެ.
އަލިފާނުގެ ހާދިސާގައި ވީ ގެއްލުމާއެކު ދެމަފިރިންނަށް ވެސް ވަނީ ނަފްސާނީ ގޮތުން އަސަރު ކޮށްފައެވެ. އަދި މިހާތަނަށް ވެސް އެމީހުންނާ ވާހަކަ ދައްކައި ނުލެވޭ ކަމަށް އޭނާ ކިޔައިދިނެވެ.
