ޓެރެރިސްޒަމް އަމަލު ހިންގުމަށް ބަޔަކު އުފައްދާ ނަމަ އުފެއްދީ މި ސަރުކާރުން: އާދަމް ޝަރީފް
ދިވެހި ރާއްޖޭގައި ޓެރެރިޒަމްގެ އަމަލެއް ހިންގުމަށް ބަޔަކު އުފައްދާ ނަމަ އެކަން ކުރި ބަޔަކު ތިބީ މިސަރުކާރުގައި ކަމަށާއި މިއަދުގެ ސަރުކާރުގައި ތިބި ގިނަ މީހުން މިކަން ޤަބޫލު ކުރާނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވެއްޖެއެވެ.
ޓެރެރިޒަމްގެ ޤާނޫނަށް އިސްލާޙް ގެނައުމަށް މިއަދު މަޖިލީހުގައި ކުރިޔަށް ދިޔަ ޖަލްސާގައި ވާހަކަފުޅު ދައްކަވަމުން އާދަމް ޝަރީފް ވިދާޅުވީ، މިއަދު ސަރުކާރުން ކަންތައް ކުރަމުން އަންނަނީ ހަރުކަށި ފިކުރު އަދި ލާދީނީ ފިކުރުވެސް އިތުރުވާ ގޮތަށް ކަމަށާއި ހިކުމަތްތެރިކަމާ އެކު މަސައްކަތް ކުރުމުގެ ބަދަލުގައި އެމީހުންނަށް ޗެލެންޖް ކުރާ ތަން ފެންނަ ކަމަށެވެ. އަދި މިއީ ދުނިޔޭގެ ބޮޑެތި ޤައުމުތަކުގައި ކަންތައް ކުރަމުން އަންނަ އުސޫލު ނޫން ކަމަށާއި ޤައުމީ ސަލާމަތަށް ނުރައްކާތެރި މީހުން ހައްޔަރުކުރަން ޖެހޭ ކަމަށާއި ނަމަވެސް އެފަދަ ކަންތައް ކުރަން ޖެހޭނީ ހިކުމަތްތެރިކަމާ އެކުގައި ކަަމަށް އާދަމް ޝަރީފް އުމަރު ވިދާޅުވިއެވެ.
"މިއަދުގެ މި ސަރުކާރުގައި ތިބި ގިނަ މީހުން ޤަބޫލު ކުރާނެ މި ރާއްޖޭގައި ޓެރެރިޒަމްގެ އަމަލެއް ހިންގުމަށް ބަޔަކު އުފައްދާ ކަމަށް ވެއްޖިއްޔާ އެ އުފެއްދި ބަޔަކު ވެސް ތިބީ މިއަދުގެ ސަރުކާރުގައިކަން." އާދަމް ޝަރީފް އުމަރު ވިދާޅުވިއެވެ.
މީގެ އިތުރުން އާދަމް ޝަރީފް ވަނީ މި މައްސަލަ ހައްލު ކުރުމަށް ސަރުކާރުން ގެންގުޅުއްވާ ސިޔާސަތަށް ވެސް ފާޑު ވިދާޅުވެފައެވެ.
"މި ސަރުކާރުން މިބާވަތުގެ ކަންކަމުގައި މީހުން ރުޅި އަންނާނެ ގޮތަށް ކަންތައް ކުރަމުންދާ މަންޒަރު. ދީނީ ހަރުކަށި ފިކުރުގެ މީހުންނަށްވެސް، ޓެރެރިޒަމްގެ މީހުންނަށްވެސް، ދުނިޔޭގެ ބެސްޓް ޕްރެސްޓިސް އަކީ ޗެލެންޖް ކުރުމެއް ނޫން، ސޮފްޓް އެޕްރޯޗް." އާދަމް ޝަރީފް ވިދާޅުވިއެވެ.
