މާރުކޭޓުން 449 ގޮޅި ދޫކުރަން ހުޅުވައިލައިފި
މާލޭ ސިޓީކައުންސިލުން ބަލަހައްޓަމުންގެންދާ ދަތުރުވެރިންގެ މާރުކޭޓް އަދި ލޯކަލް މާރުކޭޓުން ކުއްޔަށް ދޫކޮށްފައިވާ ގޮޅިތަކުގެ މުއްދަތު ހަމަވެފައިވާތީ އެ ގޮޅިތައް އަލުން ކުއްޔަށް ހިފަން އެދޭ ފަރާތްތަކަށް އެފުރުސަތު އާންމުކޮށް ހުޅުވައިލައިފިއެވެ.
މާލެ ސިޓީ ކައުންސިލުން ގޮޅި ދޫކުރަން ކުރި އިއުލާނުގައި ބުނެފައި ވަނީ ކޮންމެ ފަރާތަކުން ވެސް ފޯމް ލެވޭނީ އެއްގޮޅިއަށް ކަމަށެވެ. އަދި ފޯމް ހުށަހަޅާއިރު އެ ފަރާތަކުން ކުރަން ބޭނުންވާ ވިޔަފާރިއާ ދިމާލުގައި އެއްގޮޅީގައި ފާހަގަ ޖަހަންވާނެ ކަމަށް ސިޓީ ކައުންސިލުން ވަނީ ވިދާޅުވެފައެވެ.
މީގެ އިތުރުން އެއްވެސް ފަރާތަކުން އެއް ފޯމަށް ވުރެ ގިނަ ފޯމް ހުށަހެޅުމާއި، އެއްގޮޅިއަށް ވުރެ ގިނަ ގޮޅީގައި ފާހަގަ ޖެހުމާއި އެއްވެސް ގޮޅިއެއްގައި ފާހަގަ ނުޖަހާ ހުރި ނަމަ އެފޯމެއް ބާތިލް ވާނެ ކަމަށާއި ސިޓީ ކައުންސިލުން މީގެ ކުރިން ދީފައިވާ އެއްވެސް ޚިދުމަތަކަށް ދައްކަން ޖެހޭ ފައިސާއެއް މިހާތަނަށް ނުދައްކާ ހުރި ފަރާތްތަކުގެ ފޯ މްވެސް ބާތިލް ވާނެ ކަމަށް މާލޭ ސިޓީ ކައުންސިލުން ބުނެފައި ވެއެވެ.
މީގެ އިތުރުން ގޮޅި ގުރުއަތުލާނީ ގޮޅިތަކުގައި ކުރުމަށް ކަނޑައެޅިފައިވާ ވިޔަފާރިތަކަށް ކެޓަގަރީކުރުމަށް ފަހު އެކަޓަގަރީއަކަށް ކުރިމަތިލީ ފަރާތްތަކުގެ ތެރެއިން 50 ޕޮއިންޓުން މަތި ލިބޭ ފަރާތްތަކުގެ މެދުގައި ކަމަށާއި ގުރުއަތުލާނީ ގޮޅިތައް ބެހިފައިވާ ގޮތަށް، ކުރިމަތިލީ ފަރާތްތަކުގެ މެދުގައި އެ މާރުކޭޓަކަށް ވަކިވަކިން ކަމަށެވެ. އަދި ގުރުއަތުން ގޮޅި ލިބޭ ފަރާތްތަކަށް އެކަން އަންގާނެކަމަށް ވެސް ސިޓީ ކައުންސިލުން ވިދާޅުވިއެވެ.
ސިޓީ ކައުންސިލުން ވިދާޅުވީ ފޯމް ބަލައިގަންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 9:00 ން 14:00 އަށް މާލޭ ސިޓީ ކައުންސިލްގެ އާންމު ޚިދުމަތްތަކާ ބެހޭބައި ( ތައިސޭކޮށި ) އޮފީހުން ކަމަށެވެ. ފޯމް ބަލައިގަތުމުގެ އެންމެފަހު ތާރީޚަކީ 02 އޮގަސްޓް 2021 ވާ ހޯމަ ދުވަހުގެ 14:00 އެވެ.
