ތަރައްޤީގެ ޕްލޭން އެކުލަވައިލަންޖެހޭ ތާރީހް ނޮވެމްބަރު 30އާ ހަމައަށް އިތުރުކޮށްފި
ރަށު ކައުންސިލްތަކާއި ސިޓީ ކައުންސިލްތަކުން ހަދަންޖެހޭ ރަށު ތަރައްޤީގެ ޕްލޭން އެކުލަވައިލަން ޖެހޭ އެންމެ ފަހު ތާރީޚަކީ ނޮވެންބަރު މަސްކަމަށް ލޯކަލް ގަވަރމަންޓް އޮތޯރިޓީ (އެލްޖީއޭ)އިން ކަނޑައަޅައިފިއެވެ.
އެލްޖީއޭއިން ކައުންސިލްތަކަށް އިއްޔެ ފޮނުވި ސިޓީގައި ވިދާޅުވެފައި ވަނީ، ކޯވިޑްގެ ހާލަތާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާނުކޮށް ލޮކްޑައުންކުރުމާއި، އަތޮޅު ތެރެއިން ވެސް މިބަލި ފެނި ގިނަ ރަށްތަކެއް މޮނިޓަރިންގއަށް ލައިފައި ވުމާ ގުޅިގެން ގިނަ ބަޔަކު އެއްވެ މިފަދަ ބައްދަލުވުންތައް ބޭއްވޭ ފަދަ މާހައުލެއް ގިނަ ރަށްރަށުގައި ނެތުމުން، ޤާނޫނުގައި ކަނޑައަޅާފައިވާ މުއްދަތަށް ޕްލޭން ނިންމުމުގައި ކައުންސިލްތަކަށް ދަތިތަކެއް ހުރިކަން އެއޮތޯރިޓީއަށް ފާހަގަކުރެވިފައިވާ ކަމަށެވެ.
ނަމަވެސް ތަރައްޤީގެ ޕްލޭން އެކުލަވައިލުމަށް ޤާނޫނުގައި ބުނެފައިވާ މުއްދަތު ހަމަވަމުންދާތީ ރައްޔިތުންގެ މަޖިލީހުގެ ލާމަރުކަޒީ ކޮމެޓީއާއި، ލޯކަލް ގަވަރމަންޓް އޮތޯރިޓީގެ މަޝްވަރާގެ މަތިން ގާނޫނުގައި ކައުންސިލުތަކުން ނިންމުމަށް ކަނޑައަޅައިށް އިތުރު މުއްދަތު ދިނުމަށް ކަނޑައެޅުމަށް ނިންމައިފައިވާ ކަމަށް އެލްޖީއޭއިން ވިދާޅުވިއެވެ.
އެލްޖީއޭއިން ވިދާޅުވީ ކައުންސިލްތަކުގެ މަސައްކަތް މިންކޮށް ރޭންކުރުމަށް އެލްޖީއޭއިން އެކުލަވައިލާ ޕާރފޯމަންސް އިންޑެކްސްއަށް މައުލޫމާތު އެއްކުރުމުގައި، ޕްލޭން ތައްޔާރުކޮށް ހުށަހަޅަން ޖެހޭ ތާރީޚުކަމުގައި ބަލާނީ ނޮވެންބަރު 30 ކަމަށެވެ.
