އެމްޑީޕީއަށް ޕީޕީއެމްއާ އެކު މަސައްކަތް ކުރުމުގެ ދައުވަތު ނުދިން ސަބަބު އަދުރޭ ހާމަކުރައްވައިފި
އިދިކޮޅު ޕްރޮގްރެސިވް ކޯލިޝަނުން ފަށައިފައިވާ "މިނިވަންކަމުގެ ދިފާޢުގައި ، ދިވެހީން" ކެމްޕެއިންގެ ދައުވަތު އެމްޑީޕީއަށް ރަސްމީކޮށް ނުފޮނުވި ސަބަބު، އެ ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ ހާމަކުރައްވައިފިއެވެ.
ސަރުކާރު ހިިންގާ ކޯލިޝަންގައި ހިމެނޭ ޖުމްހޫރީ ޕާޓީ އާއި އަދާލަތު ޕާޓީ އާއި އެމްއާރުއެމްގެ އިތުރުން އަޙްމަދު ސިޔާމްގެ އެމްޑީއޭ އަށް މިއަދު ޕީޕީއެމްއިންވަނީ އެ ޕާޓީގެ ހަރަކާތާ ގުޅުމަށް ރަސްމީކޮށް ދަޢުވަތު ދެއްވާފައެވެ.
އެމްޑީޕީއަށާއި އެޕާޓީގެ ލީޑަރުން ކަމުގައިވާ ރައީސް އިބްރާހީމް މުޙައްމަދު ޞާލިޙަށާއި ރައީސް ނަޝީދަށް ދަޢުވަތު ނުދެއްވީ ކީއްވެގެންތޯ "ދެން" އިން ސުވާލު ކުރުމުން އަދުރޭ ވިދާޅުވީ، އެ ބޭފުޅުންނަށް ދަޢުވަތު ނުދިނީ މިއީ މިިނިވަންކަން ދިފާޢުގައި ކުރާ މަސައްކަތަކަށް ވެފައި، މިނިކަންކަން ގެއްލުވައިލުމަށް އެންމެ ބޮޑަށް މަަސައްކަތް ކުރައްވަނީ ރައީސް ނަޝީދުއާއި ރައީސް ޞާލިޙް ކަމުގައިވާތީއެވެ.
"އަޅުގަނޑުމެން ޤަބޫލުކުރަނީ ދިވެހި ރާއްޖޭގެ މިނިވަންކަން ގެއްލުވާލަން އެންމެ ގަދައަށް މަސައްކަތް ކުރާ ބޭފުޅުންނަކީ އެއީ ކަމަށް." އަދުރޭ ވިދާޅުވިއެވެ.
އަދުރޭ މިހެން ވިދާޅުވި ނަމަވެސް، "މިނިވަންކަމުގެ ދިފާޢުގައި- ދިވެހީން"ގެ ނަމުގައި އިދިކޮޅުން ކުރިޔަށް ގެންދާ ޖަލްސާ އިފްތިތާޙްކޮށްދެއްވާ ވާހަކަ ދައްކަވަމުން އަދުރޭ ވަނީ ރައީސް ޞާލިހް އަދި ރައީސް ނަޝީދަށް އެކުގައި މަސައްކަތް ކުރުމުގެ ދަޢުވަތު ދެއްވައިފައެވެ.
ހުކުރު ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން އަދުރޭ ވިދާޅުވީ، މިޤައުމުގައި ވެރިކަން ކުރެއްވޭނީ ޤައުމު މިނިވަން ޤައުމެއްގެ ގޮތުގައި އޮތުމުން ކަމަށެވެ. މިހެންކަމުން ޤައުމު މިނިކަން ކުރުމަށް ކުރާ މަސައްކަތުގައި ބައިވެރިވުމަށް އަދުރޭ ވަނީ ރައީސް ނަޝީދު އަދި ރައީސް ޞާލިޙަށް ގޮވައިލައްވައިފައެވެ.
"އިބްރާހީމް މުޙައްމަދު ޞާލިޙަށް ވެސް އަޅުގަނޑު ދަންނަވާލަން ބޭނުން ވަނީ ދިވެހިރާއްޖެ މިނިވަން ކުރުމަށް މިކުރާ މަސައްކަތުގައި ބައިވެރި ވަޑައިގަންނަވާ އަޅުގަނޑުމެންނާ އެކީގައި މިހަރަކާތަށް ނިކުމެ ވަޑައިގަންނަވާށޭ. ކެނެރީގޭ މުޙައްމަދު ނަޝީދަށް ވެސް ދަންނަވާލަން ބޭނުން ވަނީ ހަމަ މިހަރަކާތަށް ނިކުމެ ވަޑައިގަންނަވާށޭ." އަދުރޭ ވިދާޅުވިއެވެ.
އަދުރޭ މިއަދު ވިދާޅުވީ، ރަސްމީކޮށް ޕީޕީއެމްއާ ގުޅުމުގެ ދަޢުވަތު ދެއްވި ހަތަރު ޕާޓީން އަދި ޖަވާބެއް ނުދެއްވާ ކަމަށެވެ.
Ads by STO
