ރައީސް ޞާލިޙަކީ އެންމެ ގިނަ ވޯޓް ހޯއްދެވި ރައީސް، ސިޔާސީ ގޮތުން މަރައެއް ނުލެވޭނެ: ސަޢުދު
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަކީ މިހާތަނަށް އެންމެ ގިނަ ވޯޓް ހެއްދެވި ރައީސް ކަަމަށާއި އެމަނިކުފާނު ސިޔާސީ ގޮތުން މަރައި ނުލެވޭނެ ކަމަށް ވިލިނގިލި ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.
ސައުދު މިހެން ވިދާޅުވެފައި ވަނީ އެމްޑީޕީގެ ރައީސް، ރައީސް ނަޝީދު މިއަދު އެމްޑީޕީގެ އިސް ބޭފުޅުން ތިއްބަވާ ވަޓްސްއެޕް ގްރޫޕަކަށް ފޮނުއްވި މެސެޖުތަކެއްގައި ރައީސް ޞާލިޙާ ޚިޔާލު ތަފާތު ވެފައިވާކަން ހާމަކޮށްފައިވާ ދަނޑިވަޅެއްގައެވެ.
ރައީސް ޞާލިޙް ޓެގް ކުރައްވަވައި ކުރެއްވި ޓްވީޓެއްގައި ސަޢުދު ވިދާޅުވީ، ދައުރު ދެބައި ވީތަނުން ރައީސުލް ޖުމްހޫރިއްޔާ ކޯނާކޮށް، ސިޔާސީ ގޮތުން މަރައިލާން އުޅުނަސް އިރާދަ ކުރެއްވިއްޔާ އެކަމެއް ނުވާނެ ކަމަށެވެ.
"ރައީސް އިބްރާހީމް މުޙާއްމަދު ޞާލިޙަކީ ޤާނޫން އަސާސީގެ ފަހުން މިހާތަނަށް ރައްޔިތުންގެެ އެންމެ ގިނަ ވޯޓް ހޯއްދަވައިގެން އިންތިޚާބު ފުރަތަމަ ބުރުން ކާމިޔާބު ކުރެއްވި ހަމައެކަނި ލީޑަރު. ދައުރު ދެބައި ވީތަނުން ރައީސުލް ޖުމްހޫރިއްޔާ ކޯނާކޮށް، ސިޔާސީ ގޮތުން މަރާލަން އުޅުނަސް އިރާދަ ކުރެއްވިއްޔާ އެކަމެއް ނުވާނެ." ސައުދުގެ ޓްވީޓްގައި ވިދާޅުވިއެވެ.
އެމްޑީޕީގެ ވަޓްސް އެޕް ގްރޫޕްއަކަށް ރައީސް ނަޝީދު ފޮނުއްވި މިއަދު ފޮނުއްވި މެސެޖެއްގައި ވިދާޅުވެފައި ވަނީ ރައީސް ޞާލިހްއާ އެއްވެސް މައްސަލައެއް ނުޖެހޭ ކަމަށާއި ނުވެސް ޖެހޭނެ ކަމަށެވެ. ނަމަވެސް އެމަނިކުފާނާއި ރައީސް ޞާލިޙް މިހާރު ފިކުރީ ގޮތުން ޚިޔާލު ތަފާތު ކަމަށް ވެސް ރައީސް ނަޝީދު ވިދާޅުވިއެވެ.
"އަޅުގަނޑުމެންގެ ޒާތީ ކަންކަމުގައި އަބަދުވެސް އުޅޭނީ އެކީގައި، އަޅުގަނޑުގެ ދަރިންގެ އިބޫ ދޮންބެ އެއީ. އެކަމަކު ދެން ރައީސުލްޖުމްހޫރިއްޔާއާ އެކީ ސިޔާސީ ގޮތުން ހުރެވޭކަށް ނެތް" ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ އެމްޑީޕީގެ ބައެއް ބޭފުޅުން ހިތްހަމަ ނުޖެހުނަސް ކުރާނެ ކަމެއް ނެތް ކަމަށާއި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްއާއި ޕީޕީއެމްއިން މެދުމިނުގެ ދީނީ ސިޔާސަތަށް ތާއީދު ކުރައްވާ ނަމަ އެމަނިކުފާނު އެބޭފުޅުންގެ އެހީއަށް އެދިލައްވާނެ ކަމަށެވެ.
