އަތަމާޕްލާޒާ ވިއްކުމުގައި ޖާބިރަށް އޮޅުވައިލާފަައިވާކަމަށް ބުނެ މައްސަލަ ފުލުހަށް!
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ބައްލަވައި ގަނެފައިވާ މ. އަތަމާ ޕްލާޒާ ވިއްކުމުގައި އޭނާއަށް ، ގޭގެ ވެރިފަރާތުން މަކަރާއި ހީލަތް ހަދާފައިވާކަމަށް ބުނެ އެ މައްސަލަ ބެލުމަށް ފުލުހަށް މައްސަލަ ހުށައަޅައިފިއެވެ.
ސިިވިލް ކޯޓުން ކޮށްފައިވާ ހުކުމެއް ތަންފީޒުކުރުމުގެ ގޮތުން ޖާބިރު ދިރިއުޅުއްވާ ގެކޮޅު ގަންނާނެ ފަރާތެއް ހޯދުމަށް ވަނީ އިއުލާނެއްކޮށްފައެވެ. މައުލޫމާތު ލިބިފައިވާގޮތުގައި މ. އަތަމާޕްލާޒާ ޖާބިރު ބައްލަވައިގަނެފައިވީ ނަމަވެސް އެގޭގެ ރަޖިސްޓްރީއާއި ލިޔެކިޔުންތައް ޖާބިރުގެ ނަމަށް ބަދަލުކޮށްފައެއް ނުވެއެވެ. އެހެންކަމުން އެ ގޭގެ ވެރިޔާކަމުގައިވާ އަދި މަލީޝާ ހައްޖު އެންޑް އުމްރާ ގްރޫޕްގެ ވެރިޔާ އިސްމާއީލް އަބްދުލްލަތީފުގެ ދަރަނީގެ މައްސަލަތަކެއްގައި އެ ގެ ވިއްކާލަން އިއުލާންކުރީއެވެ
މިކަމާ ގުޅޭ ގޮތުން ޖާބިރު ނެރުއްވި ބަޔާނެއްގައި ވިދާޅުވީ އޮކްޓޫބަރު 28، 2010 ގައި އެ ގެ 14 މިލިއަން ރުފިޔާއަށް ބައްލަވައިގެންފައިވާ ކަމަށެވެ. އަދި މ. އަތަމާޕްލާޒާ ގަނެ، ބެންކަށް ދައްކަން ޖެހޭ 4،873،105 ރުފިޔާ ބެންކަށް އަދާކޮށް ދިނުމާއި އިސްމާއީލް އަބްދުލްލަތީފަށް ދޭން ޖެހުނު 9،626،895 ރުފިޔާގެ ތެރެއިން އެއްބަސްވުމުގައި ސޮއިކުރި ވަގުތު 2،500،000 ރުފިޔާ އޭނާއަށް ދީ އަދި ބާކީން ދޭން ޖެހޭ 6،626،895 ރުފިޔާވެސް އަދާކޮށްފައިވާ ކަމަށް ވެސް ޖާބިރު ވަނީ ވިދާޅުވެފައެވެ. ޖާބިރު ވިދާޅުވީ އެ ފައިސާ ދެއްކުމުން އެގޭގެ ރަޖިސްޓްރީ ބޭންކުން ޖާބިރަށް ދީފައިވާކަމަށެވެ.
ޖާބިރުގެ ބަޔާނުގައި އިތުރަށް ވިދާޅުވި ގޮތުގައި އެގެ ބައްލަވައި ގެންނެވި ދުވަހުން ފެށިގެން މިދިޔަ 11 އަހަރު ޖާބިރުގެ އާއިލާ ދިރިއުޅުއްވީ އެގޭގައެވެ.
ޝަރީއަތް މެދުވެރިކޮށް މ. އަތަމާޕްލާޒާގެ މިލްކުވެރިކަން ބަދަލުކުރަން އިސްމާއީލް އަބްދުލްލަތީފް އިސްވެ ހުށައެޅުމުން އޭނާގެ މައްޗަށް އެ ވަގުތު ސާބިތުވެފައިވާ ދަރަނިތަކެއް ހުރުމުން އެ ދަރަނިތައް ހަލާސްކޮށް ނުނިމެނީސް މައްސަލަ ކުރިއަށް ނުގެންދެވޭނެ ކަމަށް ނިންމުމުން ޝަރީއަތަށް ހުށައެޅި ބިން ވިއްކުމުގެ މައްސަލަ އަނބުރާ ނަގަން ބޭނުންވާ ކަމަށް ބުނެ އިސްމާއީލް އަބްދުލްލަތީފް ސިވިލް ކޯޓަށް ސިޓީ ފޮނުވުމުން މައްސަލައިގެ ދައުވާ ފޯމް ބާތިލުކޮށްފައިވާތީ އެކަން އެގޮތަށް ކުރުމަކީ އިސްމާއީލް އަބްދުލްލަތީފް ހިންގައިފައިވާ ހީލަތުގެ އަމަލެއްކަން މިހާރު އެނގި ސާބިތުވެފައިވާ ކަމަށް ޖާބިރުގެ ބަޔާނުގައި ވަނީ ވިދާޅުވެފައެވެ.
"އެހެން ކަމުން އެކަން ތަހުގީގުކޮށް އޭނާގެ މައްޗަށް ގާނޫނުގައިވާ ގޮތުގެ މަތިން ފިޔަވަޅު އަޅައިދިނުމަށް އެދެމެވެ." ޖާބިރުގެ ބަޔާނުގައި ވިދާޅުވިއެވެ.
މަލީޝާ ހައްޖު ގުރޫޕުގެ ވެރިޔާ އަމިއްލަ ފަރާތަކަށް ދައްކަން ޖެހޭ ދަރަންޏެއް ކޯޓަށް ސާބިތުވެފައިވާއިރު އެފައިސާ ދެއްކެން އޮތީ އެފަރާތުގެ މިލްކުގައިވާ އަތަމާޕްލާޒާ ޝަރީއަތުން ވިއްކައިގެން ކަމަށް ވާތީ އެ ގެ ވިއްކާލަން އެކޯޓުން އަމުރުކޮށްފައިވީ ނަމަވެސް ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރު ވަނީ އިސްމާއިލަށް އެއްފަހަރާ ފައިސާ ދެއްކުމަށް ފަހު އަތަމާޕްލާޒާ ގަނެފައިވާކަމަށް ވިދާޅުވެފައެވެ. އެހެން ނަމަވެސް އެ ގެއަކީ ޖާބިރުގެ ގެއެއްކަމަށް ބުނުން ފިޔަވައި އެކަމުގެ އެއްވެސް ހެއްކެއް ޖާބިރުގެ ފަރާތުން ދެއްކިފައެއް ނުވެއެވެ.
