ލާރާއަށް ގެނެސްފައި ހުރި ހައިރާން ކުރުވަނިވި ބަދަލުން "ބެލް ބޮޓޮމް"ގެ ސްޕޮޓްލައިޓް އޭނާއަށް!
ބޮލީވުޑްގެ ފިލްމުތަކަށް ބަލާއިރު މި ދުވަސްވަރު އެންމެ ގަދަޔަށް ދެކެވޭ އެއް ވާހަކައަކީ، އަކްޝޭ ކުމާރްގެ އެންމެ ފަހުގެ ފިލްމު ކަމަށްވާ "ބެލް ބޮޓޮމް"ގެ ވާހަކައެވެ.
މި މަހުގެ 19ވަނަ ދުވަހު ތިއޭޓަރުތަކަށް އައުމަށް ހަމަޖެހިފައިވާ މި ފިލްމުގެ ޓްރެއިލާ މިހާރު ވަނީ ދައްކައިލައިފައެވެ. އެގޮތުން ބޮލީވުޑްގެ އެހެން ތަރިންނާއި ފޭނުން ވެސް މިހާރު ދަނީ މީސް މީޑިއާގެ އެކިއެކި މަންސަތަކުގައި މި ފިލްމުގެ ޓްރެއިލާ ހިއްސާ ކުރަމުންނެވެ.
އަކްޝޭ ކުމާރުގެ އިތުރުން މި ފިލްމުގައި ހަރަކާތްތެރިވެފައި ވަނީ ވާނީ ކަޕޫރް، ހުމާ ޤުރޭޝީ އަދި "މިސް ޔުނިވާސް"ކަމުގެ ފަޚުރުވެރި ތާޖު ކުރިން ހާސިލު ކޮށްފައިވާ ލާރާ ދައްތާއެވެ.
"ބެލް ބޮޓޮމް"ގެ ލީޑު ރޯލުގައި އަކްޝޭ ހަރަކާތްތެރި ވިޔަސް، މި ފިލްމުގެ "ސްޕޮޓްލައިޓް" މި ފަހަރު ދަމައިގަތީ ލާރާ ދައްތާއެވެ.
ރިޕޯޓުތަކުން ބުނެފައިވާ ގޮތުގައި ލާރާ މި ފިލްމުގައި ކުޅެފައި ވަނީ އިންޑިއާގެ ކުރީގެ ބޮޑު ވަޒީރު އިންދިރާ ގާންދީގެ ރޯލެވެ. އޭނާ އެ ރޯލަށް ތައްޔާރު ކުރުމަށް މޭކަޕް އާޓިސްޓުން ކޮށްފައިވާ ބުރަ މަސައްކަތް ވަރަށް ފުރިހަމަކަން ސާބިތުވީ، "މޭކް އޯވަރ"އަށް ފަހު، އެއީ ލާރާކަން އެކަކަށް ވެސް ފާހަގަ ކުރަން ނޭނގުމުންނެވެ.
މެދު އުމުރުގެ އަންހެނަކު އުމުރުން 50 އަހަރަށް ވުރެ މަތީ އަންހެނަކަށް ބަދަލު ކޮށްލައިފައި ހުރި ހުރުމުން އެތައް ބައެއްގެ ތައުރީފު "ބެލް ބޮޓޮމް"ގެ މޭކަޕް އާޓިސްޓުންނަށް ލިބުނެވެ. ކޮށްފައިހުރި މޭކަޕްގެ އިތުރުން ގިނަ މީހުން ދެން އެންމެ އަޅައިގަތީ އެ ރޯލަށް ލާރާ ދީފައިވާ އެކްސްޕްރެޝަންގެ ފުރިހަމަ ކަމުންނެވެ.
"ފިލްމުގެ ސްކްރިޕްޓު އަހަންނަށް ހުށަހެޅުމާ އެކީ އަހަރެން އެ ހުށަހެޅުން ޤަބޫލު ކުރިން. އެއީ ވަރަށް ތަފާތު ރޯލަކަށްވުމާއި އިންދިރާ ގާންދީގެ ރޯލަށް ވުމުން. އޭގެ ފަހުން އެ ކެރެކްޓާއަށް ތައްޔާރުވާން ހޯމްވޯކް ހެދިން. އެގޮތުން އިންދިރާ ގާންދީއާ ބެހޭ ގޮތުން އެއްކުރެވެން ހުރި މައުލޫމާތެއް އެއްކުރިން، އަދި މި ފިލްމުން ދައްކުވައިދޭ ހާދިސާއާ ބެހޭގޮތުން ވެސް މައުލޫމާތު އެއް ކުރިން. ފިލްމުގައި ދައްކުވައިދޭން ޖެހެނީ މޫނު މައްޗަށް މާ ބޮޑު އިހުސާސްތަކެއް ނާންނަ، އަބަދުވެސް ސީރިއަސް މޫނެއް ދައްކައިދީފައި ހުންނަ ކެރެކްޓާއެއް" އިންޑިއާގެ މީޑިއާއަކަށް ދިން އިންޓަވިއުއެއްގައި ލާރާ ބުނެފައިވެއެވެ.
ލާރާ ބުނީ އެ އެކްސްޕްރެޝަން ދީފައި ބަހައްޓަން ވަރަށް އުނދަގޫވި ކަމަށާއި އެހެން ނަމަވެސް ވަރަށް ގިނަ ދުވަހުގެ ޕްރެކްޓިސްއާ އެކު އެކަން ކުރި ކަމަށެވެ.
"ބެލް ބޮޓޮމް"އަކީ 1984ވަނަ އަހަރު އިންޑިއާގައި ހިނގި، ފްލައިޓެއް ހައިޖެކް ކުރި ހާދިސާއަށް ބިނާކޮށް އުފައްދައިފައިވާ ފިލްމެކެވެ. އެ ހާދިސާގައި ބަޔަކު އެ ފްލައިޓު ހައިޖެކް ކޮށް، އޭގައި ތިބި ޕަސަންޖަރުން ރަހީނު ވެސް ކުރިއެވެ. ޓްރެއިލާއިން ދައްކާ ގޮތުގައި "ބެލް ބޮޓޮމް"އަކީ އަކްޝޭ ކުމާރަށް މި ފިލްމުގައި ދީފައިވާ ކޯޑް ނަމެވެ.
Ads by STO
