Friday, 20 November 2026
Advertisement
Ooredoo — Article-Top (leaderboard)
ޚަބަރު

އައިސީޖޭއިން މިޔަންމާއާ ދެކޮޅަށް ނެރުނު ޙުކުމަށް ރައީސް މަރުހަބާ ވިދާޅުވެއްޖެ

ބައިނަލްއަގުވާމީ ކޯޓުން މިޔަންމާއާ ދެކޮޅަށް ނެރުނު ހުކުމަކީ ނަސްލު ނައްތާލުމުގެ އަމަލުތައް ހުއްޓުވައި، ޒިންމާދާރުކުރުވުމަށް އެޅުނު މުހިންމު ފިޔަވަޅެއް ކަމަށް ރައީސް ވިދާޅުވި އެވެ.

ފޮޓޯ: ރައީސުލްޖުމްހޫރިއްޔާގެ އޮފީސް
ފޮޓޯ: ރައީސުލްޖުމްހޫރިއްޔާގެ އޮފީސް

އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގައި ކުރިއަށްދިޔަ "އެޕްލިކޭޝަން އޮފް ދަ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް" (ގެމްބިއާ ވާސަސް މިޔަންމާ) މައްސަލައިގައި އެ ކޯޓުން ނެރުނު ހުކުމަށް ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު މަރުހަބާ ވިދާޅުވެއްޖެއެވެ.

ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ނަސްލު ނައްތާލުމުގެ ނިޔަތުގައި ހިންގާ ލާއިންސާނީ އަމަލުތައް ކުށްވެރިކުރުމަށް އެޅުނު ހަރުދަނާ ފިޔަވަޅެއް ކަމަށެވެ. އަދި މިފަދަ ޖަރީމާތައް ހުއްޓުވުމުގައި އައިސީޖޭއިން އަދާކުރާ ދައުރާއި، ކުށްވެރިން ޖަވާބުދާރީކުރުވުމަށް ކުރާ މަސައްކަތް އެމަނިކުފާނު ފާހަގަކުރެއްވިއެވެ.

މި މައްސަލައިގައި ރާއްޖެއިން ތަދައްޚުލުވެފައިވާކަން ފާހަގަކުރައްވައި، ނަސްލު ނައްތާލުމުގެ އަމަލުތަކާ ދެކޮޅަށް ވަކާލާތުކުރުމުގައި ރާއްޖެ އަބަދުވެސް ދެމިއޮންނާނެ ކަމުގެ ޔަގީންކަން ރައީސް ދެއްވިއެވެ. މީގެއިތުރުން، ބައިނަލްއަގުވާމީ ގާނޫނުތަކަށް ބޯލަނބައި، އަނިޔާ ލިބޭ ފަރާތްތަކަށް އިންސާފު ހޯދައިދިނުމަށް ބައިނަލްއަގުވާމީ މުޖުތަމައު ގުޅިގެން މަސައްކަތް ކުރުމަށް ވެސް އެމަނިކުފާނު ގޮވައިލެއްވިއެވެ.

ރައީސްގެ މެސެޖު ނިންމަވާލެއްވީ އިންސާނީ ކަރާމާތް ދަމަހައްޓައި، އަދުލު އިންސާފު ގާއިމުކުރުމަށް ހުރިހާ ގައުމުތަކުން އެކުގައި މަސައްކަތް ކުރުމަށް އިލްތިމާސް ކުރައްވަމުންނެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.