ގެވެށި އަނިޔާއިން ރައްކާތެރިވުމަށްޓަކައި ދޭ މެސެޖުތައް އެއްގޮތްކުރަން ޖެހޭ: ފަޒްނާ
ގެވެށި ގުޅުން ބަދަހިކުރުމަށް ޓަކައި މުޖުތަމަޢުގައި ކުރާ ކަންކަމާއި ދޭ މެސެޖުތައް އެއްގޮތް ކުރުމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ބާރުއަޅުއްވައިފިއެވެ.
އެކަމަނާ މިކަމަށް ބާރުއަޅުއްވައިފައި ވަނީ، ގެވެށި އަނިޔާއިން ރައްކާތެރިވެފައިވާ މާހައުލެއް ބިނާކުރުމަށް ޓަކައި މީހުން ހޭލުންތެރިކުރުމުގެ މަޤްޞަދުގައި ޔޫ.އެން.އެޕް.ޕީ.އޭއާއި ގުޅިގެން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސާވިސަސްއިން ތައްޔާރުކޮށް ސިލްސިލާކޮށް ގެނެސްދެމުން ދިޔަ ގެވެށި ގުޅުން "ސާސްތްރަ" ޕްރޮގްރާމްގެ އެންމެ ފަހު އެޕިސޯޑުގައި ދެއްވި ވީޑިއޯ މެސެޖުގައި ވާހަކަފުޅު ދައްކަވަމުންނެވެ.
މިމޭރުމުން ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާގެ އަނބިކަނބަލުން ވަނީ މީޑިއާތަކުން ގެނެސްދޭ ބައެއް އިޝްތިހާރުތަކުން ގޭތެރޭގެ މައްސަލަތައް ފާހަގަވާގޮތަށް އިޝްތިހާރު ގެނެސްދިނުމުގެ ބަދަލުގައި ގޭތެރޭގައި މީހުން މުޢާމަލާތްކުރާ ރަނގަޅު ގޮތްތަކާއި، ރަނގަޅު އާދަތައް އިޝްތިހާރުތަކުން ވެސް ދައްކައި އެއް މެސެޖެއް މުޖުތަމަޢަށް ފޯރުކޮށްދިނުމުގެ މުހިންމު ކަމާ ގުޅޭ ގޮތުން ވާހަކަފުޅު ދައްކަވައިފައެވެ.
ހަމަ އެއާއެކު އަޅުގަނޑުމެން އުޅެމުން އަންނަ އަވަދިނެތިކަމުގެ ތެރެއިން ޢާއިލާއަށް ވަގުތުކޮޅެއް ދިނުން މުހިންމުކަމަށާއި، އަދި އެފަދަ ވަގުތުތަކުގައި ފޯނާއި ދުރުވެ، އެކުވެރިކަމާ އެކު ގޭތެރޭގެކަންކަން އިންތިޒާމްކޮށް ޢަމަލުތައް ހެޔޮގޮތުގައި ބަހައްޓާ ނަމަ މުޖުތަމަޢު ތެރޭގައި އުޅޭއިރު ވެސް އެ ރީތި އާދަތައް މި ގޮތަށް ހުރުން ގާތްކަމުގައި އެކަމަނާ ވިދާޅުވިއެވެ.
މީގެ އިތުރުން ވެސް މެޑަމް ފަޒްނާ ވަނީ ގޭތެރޭގައި އެކަކު އަނެކަކާ މުޢާމަލާތް ކުރާއިރު، ލޯތްބާއި އިޙްތިރާމާ އެކީ މައިންބަފައިން ވާހަކަދެއްކުމަށް ބާރު އަޅުއްވައިއެވެ. އެކަމުން ދަރިންނަށް ރައްކާތެރިކަމާ އަމާންކަން އިހުސާސްވާނެކަމުގައި އެކަމަނާ ފާހަގަ ކުރެއްވެވިއެވެ. އަދި ހަމަ އެއާއެކު ކުދިންގެ ނުވަތަ ބޮޑެތި މީހުންގެ ވެސް ޢަމަލެއް ބަދަލުކުރުމަށް މަސައްކަތްކުރާ އިރު ފައްސި ބަސް ބޭނުންކުރުމަށް ސަމާލުކަންދިނުމަށް އެކަމަނާ ވަނީ ބާރު އަޅުއްވައިފައެވެ. އަދި އެކަމުގެ ސަބަބުން އެ ޢަމަލު ބަދަލުކުރަން ފަސޭހަވާނެކަމަށް އެކަމަނާގެ މެސެޖުގައި ފާހަގަ ކުރައްވައިފައިވެއެވެ.
ރައީސުލްޖުމްހޫރިއްޔާގެ އަނބިކަނބަލުންގެ މެސެޖުގައި އެންމެ ފަހު ނުކުތާއެއްގެ ގޮތުން ފާހަގަ ކުރައްވައިފައި ވަނީ ގެވެށި އަނިޔާގެ ޝިކާރައަކަށް ވާ މީހުންނަށް އެކަމުން އަރައިގަނެވޭނެ ގޮތްތަކެއް ހޯދައިދިނުމުގެ މައްޗަށެވެ. އެގޮތުން އެކަމަނާ ވަނީ މިނިސްޓްރީގެ ހޮޓްލައިނަށް ގުޅުމުން އެކަމުން އަރައިގަތުމަށް ޓަކައި ބޭނުންވާ މަޢުލޫމާތު ލިބޭނެ މަގުފަހިކޮށްދިނުން މުހިންމުކަމުގައި ފާހަގަ ކުރައްވައިފައެވެ.
ހަމަ ގަމާރީތަ އަޅެފަހެ. ތި ހުރިހާ ކަމެއް ހައްލު ވާނީ އެންމެން އިސްލާމީ އުސޫލާ އެއްގޮތަށް އަމަލުކުރީމަ. އެ ނޫން ގޮތަކަށް މުޖުތަމައުގަ ހުރި މިކަހަލަ ކަންކަން ހައްލު ނުވާނެ. މީ ޗެލެންޖެއް. އަނެއްކާ މި ކޮމެންޓު މީނީ ހަރުކަށި ކެޓަގަރީގަ ބާ؟ ބޯހަލާކު ހުވާ މި ބުނީ.