ޑްރަގާއެކު ހިފެހެއްޓި ބޯޓުގެ މައްސަލަ ނުބެލޭނެކަމަށް ކޯޓުން ނިންމައިފި

ރާއްޖޭގެ އެސްއީޒެޑްގެ ތެރެއިން ޑްރަގާ އެކު 2019ވަނަ އަަހަރު އަތުލައިގަތް ބޯޓުގެ މައްސަލަ ނުބެލޭނެ ކަމަށް ކްރިމިނަލް ކޯޓުން ނިންމައިފިއެވެ.

Ads by MWSC

ބ. އަތޮޅުގެ ހުޅަނގުން 126 ނޯޓިކަލް މޭލު ބޭރުން އަތުލައިގަނެފައިވާ އީރާނަށް ނިސްބަތްވާ މިބޯޓުގެ މައްސަލައިގައި ރާއްޖެއަށް މަސްތުވާތަކެތި އެތެރެ ކުރުމުގެ ދައުވާ ކުރީ އެ ގައުމަށް ނިސްބަތްވާ، އަބްދުﷲ، ރަހުމަތުﷲ، ހާލިދު ބެލޫދީ، ހަބީބު އަދި ސައީދު މޮހާނީގެ މައްޗަށެވެ. 51 ކިލޯގެ ޑްރަގާއެކު ފުލުހުންގެ ބެލުމުގެ ދަށަށް ގެންދިޔަ މި ބޯޓާއެކު ހައްޔަރު ކުރި އަބްދުﷲ، ރަހުމަތުﷲ އަދި ހާލިދު ބެލޫދީގެ މައްޗަށް ކެނަބިސް ބޭނުން ކުރުމުގެ ކުށުގެ ދައުވާ ކުރި އިރު ހަބީބްގެ މައްޗަށް ވަނީ މަސްތުވާ އެއްޗެއް ޓްރެފިކް ކުރުމުގެ ދައުވާ ކޮށްފައެވެ.

އެހެން ނަމަވެސް ދައުވާ ލިބޭ މީހުންގެ ދިފާއީ ވަކީލު ކޯޓުގައި ވިދާޅުވީ މަސްތުވާތަކެއްޗާ އެކު އެ ބޯޓު ހައްޔަރުކޮށްފައި ވަނީ ރާއްޖޭގެ ސިޔާދަތީ ބާރު ހިނގާ ސަރަހައްދުން ބޭރުން ކަމަށާއި ޔުނައިޓެޑް ނޭޝަންސް ކޮންވެންޝަން އޮން ދަ ލޯ އޮފް ދަ ސީގައި ކަނޑައަޅާފައިވާ އުސޫލުތަކަށް ބެލުމުން ވެސް އެ ސަރަހައްދެއްގެ ބޭރަށް ޖިނާއީ ގާނޫނީ ނުހިނގާނެކަމަށެވެ.

ރާއްޖެއާއި އިރާނުން ވެސް ބައިވެރިވެފައިވާ މި މުއާހަދާގައި ކަނޑުމަގުން މަސްތުވާތަކެތި ޓްރެފިކްކުރުން ހުއްޓުވަން ބާރު އަޅާ ކަމަށް ދައުލަތުން ވަނީ ބުނެފައެވެ. އަދި މައްސަލަ ބަލާ ގާޒީ، ވިދާޅުވީ އެ ކޮންވެންޝަންގައި އޮތީ "ހައި ސީސް"ގައި އެކަން ކުރެވޭނެ ވާހަކަ ކަމާއި ހާއްސަ އިގްތިސާދީ ސަރަހައްދުގެ ވާހަކަ ނޫން ކަމެވެ.

މިމައްސަލައިގައި ގާޒީ ފާއިޒު ވިދާޅުވީ މި މައްސަލައިގައި ބަލަންވީ "ޔުނައިޓެޑް ނޭޝަންސް ކޮންވެންޝަން އެގެއިންސްޓް އިލިސިޓް ޓްރެފިކިން އޮފް ނާކޮޓިކް ޑްރަގްސް އެންޑް ސައިކޯޓްރޮޕިކް ސަބްސްޓެންސެސް"އިން ކަމަށެވެ. އެ ކޮންވެންޝަންގައިވާ ގޮތުން ދަތުރު ކުރަމުންދާ އުޅަނދެއްގައި މަސްތުވާތަކެތި ހުރި ކަމަށް ގަބޫލުކުރެވިއްޖެ ނަމަ އެ އުޅަނދެއް ނިސްބަތްވާ ގައުމަށް އަންގަން ޖެހެއެވެ. އަދި އެ އުޅަނދަކަށް ފިޔަވަޅު އެޅުމުގެ ކުރިން އެ އުޅަނދު ނިސްބަތްވާ ގައުމުގެ ހުއްދަ ހޯދަން ޖެހެއެވެ. އެހެން ނަމަވެސް މި ބޯޓުގައި ތިބި މީހުން ހައްޔަރު ކުރުމުގެ ކުރިން އީރާނަށް އެކަން އަންގައިފައެއް ނުވެއެވެ.

މިބޯޓަކީ އީރާނުގެ ބޯޓެއްކަމަށް ސާބިތު ކޮށްދެވޭނެ އެއްވެސް ލިޔެކިޔުމެއް ނެތްއިރު ދައުލަތުން ބުނެފައި ވަނީ މި ބޯޓަކީ އީރާނުގެ ބޯޓެއްކަމަށް ނިންމާފައި ވަނީ ބޯޓު އަތުލައިގަތް ވަގުތު އެ ބޯޓުގައި ހުރި މީހަކު ބުނި ބުނުމަކަށް ބިނާކޮށް ކަމަށެވެ. މިގޮތުން އެ ބޯޓަކީ އިރާނުގެ "ނާސިރީ" ކިޔާ ބޯޓެއް ކަމަށް އެ ބޯޓުގެ ފަޅުވެރިއަކު އަނގަ ބަހުން ބުނެފައިވާކަމަށް ދައުލަތުން ވަނީ ބުނެފައެވެ. އެހެން ނަމަވެސް މި ބޯޓަކީ އީރާނުގެ ބޯޓެއް ނޫންކަން ދައުލަތަށް އެނގުނީ ތަހްގީގު ނިމި ދައުވާ ވެސް ކުރި ފަހުން ކަމަށްވެސް ކޯޓުގެ ނިންމުމުގައި ވަނީ ފާހަގަކޮށްފައެވެ.

ގާޒީ ފާއިޒުގެ ނިންމެވުމުގައި ފާހަގަ ކޮށްފައިވާ ގޮތުގައި ދައުވާގެ ކުރިން މައްސަލަ ބޭރުކޮށްލަން ނިންމެވީ ބޯޓަކީ ދައުވާގައިވާ ގޮތަށް އިރާނުގެ ބޯޓެއް ކަމަށް ބަލައިގެން ޝަރީއަތުން ނިންމީ އިރާނުގެ ބޯޓެއް ރާއްޖޭގެ ސަރަހައްދުން ހިފަހެއްޓުމުގައި އަމަލު ކުރަން ޖެހޭ ބައިނަލްއަގުވާމީ މުއާހަދާތަކާ އެއްގޮތަށް ސިފައިން އަމަލުކޮށްފައި ނުވާ ކަމަށްވާތީއެވެ.