ޚުތުބާގައި ސިޔާސީ ކުލަ ޖައްސައިފި، ސަލާން ޖަހަން މަޖުބޫރި ކުރީ ސަރުކާރުން: ޝިޔާމް
ޚުތުބާގައި އާއްމުކޮށް ދެއްވަނީ ވަރަށް ރަނގަޅު ނަސޭހަތް ކަމަށާއި އެހެން ނަމަވެސް މިއަދުގެ ހުކުރު ޚުތުބާގައި ސިޔާސީ ކުލަ ޖެހިފައިވާ ކަމަށް ބުނެ، އިސްލާމިކް މިނިސްޓްރީއަށާއި އަދާލަތު ޕާޓީއަށް، ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަޙްމަދު ޝިޔާމް ފާޑު ވިދާޅުވެއްޖެއެވެ.
މިއަދުގެ ހުކުރު ޚުތުބާ ގެނެސްދީފައި ވަނީ "އިސްލާމް ދީނުގައި މަަސައްކަތުގެ މަގާމް" މިމައުޞޫއުގެ ދަށުންނެވެ. މިއަދުގެ ހުކުރު ޚުތުބާގައި ރާއްޖޭގައި ސަލާން ޖަހާ މީހުން އިތުރުވެފައިވާ ކަމަށް ވަނީ ބުނެފައެވެ. މިގޮތުން، ފަގީރުވެގެން ގޮސް ހާލުގައި ޖެހުމާއި، ބޯ ނުހިކޭވަރުގެ ދަރަންޏެއް އޮތުމާއި އަދާ ނުކުރެވޭ ވަރުގެ މަރުގެ ދިޔައެއް ބޮލުގައި އެޅިފައިވުން ފިޔަވާ އިތުރު ހާލަތުގައި ސަލާން ނުޖެހޭނެ ކަމަށާއި އެގޮތަށް ކަންތައް ނުކުރުމަށް ޚުތުބާގައި އިރުޝާދު ދީފައިވެއެވެ. އަދި ހަލާލު ކޮންމެ ކަމަކީ އަޅުކަމެއް ކަމަށާއި، އަމިއްލަ މަސައްކަތްކޮށް ސަލާން ޖެހުމުން ދުރުވުމަށް ނަސޭހަތްތެރިވެފައިވެއެވެ.
ހުކުރު ޚުތުބާގައި ސިޔާސީ ކުލަ ޖެހިފައިވާކަމަށް ތުހުމަތު ކުރައްވަމުން ޝިޔާމް ވިދާޅުވީ، އިދިކޮޅު ކޯލިޝަނުން "އައްޑަނަ"ގެ ނަމުގައި މިރޭ ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ. މިގޮތުން ވިދާޅުވީ، ހުކުރު ޚުތުބައަކީ މި ސަރުކާރުގެ ވުޒާރާއަކުން ނިކުންނަ އެއްޗެއް ކަމަށާއި އެ ވުޒާރާގައި މިއަދު ހުންނެވީ އަދާލަތު ޕާޓީގެ ބޭފުޅެއް ކަމަށެވެ. އަދި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲއަކީ ސިޔާސީ މަންފާއެއް ހޯދުމަށް ކޮންމެ ފަދަ ކަމެއްވެސް ކޮށްފާނެ މީހެއް ކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ، މިއަދުގެ ޚުތުބާގައި ސިޔާސީ ކުލަ ޖެހިފައިވާ ކަމަށާއި ޚުތުބާގެ މައިގަނޑު މަޤްސަދަކަށް ވެފައިވަނީ ސަރުކާރުގެ މޫނުމަތި ރީތި ކުރުން ކަމަށެވެ.
"ޚުތުބާގައި އެނގިވަޑައިގަންނަވާނެ ވަރަށް ރަނގަޅު ނަސޭހަތް ދެއްވާ. އެހެން ނަމަވެސް އަޅުގަނޑަށް މިއަދު ފާހަގަ ކުރެވުނު އާދަޔާ ޚިލާފަށް ހުކުރު ޚުތުބާގައި ސިޔާސީ ކުލަ ޖެހިފައި އޮތް ތަން. ސަރުކާރުގެ މޫނުމަތި ރީތި ކުރުމަށް ޓަކައި ހުކުރު ޚުތުބާއިން މަސައްކަތް ކުރެއްވިތަން އަޅުގަނޑަށް ފެނުނު." ޝިޔާމް ވިދާޅުވިއެވެ.
ޝިޔާމް ވިދާޅުވީ، މިއަދުގެ ޚުތުބާގައި ރާއްޖޭގައި ސަލާން ޖެހުން ގިނަވެފައިވާ ކަމަށް ބުނި ނަމަވެސް އެކަން ދިމާވާން މެދުވެރިވި ސަބަބާ ބެހޭ ގޮތުން ވާހަކަ ދެކެވިފައި ނުވާ ކަމަށެވެ. އަދި ސަލާން ޖަހަން މެދުވެރިވީ، ސަރުކާރުން ދިވެހި ޤައުމާއި ދިވެހި ރައްޔިތުން ގެނެސްފައިވާ ހާލަތުގެ ސަބަބުން ކަމަށް ޝިޔާމް ވިދާޅުވިއެވެ.
