އެމްޑީޕީގެ ކެނޑިޑޭޓަކީ އަޅުގަނޑު، ރައީސް ޔާމީނަށް ވެސް ވާދަ ކުރެވެންވާނެ: ރައީސް ނަޝީދު
އިދިކޮޅު ކޯލިޝަންގެ ލީޑަރު އަދި ކުރީގެ ރައީސް އަބްދުﷲ ޔާމީނަށް ރިޔާސީ އިންތިޚާބުގައި ވާދަކުރެއްވެން ވާނެ ކަމަށާއި ރައީސް ޔާމީނަށް ފުރުސަތު ދިނުމާ ދެކޮޅު ނޫން ކަމަށް، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިހާރު ކުރިޔަށްދާ "އާސްކް ސްޕީކާ" ޕްރޮގްރާމްގައި ވާހަކަ ދައްކަވަމުން ރައީސް ނަޝީދު ވިދާޅުވީ، 2023 އިންތިހާބުގައި އެމްޑީޕީން ވާދަ ކުރާނެ ކެނޑިޑޭޓަކު ކަނޑައެޅުމަށް ޕްރައިމަރީ އޮންނާނެ ކަމަށާއި އެ ޕްރައިމަރީގައި ވާދަ ކުރައްވާ ކާމިޔާބު ހޯއްދަވާނެ ކަމަށެވެ. އަދި ރާއްޖޭގެ ވެރިކަން ބަރުލަމާނީ ނިޒާމަކަށް ފުރޮޅައިލާން ކުރައްވާ މަސައްކަތް ކާމިޔާބު ކުރައްވާނެ ކަމަށާއި އެމަސައްކަތުގައި ރައީސް ޔާމީންގެ އެއްބާރުލެއްވުން ލިބޭނެ ކަމަށް އުންމީދު ކުރައްވާ ކަމަށް ވެސް ރައީސް ނަޝީދު ވިދާޅުވިއެވެ.
"އަޅުގަނޑު ރައީސް ޔާމީނަށް އެއްވެސް ދެރައެއް ނޭދޭނަން. އަޅުގަނޑުގެ އުންމީދަކީ ދިވެހިރާއްޖޭގެ ކޮންމެ އިންތިޚާބެއްގައި ވެސް ހުރިހާ ސިޔާސީ ވެރިންނަށް ބައިވެރިވެވޭނެ ގޮތަކަށް ކުރިޔަށް ދިއުން." ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ ފެންނަ ނުފެންނަ އިންތިޚާބަށް އެމްޑީޕީ އަދި ޕީޕީއެމް އެކުވެ މަސައްކަތް ކުރާނެ ކަމަށް ޤަބޫލުފުޅު ކުރައްވާ ކަމަށެވެ.
"އަދި އަޅުގަނޑު ނުދެކެން ރިޔާސީ އިންތިޚާބެއް ރާއްޖޭގައި އޮންނާނެ ކަމަކަށް. އަޅުގަނޑު ދެކެނީ ރައީސް ޔާމީން އަޅުގަނޑާއެކުގައި ރާއްޖެއަށް ބަރުލަމާނީ ނިޒާމެއް ގެނައުމުގައި މަސައްކަތް ކުރައްވާނެ ކަމަށް. އަދި ފެންނަ ނުފެންނަ ވޯޓެއް ނަގާއިރުގައި އެމްޑީޕީއާއި ޕީޕީއެމްއާ އެކުގައި ތިބިގެން ފެންނަ ނުފެންނަ ވޯޓަށް ދެވޭނެ ކަމަށް."ނަޝީދު ވިދާޅުވިއެވެ.
ރައީސް ނަޝީދުގެ ވާހަކަފުޅުގައި ވިދާޅުވީ 2023ގެ ރިޔާސީ އިންތިހާބު ބޭއްވުމަށް ވުރެ ގައުމަށް އެންމެ ބޭނުންތެރިކަމަކީ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުން ކަމަށެވެ. އަދި ރާއްޖޭގެ ވެރިކަން ހިންގާ ނިޒާމް 2023 ވަނަ އަހަރު ބަރުލަމާނީ ނިޒާމަކަށް ބަދަލު ކުރެވޭނެ ކަމަށާއި އޭގެ ފަހުން، ރައްޔިތުންގެ މަޖިލީހުގެ ތެރެއިން ސަރުކާރު އެކުލަވައިލާނެ ކަމަށް ވެސް އެމަނިކުފާނު ވިދާޅުވިއެވެ. އަދި ބަރުލަމާނީ ނިޒާމަކަށް ނުގޮސްފި ނަމަ އެމްޑީޕީގެ ރިޔާސީ ކެނޑިޑޭޓަކީ އެމަނިކުފާނު ކަމަށް ވިދާޅުވިއެވެ.
އިންތިޚާބުގައި ނަޝީދަށް ކުރިމަތި ނުލެވޭ ހާލަތެއްގައި މިހާރުގެ ރައީސް އިބްރާހީމް މުޙައްމަދު ޞާލިޙް ބައިވެރިވެ ވަޑައިގެންފި ނަމަ އެމަނިކުފާނަށް ތާޢީދު ކުރައްވާނަންތޯ ތަކުރާރުކޮށް ސުވާލު ކުރުމުން ނަޝީދު ވިދާޅުވީ، "އެމްޑީޕީގެ ކެނޑިޑޭޓަކަށް ތާއީދު ނުކުރާނެ ދުވަހެއް ނާންނާނެ" ކަމަށެވެ.
މިކަލޭގެ ބޯހަމަނުޖެހެނީބާ؟؟؟؟ ބަލިވިފަހުން!!