ގެއްލިގެން ހޯދަމުން ދިޔަ 12 ފޫޓުގެ ހަރުފަ ފެނުނީ ޝޮޕިންގް މޯލެއް ތެރެއިން
ލޫޒިއާނާގެ ޒުލަކުން ގެއްލިގެން ހޯދަމުން ދިޔަ 12 ފޫޓުގެ ހަރުފައެއް (ޕައިތަން އެއް)، ބޭޓޮން ރޫޖްގެ ޝޮޕިން މޯލެއް ތެރެއިން ފެނިއްޖެއެވެ.
"ކާރާ" ނަމަކަށް ކިޔާ އެ ބުރްމީސް ޕައިތަން ލޫޒިއާނާގެ "ބްލޫ ޒޫ އެކުއޭރިއަމް" އިން ގެއްލުނީ މިދިޔަ އަންގާރަ ދުވަހުގެ ހެނދުނުގެ ވަގުތެއްގައެވެ. އެ ހަރުފަ ގެއްލިގެން އެތަން ވަނީ ދެ ދުވަސް ވަންދެން ވަގުތީ ގޮތުން ބަންދު ވެސް ކޮށްފައެވެ. ހަރުފަ ފެނިފައި ވަނީ އޭތި ގެއްލިގެން ހޯދަމުން ދިޔަތާ ދެ ދުވަސް ފަހުންނެވެ.
ގެއްލިގެން ހޯދަމުން ދިޔަ އެ ހަރުފަ ފެނުނު މަންޒަރު ދައްކުވައިދޭ ވީޑިއޯއެއް މިހާރު ވަނީ މީސް މީޑިއާގައި ދައުރުވާން ފަށައިފައެވެ. އެ ވީޑިއޯއިން ފެންނަ ގޮތުގައި ރީނދޫ ކުލައިގެ އެ ހަރުފަ ފެނިފައި ވަނީ ޝޮޕިން މޯލްގެ ފާރެއްގެ ތެރެއިންނެވެ.
ބްލޫ ޒޫ އެކުއޭރިއަމްގެ ޗީފް މާކެޓިންގް އޮފިސަރ ރޮންޑާ ސްވޭންސަން ބުނީ އެ ހަރުފަ ފެނުނީ، އޭތި ގެއްލިގެން ހޯދުމަށް ހަވާލުކުރި ޖަނަވާރުން ޓްރެކްކުރާ ތަޖުރިބާކާރުންނަށް ކަމަށެވެ. އެމީހުންނަށް ކާރާ ފެނުނީ ސީލިން އޭރިއާގެ ފާރުން ކަމަށް ވެސް ބުންޏެވެ.
ކާރާއަކީ ވިހަ ލާ ވައްތަރުގެ ހަރުފައެއް ނޫން ކަމަށާއި އޭގެ ސަބަބުން އެއްވެސް އިންސާނަކަށް ނުރައްކަލެއް ނެތް ކަމަށް ވެސް ސްވޭންސަން ބުންޏެވެ.
