ޝެއިޚް ފަޟުލޫނަށް ފިޔަވަޅު އަޅަައިދޭން ވައްޑެ ގޮވައިލައްވައިފި

ޝެއިހް ފަޟްލޫން ބިން މުހައްމަދަކީ ލޭއޮހޮރުވަން ހިތްވަރު ދޭ މީހެއްކަމަށް ވިދާޅުވެ އޭނާއާ މެދު ފިޔަވަޅު އެޅުމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަޙީދު (ވަައްޑެ) ގޮވައިލައްވައިއެވެ.

Ads by Sosun Fihaara

މެމްބަރު ވަޙީދު މަޖިލީހުގައި ދެއްކެވި ވާހަކަކޮޅެއް، ޝެއިހް ފަޟްލޫން ބިން މުހައްމަދު ޓްވިޓާގައި ޝެއަރ ކުރައްވުމުން އެ ޓްވީޓަށް ރައްދު ދެއްވައި ވައްޑެ ވިދާޅުވީ ޝެއިހް ފަޟްލޫނަކީ ރައީސް ނަޝީދާ މެދު ވެސް ނަފްރަތު އުފައްދައި، އެމަނިކުފާނު އަވަހާރަކޮށްލަން ހިތްވަރުދީ ހަދާފައިވާ މީހެއް ކަމަށާއި ހިތަށް އެރިހާ ގޮތަކަށް މީހުން ކާފަރު ކުރުމުގައި އަރާހުރި މީހެއް ކަމަށެވެ.

މީގެ އިތުރުން ވެސް ވައްޑެ ވިދާޅުވީ ޝެއިހް ފަޟްލޫން އަކީ ލޭއޮހޮރުވަން ހިތްވަރު ދޭ މީހެއް ކަމަށާއި އެއީ ނުރައްކާތެރި މީހެއް ކަމަށެވެ.

"ހިތަށް އެރިހާ ގޮތަކަށް، ހިތަށް އެރިހާ މީހަކު ކާފަރަކަށް ހަދަމުން، އަދި ނުވެގެން މި މީހުންގެ ގާތް އައުވާނުން ލައްވައި މަރައި ލޭ އޮހޮރުވަން ހިތްވަރު ދޭ މިލަންދޫ ފަޟްލޫން ކަހަލަ ނުރައްކާތެރި މީހުންނަށް ފިޔަވަޅު އަޅުއްވާ!" ވައްޑެގެ ޓްވީޓްގައި ވިދާޅުވިއެވެ.

މީގެ އިތުރުން ޝެއިހް ފަޟްލޫން އިސްލާމިކް ޔުނިވާސިޓީ ލެކްޗަރާކަން ކުރެއްވުމަކީ ކަންބޮޑުވާ ކަމެއް ކަމަށާއި ޝެއިހް ފަޟްލޫންއަށް ޝެއިހް އަލީ ޒާހިރު ރައީީސް އޮފީސް ތެރެއިން މަދަދު ދޭކަމަށް ވަައްޑެ ވަނީ ތުހުމަތު ކުރައްވާފައެވެ.

"މި މިލަންދޫ ފަޟްލޫނު ކަހަލަ، ތަނެއް ދޮރެއް ނުބަލައި ހިތަށް އެރިހާ މީހަކު ކާފަރުކޮށް ލޭ ހުއްދަކުރަން ހިތްވަރުދޭ މީހަކަށް ދާދި ފަހުން އިސްލާމިކް ޔުނިވާސިޓީ ލެކްޗަރާކަން ދީފައިވާ ކަމީ ކަންބޮޑުވާކަމެއް. އަދި ރައީސް އޮފީސް ތެރެއިން އަލީ ޒާހިރު މިފަދަ މީހުންނަށް މަދަދު ދޭކަމީ ދެރަވަރުކަމެއް." ވައްޑެ ޓްވީޓް ކުރެއްވިއެވެ.

ޝެއިހް ފަޟްލޫންއަށް ފިޔަވަޅު އަޅައި ދިނުމަށް އެދި މިނިސްޓްރީ އޮފް އިސްލާމިކް އެފެއާޒް، މޯލްޑިވްސް ޕޮލިސް ސާރވިސް އަދި ނޭޝަނަލް ކައުންޓަރ ޓެރަރިޒަމް ސެންޓަރަށް ވައްޑެވަނީ ގޮވައިލައްވައިފައެވެ.