ރައީސް ނަޝީދަށް ހަމަލާދޭން އިރުޝާދުދިން މީހާ ހައްޔަރު ކޮށްފި
މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް މެއި 6ވަނަ ދުވަހު ދިން ހަމަލާ ދޭން އިރުޝާދު ދިން މީހާ ހައްޔަރުކޮށްފިއެވެ.
މިހާރު ކުރިޔަށްދާ ނޫސްވެރިންގެ ބައްދަލުވުމެއްގައި ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ ހައްޔަރުކޮށްފައި ވަނީ، ހއ. ހޯރަފުށީ އަލަނާސިގޭ މުހައްމަދު ތަސްނީމް ކަމަށެވެ.
މިމީހާއަކީ 2017 ވަނަ އަހަރު ބޮމެއް ހަދަމުން ދަނިކޮށް އޭޕްރީލް 24 ވަނަ ދުވަހު ހައްޔަރުކޮށްފައިވާ މީހެއް ކަމަށާއި 4 އޮކްޓޯބަރު 2018 ގައި އޭނާގެ މައްސަލަ ޝަރީއަތަށް ހުށަހަޅައިފައި ވަނިކޮށް ދޫކޮށްލައިފައިވާ ކަމަށް ވެސް ސީޕީ ހަމީދު ވިދާޅުވިއެވެ.
ތަސްނީމް ވަނީ ރައީސް ނަޝީދު އިސްލާމް ދީނުން ބޭރުވެ މުރުތައްދު ވެފައިވާކަން ކަނޑައަޅައި ރައީސް ނަޝީދަކީ މަރައިލާން ޖެހޭ މީހެއްކަމަށް ބުނެ އެކަމަށް ވަކާލާތުކޮށްފައި ކަމަށް ވެސް ސީޕީ ވިދާޅުވިއެވެ. އަދި ހަރުކަށި ފިކުރަށް މީހުން ވައްދާ ސެލް އޮޕަރޭޓް ކުރަންވީ ގޮތް ކިޔައިދީ އެކަމާ ބެހޭ ވީޑިޔޯއާއި ފޮތްތައް ބެހި މީހަކީ ވެސް ތަސްނީމްކަމަށް ސީޕީ ވިދާޅުވިއެވެ.
ސީޕީ ވިދާޅުވީ ރައީސް ނަޝީދަށް ހަމަލާދިން މައްސަލައިގައި މިހާތަނަށް 640 މީހުންނަށް ވުރެ ގިނަ މީހުންނާ ސުވާލުކޮށް، 218 މީހުންގެ ބަޔާން ނަގައިފައިވާ ކަމަށެވެ.
މީގެ އިތުރުން ފިހާރަތަކާއި ގޭގޭގައި ހަރުކޮށްފައި ހުރި 109 ސީސީޓީވީ ފުޓޭޖު ތަހުގީގުގައި ބެލި ކަމަށާއި އޭގެ އިތުރުން މާލެއާއި ހުޅުމާލޭގައި ފުލުހުން ހަރުކޮށްފައިވާ 370 ކެމެރާއެއް ވެސް ބެލި ކަމަށް ސީޕީ ވިދާޅުވިއެވެ.
