ކޮވިޝީލްޑް ވެކްސިންގެ ފުރަތަމަ ޑޯޒް ޖަހައިފައި ތިބި މީހުންނަށް ދެވަނަ ޑޯޒަކަށް އެސްޓްރާޒެނެކާ ދެނީ
ކޮވިޑް-19އިން ރައްކާތެރިވުމަށް ކޮވިޝީލްޑް ވެކްސިންގެ ފުރަތަމަ ޑޯޒް ޖަހައިފައި ތިބި މީހުންނަށް، ދެވަނަ ޑޯޒެއްގެ ގޮތުގައި އެސްޓްރާޒެނެކާ ވެކްސިން ޖެހިދާނެ ކަމަށާއި ކޮވިޝީލްޑް ވެކްސިންގެ ފުރަތަމަ ޑޯޒް ޖަހައިފައި ތިބި މީހުންނަށް ދެވަނަ ޑޯޒަކަށް ދޭނީ އެސްޓްރާޒެނެކާ ވެކްސިން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ވިދާޅުވެއްޖެއެވެ.
ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ގެ ފަރާތުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި އިމުނައިޒޭޝަން ޕްރޮގްރާމްގެ އޮފިސަރ ނާޝިއާ އަބްދުލްޣަފޫރު ވިދާޅުވީ، އެސްޓްރާޒެނެކާގެ ސްޓޮކް މިހާރު ލިބިފައިވާއިރު، ކޮވިޝީލްޑްގެ ފުރަތަމަ ޑޯޒް ޖަހައިފައި ތިބި މީހުންނަށް ވެސް މި ވެކްސިން ދެވޭނެ ކަމަށެވެ.
މި ބައްދަލުވުމުގައި މައުލޫމާތު ދެއްވަމުން މޯލްޑިވްސް ޓެކްނިކަލް އެޑްވައިޒަރީ ގްރޫޕްގެ ފަރާތުން ޑރ. ނަޒްލާ މުސްތަފާ ވިދާޅުވީ އޯޑަރ ކުރި އެސްޓްރާޒެނެކާ ވެކްސިންގެ ސްޓޮކް މިހާރު ވަނީ ލިބިފައި ކަމަށެވެ.
"ކޮވިޝީލްޑް ފުރަތަމަ ޑޯޒް ޖަހައިފައި ތިބި މީހުންނަށް ދެވަނަ ޑޯޒެއްގެ ގޮތުގައި ވެސް މި ވެކްސިން ޖެހޭނެ. ދުނިޔޭގެ ސިއްހަތު ޖަމިއްޔާއިން ވެސް އަދި އަޅުގަނޑުމެންގެ ޓެކްނިކަލް އެޑްވައިޒަރީ ގްރޫޕުން ވެސް ބަލާ ގޮތުގައި މިއީ ހަމަ އެއްކަހަލަ ވެކްސިނެއް. އެހެންވީމަ ކޮވިޝީލްޑް ޖެހި ކަމަށް ވިޔަސް ދެވަނަ ޑޯޒްގެ ގޮތުގައި އެސްޓްރާޒެނެކާ ޖެހޭނެ" ޑރ. ނަޒްލާ މުސްތަފާ ވިދާޅުވިއެވެ.
ޑރ. ނަޒްލާ މުސްތަފާ ވިދާޅުވީ ކުރިއަށް އޮތް ވެކްސިން ޕްރޮގްރާމުގައި ވެކްސިން ޖަހަނީ 18 އަހަރުން މަތީގެ މީހުންނަށް ކަމަށާއި ވެކްސިން ޖެހުމަކީ މުހިންމު ކަމެއް ކަމަށާއި އާންމުންގެ ހޭލުންތެރިކަމާ އެއްބާރުލުން ލިބުމަކީ މުހިންމު ކަމެއް ކަމަށެވެ.
ރަށްރަށުގައި އެސްޓްރާޒެނެކާގެ ފުރަތަމަ އަދި ދެވަނަ ޑޯޒް ޖަހަން އިއްޔެ ވަނީ ފެށިފައެވެ. އަދި މި މާލެ ސަރަހައްދުގައި މި ވެކްސިން ދޭން ފަށާނީ އަންނަ ހޮނިހިރު ދުވަހުން ފެށިގެން ކަމަށް އެޗްއީއޯސީން ބުނެފައިވެއެވެ.
