ރޮޒައިނާ ނަޝީދަށް: އެހެން ޕާޓީތަކާ އެކު މަސައްކަތް ނުކުރެވޭ މީހަކަށް ބަރުލަމާނީ ނިޒާމެއްގައި ވެސް މަސައްކަތެއް ނުކުރެވޭނެ
ރިޔާސީ ނިޒާމެއްގައި ކޯލިޝަން ވެރިކަމެއް ނުކުރެވުނު ފަރާތަކަށް ބަރުލަމާނީ ނިޒާމެއްގައި ވެސް މަސައްކަތް ކުރެވިދާނެކަމަށް ގަބޫލު ނުކުރައްވާކަމަށާއި ބަރުލަމާނީ ނިޒާމަކީ ވެސް ކޯލިޝަނާ ވަރަށް ބޮޑަށް ގުޅިފައިވާ ނިޒާމެއްކަމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ސަންގު ޓީވީގެ "ހަބަރަށް ފަހު" ޕްރޮގްރާމްގައި ވާހަކަދައްކަވަމުން ރޮޒައިނާ ވިދާޅުވީ ރައްޔިތުން ވޯޓްލައިގެން ރިޔާސީ ނިޒާމު ބަލައިގަނެފައިވާ ކަމަށާއި ރިޔާސީ ނިޒާމު މަސައްކަތް ނުކުރީއޭ ބުނާހާ ދުވަހެއް އަދި ނުވާ ކަމަށެވެ. އަދި ރާއްޖޭގައި މިވަގުތު މިއޮތީ ނިޒާމު ބަދަލު ކުރަން ޖެހޭ ހާލަތެއް ނޫންކަމަށް ވެސް ރޮޒައިނާ ވިދާޅުވިއެވެ.
"ރިޔާސީ ނިޒާމެއް މަސައްކަތް ނުކުރީއޭ ބުނާހާ ދުވަހެއް އަދި ނުވޭ. ކޯލިޝަންއެއްގައި އެހެން ޕާޓީތަކާ އެކު މަސައްކަތް ނުކުރެވުނު މީހަކަށް ބަރުލަމާނީ ނިޒާމްގައި މަސައކަތް ކުރެވިދާނެކަމަކަށް ގަބޫލެއް ނުކުރެވޭ. ރާއްޖޭގައި މިއީކީ ނިޒާމް ބަދަލުކުރަންޖެހޭ ހާލަތެއް ނޫން އަޅުގަނޑުމެން އަދި ރިޔާސީ ނިޒާމް ފެއިލްވީކަމަށް ނިންމާ ހިސާބަކަށް ނުދެޔޭ. ރައްޔިތުންނަށް ރައްޔިތުންގެ ވެރިމީހާ ހޮވުމުގެ ވޯޓު އެއީ ވަރަށް މުހިންމު ހައްގެއް." ރޮޒައިނާ ވިދާޅުވިއެވެ.
ރޮޒައިނާ ވިދާޅުވީ މައްސަލަ އުޅެނީ ކޯލިޝަންގައި ނޫން ކަމަށާއި މައްސަލައަކީ އެންމެން ވެސް ވެރިކަން ބޭނުންވުން ކަމަށެވެ. އެހެން ނަމަވެސް މިފަސް އަހަރު ނިމެންދެން މަޑުކޮށްލުމަށް ރައީސް ނަޝީދުގެ އަރިހުން އެދޭކަމަށް ރޮޒައިނާ ވިދާޅުވިއެވެ.
"މިއުޅެނީކީ އަޅުގަނޑެއް ގަބޫލެއް ނުކުރަން ކޯލިޝަންގެ މައްސަލައެއް ކަމަކަށް ވެސް އެހެން މައްސަލައެއް ކަމަކަށް ވެސް ، ތަކުރާރުކޮށް ވިދާޅުވެއްޖެ ތިމަންނަ މިއުޅެނީ ޕްރައިމް މިނިސްޓަރަށް ވާން ބޭނުންވެގެންނޭ. ތިމަންނަ އެމްޑީޕީގެ ޕްރައިމަރީއެއްގައި ކުރިމަތިލާނަމޭ. އެހެންވީމަ އެމަސައްކަތްތައް އަޅުގަނޑު ހަމަ އާދޭހާ އެކު ދަންނަވާލަން ބޭނުން ވަނީ މަޑު ޖައްސާލާށޭ މި ފަސް އަހަރު ނިމެންދެން." ރޮޒައިނާ ވިދާޅުވިއެވެ.
އިތުރަށް ވާހަކަ ދައްކަވަމުން އޭނާ ވިދާޅުވީ ޕާޓީ ހަލާކުވެގެން އެއްވެސް މީހަކަށް ވާނެ ފައިދާއެއް ނޯންނާނެ ކަމަށެވެ. އަދި އެމްޑީޕީއަށް ލިބޭ ކާމިޔާބީއަކީ ޕާޓީގެ ހުރިހާ މެމްބަރުންނަށް ލިބޭ ހައްގެއް ކަމަށާއި މިވެރިކަން އައިސްފައި މިއޮތީ އެމްޑީޕީގެ އާއްމު މެމްބަރުންގެ ވަރަށް ގިނަ މަސައްކަތުން ކަމަށެވެ.