"އޭގެ ފަހުން މި އައީ، ވަޒީފާތަކަށް ބިދޭސީން، ދިވެހިން ކަންނެތް ވެގެން ބިދޭސީން ވަޒީފާތަކަށް ނިކުންނަ ވާހަކަ. ދިވެހި ރާއްޖޭގައި ސަލާން ޖަހާ މީހުންނަކީ މަކަރާ ހީލަތުން ސަލާން ޖަހާ ބައެއްގެ ގޮތުގައި ހުކުރު ޚުތުބާއިން ވިދާޅުވި ތަން އަޅުގަނޑުމެންނަށް އަޑު އިވިގެން މިދިޔައީ. އެހެން ނަމަވެސް ދިވެހި ރައްޔިތުން ގެންގޮސްފައި މި ތިބަ ހާލަތާ ބެހޭ ގޮތުން ހުކުރު ޚުތުބާގައި އަޑެއް ނީވުނު." ޝިޔާމް ވިދާޅުވިއެވެ.
ޝިޔާމްގެ ވާހަކަފުޅުގައި ވިދާޅުވީ، އާއްމުދަނީ ހޯދަން ހުޅުވިފައި ހުރި މަގުތައް ބަންދުވެގެން ދިޔައީ ކީއްވެގެންކަން ހުކުރު ޚުތުބާގައި ވިދާޅުވާކަށް ނުކެރުނު ކަމަށެވެ. އަދި ވޭތުވެދިޔަ ދެ އަހަރަކީ ރައްޔިތުން ވަރަށް ބޮޑަށް ނިކަމެތިވެގެން ދިޔަ ދެ އަހަރު ކަަމަށާއި މިނިކަމެތި ކަމުން އަރައި ގަތުމަށް ސަރުކާރުން މަސައްކަތް ނުކުރައްވާ ކަމަށެވެ.
"މިއަދު އަޅުގަނޑުމެންނަށް މިފެންނަނީ ރާއްޖޭގައި އާދަޔާ ޚިލާފަށް ސަލާން ޖަހާތަން. އަޅުގަނޑު ޤަބޫލެއް ނުކުރަން މިއަދު ހުކުރު ޚުތުބާގައި އެ ވިދާޅުވި ގޮތަކަށް ދިވެހި ރާއްޖޭގައި ސަލާން ޖަހާ މީހުން ޖަހަނީ، އެއީ މަކަރުން. މަކަރުން ސަލާން ޖަހާނެ މީހަކު ނޫޅެއެކޭ އަޅުގަނޑު ނުދަންނަވާނަން. އެހެން ނަމަވެސް ދިވެހި ރައްޔިތުން މިއަދު ސަލާން ޖަހާވަރަށް އާއިލާތައް ބިކަވެފައި ތިބިކަން މިއަދު އަޅުގަނޑުމެންނަށް އިޙްސާސްވޭ." ޝިޔާމް ވިދާޅުވިއެވެ.
ޝިޔާމް ވިދާޅުވީ، ޕެންޑަމިކްގެ ތެރޭގައި އާއްމު ރައްޔިތުން ވަރަށް ބޮޑަށް ނިކަމެތިވި ކަމަށާއި މިގޮތުން ރިސޯޓްތަކުގައި މަސައްކަތް ކުރާ އެތައް ޒުވާނުންނެއް އަދިވެސް ވަޒީފާއެއް ނެތި، ވަޒީފާއިން ކަނޑައިލައިފައިވާ ކަމަށެވެ. އަދި ކުޑަ މުސާރާގައި އަދިވެސް ބައެއް ރިސޯޓްތައް އޮޕަރޭޓް ކުރަމުން އަންނަ ކަމަށް ޝިޔާމް ވިދާޅުވިއެވެ. އަދި މަސްވެރިން ވެސް މިއަދު އުޅެމުން އަންނަނީ ވަރަށް ދަތި ހާލުގައި ކަމަށް ޝިޔާމް ވިދާޅުވިއެވެ.
"މިއަދު މަސްވެރި އަތޮޅަކަށް ދިޔައީމަ މި އެނގެނީ މަސްވެރިން އުޅޭ ހާލު. ތެލުގެ އަގު ބޮޑުކޮށް ބަހައްޓައިފައި މަސް ގަންނަ އަގު ކުޑަކުރަނީ" ޝިޔާމް ވިދާޅުވިއެވެ.
ބަލަ ޝިޔާމް އަދިވެސް ނިދާފަތޯ ތިހިރީ…ދީނޭ ނުކިޔަާ އަދިވެސް ލާރި ގަނޑެއް ލިބޭތޯ ބަލާ….