ވެރިކަމުގެ ނިޒާމް ބަދަލު ކުރުމަކީ ވަރަށް ފުންކޮށް ވިސްނަން ޖެހޭ ކަމެއް: އަސްލަމް
ރާއްޖޭގެ ވެރިކަމުގެ ނިޒާމް ބަދަލު ކުރުމަކީ ވަރަށް ފުންކޮށް ވިސްނަން ޖެހޭ ކަމެއް ކަމަށާއި އެއީކީ އަވަސް އަރުވާލައިގެން ކުރެވޭނެ ކަންކަމެއް ނޫންކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް ވިދާޅުވީ ވެރިކަމުގެ ނިޒާމް ބަދަލު ކުރުމަކީ ވަރަށް ގިނަ މަޝްވަރާތަކެއްގެ ކުރަން ޖެހޭނެކަމެއް ކަމަށާއި ރައީސް ނަޝީދު އެ ގޮތް ބޭނުންވާ ނަމަ އެކަން ފާޅުކުރުން އެއީ މައްސަލައެއް ނޫން ކަމަށެވެ.
"ރައީސް ނަޝީދު އެގޮތަށް ވިސްނަވާ ނަމަ އެކަން ފާޅުކުރުން އެއީ މައްސަލައެއް ނޫން. ނިޒާމު ބަދަލުކުރުމުގެ މައްސަލައަކީ ބަޔަކު ބޭނުން ވުމުން ކުއްލިއަކަށް ކޮށްލާ ވަރަށް ވުރެ ރައްޔިތުންނާ މާބޮޑަށް ވެސް ގުޅިފައިވާ ގައުމީ މައްސަލައެއް" އަސްލަމް ވިދާޅުވިއެވެ.
ވެރިކަން ހިނގުމުގެ ނިޒާމު ބަދަލު ކުރުމުގެ ވާހަކަތަކުގެ އަޑު ގަދަވެފައިވާ މިދަނޑިވަޅުގައި އަސްލަމް ވިދާޅުވީ ވެރިކަމުގެ ނިޒާމު ބަދަލު ކުރުމުގެ މަޝްވަރާތައް ފުރަތަމަ ޕާޓީ ލެވަލްގައި ކަމަށާއި ކުރިއަށް ދާންވާނީ އެއަށް ފަހުގައި ކަމަށެވެ. މިފަދަ ބޮޑެތި ނިންމުންތަކަށް އިދިކޮޅު ފަރާތްތަކުގެ ހިޔާލުވެސް އަދި މަޝްވަރާ ވެސް ވަރަށް މުހިންމު ކަމަށެވެ.
ރާއްޖޭގެ ވެރިކަމުގެ ނިޒާމް ރިޔާސީ ނިޒާމުން ބަރުލަމާނީ ނިޒާމަށް ބަދަލުކުރަން ބޭނުންވާކަމަށާއި އެކަމަށް މަސައްކަތް ކުރައްވާނެކަމަށް ކުރީގެ ރައީސް އަދި ރައްޔިތުންގެ މަޖިލީސް މުހައްމަދު ނަޝީދު ވަނީ ވިދާޅުވެފައެވެ. އެހެން ނަމަވެސް ރާއްޖޭގައި ބަރުލަމާނީ ނިޒާމެއް އޮންނަން ޖެހޭނެ ކަމަށް ގަބޫލުފުޅު ނުކުރައްވާ ކަމަށާއި ރާއްޖޭގައި ބޮޑު ވަޒީރަކު ހުންނަން ޖެހޭނެކަމަށް ވެސް ގަބޫލުފުޅު ނުކުރައްވާކަމަށް ކުރީގެ ރައީސް ، ރައީސް މައުމޫން އަބްދުލް ގައްޔޫމް ވަނީ ވިދާޅުވެފައެވެ.
