ބޭރުގެ ސިފައިން ރާއްޖޭގައި ތިބުމުގެ ފުރުސަތެއް ނުދޭނަން: ނާޒިމް
މޯލްޑިވްސް ނެޝަނެލް ޕާޓީ (އެމްއެންޕީ)ގެ ވެރިކަމެއްގައި ބޭރު ޤައުމެއްގެ ސިފައިން ބޭތިއްބުމުގެ ހުއްދަ ނުދެއްވާނެ ކަމަށް އެ ޕާޓީގެ ފައުންޑަރ ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް ވިދާޅުވެއްޖެއެވެ.
މޯލްޑިވްސް ނެޝަނެލް ޕާޓީން މިއަދު ބޭއްވި ނޫސްވެރިންގެ ބައްދަލުވުމެއްގައި ނާޒިމް ވިދާޅުވީ، އެ ޕާޓީގެ ވެރިކަމެއްގައި ދިވެހި ރާއްޖޭގެ ޤައުމިއްޔަތާއި އިސްތިޤްލާލަށް ބުރު އަރާ އެއްވެސް ކަމެއް ނުކުރާނެ ކަމަށެވެ.
އިންޑިއާގެ ސިފައިން ރާއްޖޭގައި ތިބޭ ތިބުމަށް ރައްޔިތުންގެ ކަންބޮޑުވާ ކަމަށާއި މިކަމުގައި އެ ޕާޓީގެ ސްޓޭންޑަކީ ކޮބައިތޯ ސުވާލު ކުރުމުން ނާޒިމް ވިދާޅުވީ، ބޭރުގެ އެއްވެސް ޤައުމެއްގެ ސިފައިން ތިބުމުގެ ފުރުސަތު ނުދެއްވާނެ ކަމަށެވެ. އަދި ދިވެހިންގެ ބިމުން ބޭރުގެ ބަޔަކަށް އެންމެ އިންޗިއެއް ވެސް ނުދެއްވާނެ ކަަމަށް ވެސް ނާޒިމް ވިދާޅުވިއެވެ.
"އަޅުގަނޑުމެންގެ ސަރުކާރެއްގައި ދިވެހި ބިމުން އެންމެ އިންޗިއެއް ވެސް ބޭރުގެ ބަޔަކަށް ދިނުމުގެ ފުރުސަތެއް ނުދޭނަން... ރާއްޖޭގައި އަޅުގަނޑުމެންގެ ސަރުކާރެއްގައި ބޭރުގެ އެއްވެސް ޤައުމެއްގެ ސިފައިންނަށް ތިބުމުގެ ފުރުސަތެއް ނުދޭނަން، މިކަމަކީ ވާހަކަދެކެވި ނިންމެވިފައިވާ" ނާޒިމް ވިދާޅުވިއެވެ.
ރައީސް ޑރ. މުހައްމަދު ވަހީދު ހަސަން މަނިކާއި ރައީސް އަބްދުﷲ ޔާމީންގެ ސަރުކާރުގައި ޑިފެންސް މިނިސްޓަރުކަން ވެސް ކުރެއްވި ނާޒިމް ވިދާޅުވީ، އެ ބޭފުޅުންގެ ވެރިކަމެއްގައި ގެންގުޅުއްވާނީ "ރާއްޖެ ފަސްޓް" ޕޮލިސީ ކަމަށާއި އެކަމާ ފުށުއަރާ އެގްރީމެންޓްތައް ބާތިލު ވާނެ ކަމަށެވެ. އަދި ދިވެހިންނަށް ފައިދާ ވާގޮތަށް ނޫން ގޮތަށް ހުރި އެގްރީމެންޓްތައްވެސް ބާތިލު ކުރައްވާނެ ކަމަށް ވެސް ނާޒިމް ވިދާޅުވިއެވެ.
ނާޒިމްގެ ވާހަކަފުޅުގައި އިތުރަށް ވިދާޅުވީ، އެ ޕާޓީގެ ސިޔާސަތަކީ މަގުމައްޗަށް ނުކުމެ ހަޅޭއްލަވާ މީހުންނަށް ފުރައްސާރަކޮށް ޑިޕްލޮމެޓިކް މިޝަންތަކާ ދެކޮޅަށް އަޑުގަދަ ކުރުމެއް ނޫން ކަމަށާއި އެ ޕާޓީން ބޭނުން ކުރާނީ ޑިޕްލޮމެޓިކް ގޮތްތައް ކަމަށެވެ.
