ސިޔާސީ ފިކުރުން އެއްކިބާވެ ފިކުރު ހިންގައިލުމުން ފެންނަނީ މިނިވަންކަން ގެއްލިފައިވާ މަންޒަރު: މުއިއްޒު
މިއަދު ސިޔާސީ ފިކުރުން އެއްކިބާވެ ފިކުރު ހިންގާލުމުން ފެނިގެންދަނީ މިނިވަންކަން ގެއްލިފައިވާ މިންވަރުކަމަށް މާލޭ ސިޓީގޭ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.
"މިނިވަންކަމުގެ ދިފާއުގައި ދިވެހީން"ގެ ނަމުގައި ޕްރޮގްރެސިވް ކޯލިޝަނުން އިފްތިތާހްކުރި ކެމްޕެއިން ފެށުމަށް ޕީޕީއެމުން ބޭއްވި ޖަލްސާގައި، ވާހަކަދައްކަވަމުން ޑރ. މުއިއްޒު ވިދާޅުވީ ސިޔާސީ ފިކުރުން އެއްކިބާވެ ވިސްނާލުމުން ފެނިގެންދަނީ ކަންކަން ނިންމުމުގެ ބާރު އަތުން ދޫވެފައިވާ މަންޒަރު ކަމަށެވެ.
"އަޅުގަނޑުމެންގެ ސިޔާސީ ފިކުރުތައް އެއްކިބާ ކޮށްފައި ވިސްނާލީމާ ދެބަސް ނުވެވޭ ގޮތެއްގައި ފެންނަ މަންޒަރަކީ އަޅުގަނޑުމެންގެ އަތް މައްޗަކު ނެތް އަޅުގަނޑުމެންގެ ކަންކަން ނިންމުމުގެ ބާރެއް. ހަގީގަތުގައި މިހާރު އަޅުގަނޑުމެން ގުޅުން ބާއްވަންވީ ކޮންބަޔަކާތޯ ނުވަތަ ގުޅުން ގާއިމް ނުކުރަންވީ ކޮން ބަޔަކާތޯ އަޅުގަނޑުމެން މަޝްރޫއުތައް ހިންގަންވީ ކޮންތަނަކުން ލޯނު ނަގައިގެންތޯ އަޅުގަނޑުމެންގެ ކަންކަން ނިންމުމުގައި އަޑުއަހަންވީ ކޮންބައެއްގެތޯ މިހާރު ނިންމަން ޖެހެނީ ނިންމަން މަޖުބޫރުވެފައި ވަނީ އަޅުގަނޑުމެން އަމިއްލައަތްތޯ ނޫނިއްޔާ އަޅުގަނޑުމެންގެ އަތްދަށުން މިހާރު ވަނީ އެކަން ގޮސްފައިތޯ" ޑރ. މުއިއްޒު ވިދާޅުވިއެވެ.
މޭޔަރ ވިދާޅުވީ މިނިވަން ކަމުގެ ދިފާއުގައި ނުކުތުމަކީ މިހާރު ގައުމީ ވާޖިބެއް ކަމަށާއި މިކަމުގައި މާލޭ ރައްޔިތުންނަކީ ފަޙުރުވެރިކަމާ އެކު އިސްނަގަން ޖެހޭ ބައެއް ކަމަށެވެ. އަދި އެކަމުގެ ސަބަބަކީ މާޒީގައި މިނިވަންކަން ގެއްލުނު ކޮންމެ ފަހަރަކު އެ މިނިވަންކަން ހޯދުމުގައި ޖިހާދުތައް ހިނގައިފައި ވަނީ މާލޭގައި ކަމަށްވުން ކަމަށް އެ މަނިކުފާނު ވިދާޅުވިއެވެ.
މީގެ އިތުރުން އޭނާ ވިދާޅުވީ ވަގުތު ފާއިތު ނުވަނީސް ގައުމުގެ އެންމެ ބޮޑު ރައުސްމާލު ކަމުގައިވާ މިނިވަންކަން އަތުން ގެއްލި ނުދަނީސް ރައްޔިތުން ލޯ ހުޅުވަން ޖެހޭ ކަމަށާއި މިއަދު އެކިއެކި ނަންނަމުގައި އަޅުގަނޑުމެންގެ މިނިވަންކަންއަ ތުން ދާތަން ފެނިގެންދާކަމަށެވެ.
"މިއަދު އެކިއެކި ނަންނަމުގައި އަޅުގަނޑުމެންގެ މިނިވަންކަން އަޅުގަނޑުމެންގެ އަތުން ދާތަން ފެނިގެން މިދަނީ މިސާލަކަށް ދަންނަވަނީ ނަމަ އެކިކަހަލަ މަޝްރޫއުތަކުގެ ނަމުގައި އަޅުގަނޑުމެންގެ މި މާލެއާ ކައިރިން ބަލާ ނަމަވެސް ބުރިޖެއް އެޅުމުގެ ނަމުގައި ކަމަށްވިޔަސް އުތުރު ތިލަފަޅުގެ ނަމުގައި ކަމަށް ވިޔަސް ނޫނިއްޔާ ބޯޓެއް އެޅުމުގެ ނަމުގައި ކަމަށް ވިޔަސް. ދުރަށް ބަލާނަމަ ހަނިމާދޫ އެއާޕޯޓު ހެދުމުގެ ނަމުގައި ވިޔަސް އައްޑޫ ގަމުގައި ޕޮލިސް އެކަޑަމީ ހެދުންކަމުގައި ވިޔަސް ކިޔާނެކަމެއް ނެތް މިއިން ކޮންމެ މަޝްރޫއެއްގެ ތެރެއިން ވިސްނާލައިފި ނަމަ ފެންނަން އޮތީ ހަމަ އެންމެ ކަމެއް" އޭނާ ވިދާޅުވިއެވެ.
"މިނިވަންކަމުގެ ދިފާއުގައި ދިވެހީން" ގެ ނަމުގައި އިފްތިތާހްކުރި އެ ކެމްޕެއިން ފެށުމަށް ޕީޕީއެމުން ބޭއްވި ޖަލްސާގައި، އިދިކޮޅު ކޯލިޝަނަށް ނިސްބަތްވާ ފަރާތްތަކުން ވަނީ ވާހަކަ ދައްކަވައިފައެވެ. އަދި އެ ކޯލިޝަނަން ނިސްބަތްވާ ގިނަ މެމްބަރުން ވަނީ މިއިވެންޓްގައި ބައިވެރިވެފައެވެ.