އާދަމް ޝަރީފްގެ ވާހަކަފުޅުގައި ވަނީ ، ރައީސް ނަޝީދު އަވަހާރަކޮށްލަން އެހާ ވަރުގަދަ ހަމަލާއެއް ދިނުމުން އެމްޑީޕީގެ މެންބަރުން ކުރީ ކޮންކަމެއްތޯ ސުވާލު އުފައްދަވައިފައެެވެ. އަދި ނޫސްތަކުގެ ހެޑްލައިން ޖެއްސެވުމަށް މަޖިލީހުގައި ވާހަކަދެއްކެވުމުގެ އިތުރަށް ކުރެއްވީ ކޮންކަމެއްތޯ ވެސް އެއްސެވިއެވެ. އަދި ވިދާޅުވީ، މިއަދު ރައީސް ނަޝީދަށް އިންސާފު ނުލިބި އެތައް ދުވަހެއް ވެފައިވާއިރު، އެމްޑީޕީގެ މެންބަރުން "ގެޔަށް ވަދެ، ހޮރަށް ވަދެ ފިލާ" ތިބި ކަމަށާއި އެބޭފުޅުން ޓެރެރިޒަމްގެ ވާހަކަ ހަރުއަޑުން ދައްކަން ލަދު ގަންނަން ޖެހޭނެ ކަމަށެވެ.
ޝަރީފްގެ ވާހަކަފުޅުގައި އިތުރަށް ވިދާޅުވީ، ރައީސް ނަޝީދަށް އިންސާފު ހޯއްދަވައި ދިނުމަށް މިއަދު ޕީޕީއެމް އޮތީ ތައްޔާރަށް ކަމަށާއި ހަމަލާއާ ގުޅިގެން މަޖިލީހުން ހަދާ އެންކުއަރީއަށް ވެސް ޕީޕީއެމްގެ ފުރިހަމަ ތާއީދު ލިބޭނެ ކަމަށެވެ. އަދި ރައީސް ނަޝީދުގެ ހާލުކޮޅު ސަރުކާރުން ނުބައްލަވާ ކަމަށް އިޝާރާތް ކުރައްވާ ވިދާޅުވީ، ހަމަލާދިން މީހުން ބޭނުންވި ގޮތަށް ހަމަލާ ދެވުނު ނަމަ ތިން ދުވަހު ދިދަ ތިރިކޮށް، ކަފުނު މަތީ ދިދައެއް ބާއްވާ މައްސަލަ ނިންމަވައިލައްވާނެކަމަށް ވެސް އާދަމް ޝަރީފް ވިދާޅުވިއެވެ.
"އެވަރުގެ ކަމެއްގައި ތިބެގެން ސަރުކާރުން ކިހާ ވަރަކަށްތޯ ރައީސް ނަޝީދުގެ ހާލުކޮޅު ބައްލަވާ ރައްޔިތުންނަށް ހާމަކޮށްދެއްވީ. ކިހާ ވަރަކަށްތޯ މިވާހަކަ ދެއްކީ، ހަމަލާ ދިން މީހުން ބޭނުން ގޮތަށް އެކަން ދިޔަ ނަމަ ރައީސް ނަޝީދުގެ ހަށިގަނޑުގެ އެކި ގުނަވަންތައް އެކި ހިސާބުން ފެނުމަކީ އެކަށީގެންވާ ކަމެއް. އޭރުން ފަހަރެއްގައި ސަރުކާރުން އެހުރިހާ ކަށިތައް އެއްކޮށްލާފަ، ދެން ޤައުމީ ދިދައެއް ސަންދޯކުގައި އަޅައިގެން ސަރުކާރުން ވަރަށް ބޮޑު ރަސްމިއްޔާތެއް ބާއްވާ، ތިން ދުވަހަށް ޤައުމީ ދިދަ ތިރި ކުރުމަކީވެސް ހަމަ އެކަށީގެންވާ ކަމެއް." މި މައްސަލައިގައި ވަރަށް ބޮޑަށް ފާޑު ވިދާޅުވަމުން އާދަމް ޝަރީފް ވިދާޅުވިއެވެ.
