ހިޔާ ޕްރޮޖެކްޓްގައި ހިމެނޭ އެމްޕީއެލްގެ ފްލެޓްތައް ހަވާލު ކުރެވޭނީ އަންނަ އަހަރު!
ހިޔާ މަޝްރޫއުގައި ހިމެނޭ މޯލްޑިވްސް ޕޯޓްސް ލިމިޓެޑްގެ ފުލެޓުތައް ހަވާލު ކުރެވޭ ވަރުވާނީ އަންނަ އަހަރުގެ ކުރީކޮޅުގައި ކަމަށް އެމްޕީއެލްއިން ބުނެފިއެވެ.
އެމްޕީއެލްގެ 35 ވަނަ އަަހަރީ ދުވަހާ ގުޅިގެން ބޭއްވި ޖަލްސާގައި އެ ކުންފުނީގެ ސީއީއޯ ޝާހިދު އަލީ ވިދާޅުވީ މި މަޝްރޫއަކީ އެ ކުންފުނިން މިހާތަނަށް ކުރާ އެންމެ ބޮޑު އިންވެސްޓްމެންޓް ކަމަށާއި މި މަޝްރޫއުގެ މަސައްކަތް ނުނިމި ލަސްވީ ކޮވިޑް-19ގެ ސަބަބުން ކަމަށެވެ.
ހިޔާ މަޝްރޫއުގައި އެމްޕީއެލްއަށް ހާއްސަ ކޮށްގެން 15 ބުރީގެ ތިން ޓަވަރު އަޅާއިރު މި މަޝްރޫއަށް އެމްޕީއެލްއިން 566.8 މިލިއަން ރުފިޔާ ހަރަދުކޮށްފައިވެއެވެ.
2018ވަނަ އަހަރު އެމްޕީއެލްގެ ފްލެޓުތައް ދިނުމަށް ވަގުތީ ލިސްޓެއް އާންމު ކޮށްފައިވެއެވެ. އެހެން ނަމަވެސް، މި ސަރުކާރުގައި އެ ލިސްޓު ބާތިލުކޮށް އަލުން އެކުލަވައިލީއެވެ. އެމްޕީއެލްއިން މިއަދު ބުނީ މި ސަރުކާރުގައި ހަވާލުވި މެނޭޖްމަންޓުން ފްލެޓުތައް ދިނުމުގައި ޕޮއިންޓު ދެވޭނެ ހަރުދަނާ އުސޫލެއް ކަނޑައަޅައި، ހަމަހަމަ އުސޫލެއްގެ ދަށުން ފްލެޓުތައް ދިނުމަށް ޓަކައި އޭރުގެ ވަގުތީ ލިސްޓު ކެންސަލްކޮށް އަލުން އެޕްލިކޭޝަން ހުށަހަޅަން ހުޅުވައިލި ކަމަށެވެ.
ދާއިމީ ލިސްޓުގައި ހިމެނޭ މުވައްޒަފުންނަށް ފްލެޓު ގަންނަން ތިން ގޮތެއް ބަޔާންކޮށްފައި ވެއެވެ. އެއީ އެކީ އެއްފަހަރާ ފައިސާ ދެއްކުން، ނުވަތަ އެއް އަހަރަށް ބަހައިލައިގެން ފައިސާ ދެއްކުން، ނުވަތަ ބޭންކް ނޫނީ ފައިނޭންޝަލް އިންސްޓިޓިއުޓަކުން ލޯނު ހަމަޖެއްސުމެވެ.
Ads by STO
