އެސްޓްރާޒެނިކާގެ ވެކްސިން ނޮވެންބަރު މަހު މުއްދަތު ހަމަވާނެ: ނަޒްލާ
މިހާރު ރާއްޖޭގައި ޖަހަމުން އަންނަ އެސްޓްރާޒެނިކާގެ ވެކްސިންގެ ޑޯޒްތައް މިއަންނަ ނޮވެންބަރު މަހު މުއްދަތު ހަމަވާނެ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)އިން ހާމަކޮށްފިއެވެ.
އެޗްއީއޯސީ ބޭއްވި ނޫސްވެރިންގެ ބައްދަލުވުމެއްގައި އެ ސެންޓަރުގެ ތަރުޖަމާނު ޑރ.ނަޒްލާ ރަފީޤް ވިދާޅުވީ، މިހާރު އެސްޓްރާޒެނިކާ ވެކްސިން ޖަހަން ފެށިތާ ކުޑަ ދުވަސްކޮޅެއް ވެއްޖެ ކަމަށާއި އެހެން ނަމަވެސް ބޭނުންވާ ސްޕީޑްގައި ވެކްސިން ޖެހުން ކުރިޔަށް ނުދާ ކަމަށެވެ. ނަޒްލާ ވަނީ ބޭނުންވާ ވަރަށް ވެކްސިން ފުރިހަމަ ކުރަން ފަރާތްތަކުން ނާންނަކަން ފާހަގަ ކުރައްވައި އެކަމާ ކަންބޮޑުވުން ފާޅު ކުރައްވައިފައެވެ.
ނަޒްލާ ވިދާޅުވީ، މިހާތަނަށް 4،492 މީހުންނަށް އެސްޓްރަޒެނެކާ ވެކްސިންގެ ފުރަތަމަ ޑޯޒް ދެވިފައިވާކަމަށެވެ. އަދި ކޮވިޝީލްޑުގެ ދެވަނަ ޑޯޒް ނުޖެހި ތިބި މީހުންގެ ތެރެއިން 12،243 މީހުން އެސްޓްރަޒެނެކާ ވެކްސިންގެ ޑޯޒް ޖަހައިފައިވާ ކަމަށް ޑރ. ނަޒްލާ ވިދާޅުވިއެވެ.
އެސްޓްރަޒެނެކާ ވެކްސިންގެ ފުރަތަމަ ޑޯޒް ޖެހުމުގެ ކަންތައްތައް ކުރިއަށް ގެންދާނީ ސެޕްޓެމްބަރު މަހުގެ 1ވަނަ ދުވަހުގެ ނިޔަލަށެވެ. ސަރުކާރުން ވަނީ ރާއްޖޭގެ ވެކްސިން ޖެހޭ އާބާދީގެ 90 އިންސައްތަ މީހުންނަށް ކޮވިޑް-19 ވެކްސިން ފުރިހަމަ ކުރުމަށް އަމާޒު ހިފައި، ކެންޕެއިނެއް ފަށައިފައެވެ. މިގޮތުން ސަރުކާރު އޮފީސްތަކާއި ސްކޫލު މުވައްޒިފުންނަށް ޚާއްސަކޮށް ވެކްސިން ޖެހުމުގެ ޕްރޮގްރާމެއް ދަނީ ހިންގަމުންނެވެ.
