އައިޖީއެމްޗުގައި ވިއްސި މީހާގެ ދަރިފުޅުގެ ބޯ ބުރިވިކަމަށް ބުނެ ފަތުރަމުންދަނީ ދޮގު ޚަބަރެއް!
އދ.އަތޮޅު ހޮސްޕިޓަލުން އައިޖީއެމްޗަށް ފޮނުވި މާބަނޑު މީހެއް ރޭ ވިއްސުވުމުގެ ތެރޭގައި ދަރިފުޅުގެ ބޯ ވަކިވިކަމަށް ބުނެ ރާއްޖޭގެ އޮންލައިން ނޫހަކުން ރިޕޯޓުކުރި ޚަބަރަކީ ދޮގެއް ކަމަށް އައިޖީއެމްއެޗްއިން ވިދާޅުވެއްޖެއެވެ.
“ދެން”އަށް މަޢުލޫމާތު ދެމުން އައިޖީއެމްއެޗް އިން ވިދާޅުވީ އެފަދަ އެއްވެސް ކަމެއް ހިނގައިފައި ނުވާ ކަމަށާއި ރޭ އައިޖީއެމްއެޗަށް މާބަނޑު ދެ މީހުން ވިއްސަން ގެނެވުނު ނަމަވެސް ވިހެއި ކުދިންގެ ހާލު ރަނގަޅުކަމަށެވެ.
“ރޭގަ އައިޖީއެމްއެޗްއަށް މާބަނޑު ދެ މީހުން ގެނެވުނު ވިހަން. ވިހެއި 2 ކުދިންގެ ހާލު ވެސް ރަނގަޅު. ތި ފަދަ ކަމެއް ހިނގައިގެން އުޅޭ ކަމުގެ މަޢުލޫމާތު ލިބިފައެއް ނުވޭ” އައިޖީއެމްއެޗްއިން ވިދާޅުވިއެވެ.
އެ ނޫހުން ރިޕޯޓުކޮށްފައިވާ ގޮތުގައި ބޯ ވަކިވުމުން ދަރިފުޅުގެ ހަށިގަނޑުގެ ބާކީ ބައި ނަގައިފައި ވަނީ ސިޒޭރިއަން ހަދައިގެންނެވެ. އަދި ވިހެއުމުގެ ތެރޭގައި މި ކުއްޖާގެ ބޮލާއި ހަށިގަނޑު ވަކިވީ މައިމީހާގެ ހަކުރު މަތިވުމުގެ ސަބަބުން ކުއްޖާ އާދަޔާ ޚިލާފަށް ބޮޑުވެ ބަނޑަށް މަރުވުމުގެ ސަބަބުން ކަމަށާއި އެ މީހާއަކީ އދ.އަތޮޅު ހޮސްޕިޓަލުން އައިޖީއެމްޗަށް ފޮނުވި މީހެއް ކަމަށް ރިޕޯޓް ކޮށްފައި ވެއެވެ.
މިކަމާ ގުޅިގެން އދ.އަތޮޅު ހޮސްޕިޓަލުގެ ހިންގުމާ ހަވާލުވެ ހުންނެވި ބުންޔާމީން ހަސަން “ދެން”އަށް މަޢުލޫމާތުދެއްވަމުން ވިދާޅުވީ އެ މީހާ މާލެ ފޮނުވައިފައި ވަނީ ފިޓް ޖެހި، ހާލު ދެރަވެގެން ކަމަށެވެ. އަދި ކުއްޖާ ވިހައިފައި ވަނީ ބަނޑަށް 7 މަހުގައި ކަމަށާއި ކުއްޖާގެ ހާލު ރަނގަޅު ކަމަށް ވެސް މައުލޫމާތު ދެއްވިއެވެ.
ބުންޔާމީން ވިދާޅުވީ ކުއްޖާއަށް އެފަދަ ކަމެއް ނުވާ ކަމަށް އާއިލާގެ ފަރާތުން ވެސް ކަށަވަރު ކޮށްދެއްވައިފައިވާ ކަމަށެވެ.
“މިކޮޅުން އެ އަންހެން މީހާ މާލެ ފޮނުވުނީ ފިޓް ޖެހިގެން ހާލު ދެރަވެގެން. ރޭގަ ވިހެއީ. ބަނޑަށް 7 މަހުގަ އެއީ. އަންހެން މީހާގެ ހާލުވެސް މިހާރު ރަނގަޅުވަމުން އަންނަ ކަމަށް އެނަގެ ފިރިމީހާ ވަނީ ބުނެފަ. އަދި ދަރިފުޅުގެ ހާލުވެސް ރަނގަޅު ކަމަށާއި އެ ފަދަ އެއްވެސް ކަމެއް ހިނގައިފައި ނުވާކަމަށް ވަނީ ބުނެފަ” ބުންޔާމީން ވިދާޅުވިއެވެ.
މީގެ އިތުރުން ބުންޔާމީން ވިދާޅުވީ އެ އަންހެން މީހާ އޮތީ އައިސީޔޫގައި ކަމަށާއި މިހާރު ހާލު ރަނގަޅުވަމުންދާކަމަށެވެ.
ކިހާ ދެރަކަމެއް ދެން..