ފާއިތުވީ ހަ އަހަރު އަކްޝޭ ކުޅުނު އެންމެ ފިލްމެއް ވެސް ފްލޮޕް ނުވޭ!
ބޮލީވުޑްގެ އެންމެ ފިޓް އެކްޓަރުކަމަށް ފާހަގަވާ އަކްޝޭ ކުމާރަކީ މިވަގުތު އެ ދާއިރާގައި ހުރި އެންމެ ބިޒީ ވެސް އެކްޓަރެވެ. އެގޮތުން މި ދުވަސްވަރު އޭނާ އުޅެނީ ފިލްމުތަކުގެ ޝޫޓިންގްތަކާއި ޕްރޮމޯޝަންތަކުގައި ވަރަށް އަވަދިނެތި ކަމަށް ރިޕޯޓުތަކުން ބުނެއެވެ.
އަކްޝޭގެ ބިޒީކަމުގެ އެއް ހެއްކަކީ ފާއިތުވީ ހަ އަހަރު ދުވަސް ތެރޭގައި އޭނާ ކުޅުނު ހުރިހާ ފިލްމެއް ވެސް ސުޕާހިޓްވެފައި ވުމެވެ.
އަކްޝޭ ފިލްމެއް ބޮކްސް އޮފީހުގައި އެންމެ ފަހުން ފްލޮޕްވެފައި ވަނީ 2015ވަނަ އަހަރުގައެވެ. އެއީ ފިލްމު "ބްރަދާސް"އެވެ. ހޮލީވުޑްގެ ފިލްމެއް ކަމަށްވާ "ވޯރިއާސް"ގެ ކޮޕީއެއް ކަމަށްވާ މި ފިލްމުގަައި އަކްޝޭއާ އެކު ހަރްކާތްތެރިވީ ސިދާތު މަލޯތުރާ، ޖެކްލިން ފާނަންޑެޒް، ޖެކީ ޝްރޮފް އަދި އަޝޫތޯޝް ރާނާއެވެ. ކަރަން ޖޯހަރް ކޯ ޕްރޮޑިއުސް ކުރި މި ފިލްމަށް އެތައް ބައެއްގެ ނުރުހުމާއި ފާޑުކިޔުން އަމާޒުވިއެވެ.
ނަމަވެސް "ބްރަދާސް"ގެ ހިތިކަން އަކްޝޭ ވަނީ ވަރަށް ފަސޭހައިން ފިލުވައިލައިފައެވެ. ކާމިޔާބު ފިލްމުތައް ކަމަށްވާ "އެއާލިފްޓް"، "ޖޮލީ އެލްއެލްބީ 2"، "ގޯލްޑް މިޝަން"، "މަންގާލް" އަދި "ގުޑް ނިއުޒް" ފަދަ ފިލްމުތައް ވަނީ ބޮކްސް އޮފީހުން ލިބެން އަމާޒުކުރި ކާމިޔާބީއަށް ވުރެ ވެސް ބޮޑު ކާމިޔާބީއެއް ހޯދައިފައެވެ.
މިހާރު އަކްޝޭ ތައްޔާރުވަމުން ދަނީ "ބެލް ބޮޓޮމް" ރިލީޒް ކުރުމަށެވެ. ލާރާ ދައްތާ، ވާނީ ކަޕޫރް އަދި ހުމާ ޤުރޭޝީ ވެސް ހަރަކާތްތެރިވާ މި ފިލްމު ރިލީޒް ވަނީ މި މަހުގެ 19ވަނަ ދުވަހުގައެވެ. ފިލްމުގެ ޓްރެއިލާއަށް ލިބުނު ތަރުހީބަށް ބަލައިފައި މި ފިލްމު ވެސް ވާނީ އަކްޝޭގެ ވަރަށް ހިޓް ފިލްމެއް ކަމަށް ބެލެވެއެވެ.
Ads by STO
