ހުޅުމާލޭ ކޮވިޑް-19 ފެސިލިޓީގައި ބަލި މީހަކު ނެތުމަކީ ސަރުކާރުގެ ހަރުދަނާ ސިޔާސަތުތަކުގެ ނަތީޖާ

ހުޅުމާލޭ ކޮވިޑް-19 ފެސިލިޓީގައި ފަރުވާ ދެމުންދާ ބަލި މީހަކު ނެތުމަކީ ސަރުކާރުން ގެންގުޅުނު ހަރުދަނާ ސިޔާސަތުތަކުގެ ނަތީޖާ ކަމަށް ބާރަށު ދާއިރާގެ މެމްބަރު އަޙްމަދު އަބްދުﷲ ވިދާޅުވެއްޖެއެވެ.

މިއަދު ކުރެއްވި ޓްވީޓެއްގައި އަޙްމަދު އަބްދުﷲ ވިދާޅުވީ، މިއަދު ރާއްޖޭގެ ކޮވިޑް-19 ހާލަތު ރަނގަޅުވެފައި ވަނީ ސަރުކާރު ހަރުދަނާ ސިޔާސަތުތަކުގެ ސަބަބުން ކަމަށެވެ. އަދި ކުރިޔަށް އޮތީ އުފާވެރި ދުވަސްތަކެއް ކަމަށް ވެސް އޭނާ ވިދާޅުވިއެވެ.

ހުޅުމާލޭގައި ހުންނަ ހުޅުމާލެ މެޑިކަލް ފެސިލިޓީ (އެޗްއެމްއެފް)ޤާއިމް ކުރި ފަހުން ފުރަތަމަ ފަހަރަށް އެ ފެސިލިޓީގައި ކޮވިޑް-19 ބަލި ޖެހިފައިވާ އެއްވެސް މީހަކަށް ފަރުވާ ދެމުން ނުދާ ކަމަށް ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ) ރޭ ވަނީ ހާމަކޮށްފައެވެ. ހުޅުމާލޭ ކޮވިޑް-19 ފެސިލިޓީ ޤާއިމްކޮށްފައި ވަނީ މިދިޔަ އަހަރު ޖޫން މަހުގެ ތެރޭގައެވެ.

މުޅި ރާއްޖޭގެ ކޮވިޑް ނަމްބަރުތަކަށް ބަލާއިރު، އިއްޔެ އިރުއޮއްސި 6އާ ހަމައަށް 12 މީހަކަށް އަތޮޅު ތެރޭގައި ފަރުވާ ދެމުން އެބަދެއެވެ. އަދި މިދިޔަ 24 ގަޑިއިރުގެ ތެރޭގައި ރާއްޖެއިން ކޮވިޑް-19އަށް 108 މީހުން ފައްސިވެފައި ވެއެވެ. މާލޭގައި ފަރުވާ ދެމުން ދަނީ ދެ މީހަކަށެވެ. އެއީ ދަރުމަވަންތަ ހޮސްޕިޓަލުގައި އޮތް ދެ މީހުންނެވެ.