އެންމެ އިސްކަމެއް ދޭންވާނީ ދިވެހި ރައްޔިތުން ޚިޔާރުކޮށްފައިވާ ޤާނޫނީ ވެރިކަމަށް ސިފައިން ކިޔަމަންތެރިވުން: ޝަމާލް
އެންމެ އިސްކަމެއް ދޭންވާނީ ދިވެހި ރައްޔިތުން ޚިޔާރުކޮށްފައިވާ ޤާނޫނީ ވެރިކަމަށް ސިފައިން ކިޔަމަންތެރިވުމަށް ކަމަށް ޗީފް އޮފް ޑިފެންސް ފޯސް އަބްދުﷲ ޝަމާލް ވިދާޅުވެއްޖެއެވެ.
67 ވަނަ އަސާސީ ތަމްރީނު ކޯހުގެ ދަރިވަރުން ސިފައިންގެ ހުވާކުރުމާއި ބަޑި ހަވާލު ކުރުމުގެ ރަސްމިއްޔާތުގައި ސިފައިންނާ ވާހަކަ ދައްކަވަމުން ޝަމާލް ވިދާޅުވީ، މިއަދު ހުވާ ކުރި ސިފައިން ދުނިޔެއާއި ރާއްޖޭގެ ސަލާމަތީ ވެއްޓަށް އަހުލުވެރިވެ، ޒަމާނީ އަސްކަރީ ފަލްސަފާތަކާއި އަސްކަރީ ހުނަރުވެރިކަމަށް ޤާބިލު ބައެއްގެ ގޮތުގައިވާން ޖެހޭ ކަމަށެވެ. އަދި ދިވެހި ސިފައިންގެ ލަޝްކަރާއި ގުޅިގެން ދާއިރު ސަމާލުވާން ޖެހޭ ކަންތައްތަކެއް ހުންނާނެ ކަމަށާއި އެކަންކަމަކީ ކޮބައިކަން ޝަމާލް ކިޔައިދެއްވިއެވެ.
"އެންމެ ބޮޑު އިސްކަމަކަށް ހަދަންވާނީ އަސްކަރީ އަޚްލާޤާއި އޭގެ އެންމެ މަތީ ފެންވަރުގައި ހުނަރުވެރިކަން އަދި ޕްރޮފެޝަނަލިޒަމް ހިފެހެއްޓުން. އިސްލާމީ ޞައްޙަ އަޤީދާގެ މަތީގައި ދެމިތިބެ ފުރިހަމަ ސިފަވަންތަ ބައެއްގެ ގޮތުގައި ސާބިތުވެ ތިބުން. އަމިއްލަ ނަފްސަށްވުރެ ޤައުމީ ޚިދުމަތް އިސްކުރުން. އަދި ދިވެހި ރައްޔިތުން ޚިޔާރުކޮށްފައިވާ ޤާނޫނީ ވެރިކަމަށް ކިޔަމަންތެރިވެ، ދިވެހި ރައްޔިތުން ހިމާޔަތް ކުރުން. ދިވެހި ދަޢުލަތުގެ ކީރިތި ކަމާއި މޫރިތިކަން ދަމަހައްޓާ ޝާނާއި ޝައުކަތު ނެގެހެއްޓުން" ޝަމާލް ވިދާޅުވިއެވެ.
ޝަމާލްގެ ވާހަކަފުޅުގައި ވިދާޅުވީ، މިއަދު ދުނިޔެއާއި ރާއްޖެ އޮތް ސަރަހައްދުގެ ވެއްޓަށް ވެސް ބޮޑެތި ބަދަލުތަކެއް އަންނަމުންދާ ކަމަށެވެ. އަދި ސަލާމަތީ މަސްރަހު ކިލަނބުވެފައިވާ މި ދުވަސްވަރު ހައިބްރިޑް ތްރެޓްތަކާއި އެކިއެކި ނުރައްކާތެރި ފަރާތްތަކުން އުދުވާނީ ހަމަލަތައް ރާއްޖެއަށް އަމާޒުވަމުން އަންނަ ކަމަށް އޭނާ ވިދާޅުވިއެވެ.
ޝަމާލް ވިދާޅުވީ، މިކަންމަކާ ކުރިމަތި ލެއްވުމަށް ސިފައިން އަބަދުވެސް ހަރަކާތްތެރިވަމުން އަންނަ ކަމަށާއި ކޮވިޑް-19 ޕެންޑަމިކްގެ ހާލަތުގައި ވެސް ސިފައިންގެ ތަމްރީންތައް މެދުކަނޑައި ނުލާ ކުރިޔަށް ގެންދާ ކަމަށެވެ. އަދި މި ކަންކަމާއި ކުރިމަތިލުމަށް ދިވެހި އަސްކަރިއްޔާގެ ޤާބިލްކަމާއި އޮޕަރޭޝަނަލް ކެޕޭސިޓީ އިތުރުކޮށް، ނިޒާމްތައް ހަރުދަނާކޮށް، އާލާތްތައް ގިނަކޮށް ވަސީލަތްތައް ހޯދުމުގެ މަސައްކަތް މެދުކެނޑުމެއް ނެތި މަސައްކަތް ކުރަމުންދާ ކަމަށް ވިދާޅުވިއެވެ.
Ads by STO
