މަހްލޫފުގެ ވާހަކަތަކުން އެނގެނީ ޤާނޫނީ ވެރިކަމެއް ރާއްޖޭގައި ނެތްކަން: ޝަރީފް
މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހްމަދު މަޙްލޫފް ދައްކަވާ ވާހަކަތަކުން އެނގެނީ ޤާނޫނީ ވެރިކަމެއް ރާއްޖޭގައި ނެތްކަންކަމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ.
ޝަރީފް މިފަދައިން ވިދާޅުވެފައި ވަނީ އެންޓި ކޮރަޕްޝަން ކޮމިޝަން (އޭސީސީ)ގެ ރައީސް މަރިޔަމް ޝިއުނާ އާއި އެސެޓް ރިކަވަރީ ކޮމިޝަންގެ ރައީސް އަހްމަދު އައްސަދުގެ ނަޒާހަތްތެރިކަން ގެއްލޭ ފަދަ ހެކި އެބަހުރި ކަމަށް ޔޫތު މިނިސްޓަރު އަހުމަދު މަހްލޫފު ވިދާޅުވުމާ ގުޅިގެންނެވެ.
ޝަރީފް ވިދާޅުވީ މިނިވަން މުއައްސަސާތަކާއި ކޮމިޝަންތަކުގެ ޤާނޫނީ ޒިންމާ އަދާނުކުރެވޭ ޙާލަތަށް ޤައުމު ވެއްޓިފައިވާ ކަމަށެވެ. ވަޒީރަކު ސަރުކާރުގެ މުއައްސަސާތަކަށް އެފަދަ ތުހުމަތުތަކެއް ކުރެއްވުމުން އެކަން ތަހުގީގްކޮށް ފިޔަވަޅު ނާޅާ ނަމަ އެއިން ދޭހަ ވަނީ ޤާނޫނީ ވެރިކަމެއް ރާއްޖޭގައި ނެތްކަން ކަމަށް ވެސް އާދަމް ޝަރީފް ވިދާޅުވިއެވެ.
އެމްއެމްޕީއާރްސީގެ ޚިޔާނާތުގައި ބައިވެރިވިކަމުގެ ތުހުމަތުގައި މި ވަގުތު މަހުލޫފް ހުންނެވީ ވަޒީފާއިން ސަސްޕެންޑުކޮށްފައެވެ. މަހްލޫފްގެ މައްސަލަ ކޯޓަށް ހުށަހަޅައި އޭނާގެ މައްޗަށް ދަޢުވާކޮށްފި ނަމަ އެމްއެންޕީއާރުސީގެ ޚިޔާނާތުގެ މައްސަލައިގައި އިތުރު އެއްވެސް މީހަކަށް ދަޢުވާ ނުކުރެވޭނެ ވަރުގެ ކޭސްއަކަށް އެ ކޭސް ވެގެންދާނެ ކަމަށް މަހްލޫފް ވަނީ ވިދާޅުވެފައެވެ.
މަހްލޫފު ވިދާޅުވީ މައްސަލަ ވަކި ގޮތަކަށް ނިންމުމަށް ބަޔަކު މަސައްކަތް ކުރާ ކަމަށެވެ. އޭގެ ތެރޭގައި އައްސަދާއި ޝިއުނާ ހިމެނޭ ކަމަށާއި އެ މައްސަލަ ވަކި ގޮތަކަށް ގެންދަން ޝިއުނާއާއި އައްސަދު ދައްކައިފައި ހުރި ވާހަކަތައް އޭނާގެ އަތުގައި އެބަހުރި ކަމަށް މަހުލޫފް ވިދާޅުވިއެވެ.
