ހުޅުމާލޭ ކޮވިޑް-19 ފެސިލިޓީގައި ބަލިމީހަކު ނެތި ހުހަށް
ހުޅުމާލޭގައި ހުންނަ ހުޅުމާލެ މެޑިކަލް ފެސިލިޓީ (އެޗްއެމްއެފް)ޤާއިމް ކުރި ފަހުން ފުރަތަމަ ފަހަރަށް އެ ފެސިލިޓީގައި ކޮވިޑް-19 ބަލި ޖެހިފައިވާ އެއްވެސް މީހަކަށް ފަރުވާ ދެމުން ނުދާ ކަމަށް ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ) ވިދާޅުވެއްޖެއެވެ.
މިކަމާ ގުޅިގެން "ދެން"އިން އެޗްއީއޯސީގެ އޮފިޝަލަކާ ސުވާލު ކުރުމުން ވިދާޅުވީ، މިރޭ 8 ޖެހިއިރު އެންމެ ފަހުން ފަރުވާ ދެމުން ދިޔަ ޕޭޝިއަންޓްގެ ހާލު ރަނގަޅުވުމުން ދޫކޮށްލައިފައިވާ ކަމަށެވެ. މިހާރު މާލޭގައި ކޮވިޑް-19 ފަރުވާ ދެމުންދަނީ ދެ މީހުންނަށް ކަމަށް އޮފިޝަލް ވިދާޅުވިއެވެ. އެއީ ދަރުމަވަންތަ ހޮސްޕިޓަލުގައި ފަރުވާ ދެމުންދާ ދެ މީހުންނެވެ.
ހުޅުމާލޭ ކޮވިޑް-19 ފެސިލިޓީ ޤާއިމްކޮށްފައި ވަނީ މިދިޔަ އަހަރު ޖޫން މަހުގެ ތެރޭގައެވެ. ކޮވިޑް-19 ހަތަރު ވަނަ ރާޅާ އެކު އެތަނުގައި ފަރުވާ ހޯދަމުން ދިޔަ ގިނަ ބަޔަކު ނިޔާވެފައި ވެސް ވެއެވެ.
މުޅި ރާއްޖޭގެ ކޮވިޑް ނަމްބަރުތަކަށް ބަލާއިރު، މިއަދު އިރުއޮއްސި 6އާ ހަމައަށް 12 މީހަކަށް އަތޮޅު ތެރޭގައި ފަރުވާ ދެމުން އެބަދެއެވެ. އަދި މިދިޔަ 24 ގަޑިއިރުގެ ތެރޭގައި ރާއްޖެއިން ކޮވިޑް-19އަށް 108 މީހުން ފައްސިވެފައި ވެއެވެ.
