ކޮވިޑް-19 ކޮންޓްރޯލުން ނެއްޓިދާނެތީ، ދެ ހަފްތާއަށް ސްކޫލްތައް ބަންދުކޮށް، އައްޑޫގައި ކާފިއު ހިންގަނީ

ކޮވިޑް-19 ހާލަތު ގޯސްވެ، އައްޑޫ ސިޓީގައި ރޭގަނޑު 9އިން ފެށިގެން ފަތިހު 4އަށް ކާފިއު ހިންގުމަށް ނިންމައިފިއެވެ.

މިކަން ހާމަކޮށްފައި ވަނީ، އައްޑޫ އިމަޖަންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލްވުމުގައި އެ ސިޓީގެ މޭޔަރު އަލީ ނިޒާރުއެވެ.

އައްޑޫގައި ކާފިއު އިއުލާން ކުރަން ނިންމައިފައިވާއިރު، ކޮވިޑް-19ގެ ވޭދަނަތައް ގިނަ އަދަދަކަށް ފެނުމާ ގުޅިގެން އައްޑޫގެ ގުޅިފައިވާ ރަށްތައް މިއަދު ވަނީ މޮނީޓަރިން ހާލަތަށް ގެނެސްފައެވެ.

އައްޑޫގައި ކާފިއު ވަގުތުގައި ފިހާރަތަކާއި، ކެފޭ ރެސްޓޯރެންޓުތަކާއި ގާޑިޔާތަކުން ހިދުމަތް ދިނުން މަނާވާނެއެވެ. އެހެން ނަމަވެސް ހާއްސަ ހުއްދަތަކެއް ލިބިގެން ރޭގަނޑު 12 ޖަހަންދެން ޑެލިވަރީގެ ހިދުމަތް ދެވޭނެ ކަމަށް ނިޒާރު ވިދާޅުވިއެވެ.

ކާފިއު ހިންގުމުގެ އިތުރުން އައްޑޫގެ ސްކޫލްތައް ދެ ހަފްތާއަށް ބަންދުކޮށް، ޕާޓީ އަދި ހަފްލާތައް ވެސް ބޭއްވުން ވަނީ މަނާކޮށްފައެވެ.