ރައީސް ޞާލިޙް ހުރިހާ ކަމެއް ކުރުމަށް ފަހު އިލްޒާމް އެޅުވީ ރައީސް ނަޝީދުގެ ބޮލުގައި: ސައީދު
ނަފުރަތުގެ ބިލް ލާދީނީ ބިލަކަށް ބަދަލުވުމުން އެ ހުރިހާކަމެއްގެ އިލްޒާމް އެޅުވީ ރައީސް ނަޝީދުގެ އިސްތަށިފުޅުގައިކަމަށް ކުރީގެ އިކޮނޮމިކް މިނިސްޓަރ އަދި ރައްޔިތުންގެ މަޖިލީހުގެ މާވަށު ދާއިރާގެ މިހާރުގެ މެމްބަރު މުހައްމަދު ސައީދު ވިދާޅުވެއްޖެއެވެ.
ޕީޕީއެމްއަށް މެންބަރުން އިތުރު ކުރުމަށް އެ ޕާޓީން ހިންގަމުން އަންނަ ހަރަކާތުގެ ތެރެއިން ރޭ އެ ޕާޓީއާ ގުޅިވަޑައިގަތް ބޭފުޅުން ޕާޓީއަށް ސޮއި ކުރުމަށް ބޭއްވި ރަސްމިއްޔާތެއްގައި ވާހަކަ ދައްކަވަމުން ސައީދު ވިދާޅުވީ ނަފުރަތުގެ ބިލް ލާދީނީ ބިލަަކަށް ބަދަލުވި ހިސާބުން ރައީސް ޞާލިހްގެ އަމިއްލަފުޅު ބިލާ އެމަނިކުފާނު ފެޔަށް ޖެހިވަޑައިގެންފައިވާ ކަމަށާއި އެކަން އެހެން ކުރައްވަނީ އިންތިހާބު ގާތްވެފައި ވާތީ ކަމަށެވެ.
"ދެން ލާދީނީ ބިލަކަށް ނަފުރަތުގެ ބިލް ބަދަލުވީ ހިސާބުން ހަމަ ރައީސް ސޯލިހްގެ ބިލް ރައީސް ސޯލިހް ގަޔާ ދުރަށް އެ ކުޅުއްވަނީ އިމްރާންގެ ބިލު އިމްރާން ގަޔާ ދުރަށް އެ ކުޅުއްވަނީ މި ބޭފުޅުން ނުކުމެވަޑައިގެން ވިދާޅުވަން މި އުޅުއްވަނީ އިންތިހާބު ގާތްވީމަ ، ހޯ ހޯ ، ތިމަންނަމެންނަކަށް ނޭނގޭއޭ މިއަދު ސަރުކާރުން ރައީސް އިބްރާހިމް މުހައްމަދު ސޯލިހް ކުރިކަމެކޭ. އިބްރާހިމް މުހައްމަދު ސޯލިހް މިހައްދަވާ ގޮތަކީ ރައީސް ނަޝީދުގެ ބޮލަށް ހުރިހާކަމެއް ކަނޑާލާފައި އެމަނިކުފާނު ފެޔަށް ޖެހިވަޑައިގެންނެވީ." ސައީދު ވިދާޅުވިއެވެ.
ސައީދު ވިދާޅުވީ އިހްތިހާބު ގާތްވުމުން މިހެން ކަންކުރި ނަމަވެސް ސަރުކާރުގެ ކޯލިޝަނަށް ނިސްބަތްވާ ހުރިހާ ފަރާތްތަކަކީ އެއް ބައެއްކަމަށް ރައްޔިތުން ނިންމައިފައިވާ ކަމަށެވެ. އެހެންކަމުން އެކަމުން ރެކިވަޑައިގަންނަވަން ނޫޅުއްވަން ސައީދު އެދިވަޑައިގެންނެވިއެވެ.
"މިވެގެން އުޅޭ ގޮތަކީ އިންތިހާބު ކައިރިވަނީ ދަންނަވަންތޯ ރައްޔިތުން މިއަދު ނިންމައިފި ތިހުރިހާ ބޭފުޅުން ތިއްބެވީ އެއްޖާޑީގައިކަން އެއް ގޮޅީގައިކަން އެއް ކޮކްޓެއިލްއެއްކަން އެކައްޗެއްކަން. މިއަދު ތިކަމުން ރެކިވަޑައިގަންނަވަން ނޫޅުއްވާށެ. ތިބޭފުޅުން ރެކެން ކުރާ މަސައްކަތުން އިތުރަށް ވާނީ ފަލީހަތް" ސައީދު ވިދާޅުވިއެވެ،
ރޭ ޕީޕީއެމްއާ އަލަށް ގުޅިވަޑައިގެންނެވި މެމްބަރުން ސޮއި ކުރެއްވުމަށް ބޭއްވި ރަސްމިއްޔާތުގައި ސަރުކާރުގެ ކޯލިޝަނަށް ނިސްބަތް ވާ ފަރާތްތަކެއް ވަނީ އެ ޕާޓީއަށް ސޮއިކުރައްވާފައެވެ. މީގެ ތެރޭގައި ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ (މުހަންމާ)ވެސް ހިމެނިވަޑައިގަންނަވައެވެ.
