އިންޑިއާއެކު ހެދި އެގްރީމެންޓްތައް ހާމަ ކުރުމަށް އިދިކޮޅުން އެކަށީގެންވާ މަސައްކަތެއް ނުކުރޭ: އަބްދުﷲ ރިޔާޒް
ބައެއް ޤައުމުތަކާއެކު ދިވެހި ސަރުކާރުން ހަދައިފައިވާ އެގްރީމެންޓްތަކާ ބެހޭ މައުލޫމާތުތައް ރައްޔިތުންނަށް ހާމަވާން ޖެހޭ ހިސާބުތަކަށް ހާމަނުވާތީ ކަންބޮޑުވާ ކަމަށް ތިމަރަފުށީ ދާއިރާގެ މެންބަރު އަބްދުﷲ ރިޔާޒް ވިދާޅުވެއްޖެއެވެ.
ދިވެހި ޗެނަލްއިން ގެނެސްދިން ޕްރޮގްރާމެއްގައި ، އިންޑިއާއާއެކު ހަދާފައިވާ އެގްރީމެންޓްތަކާ ގުޅިގެން އަބްދުﷲ ރިޔާޒް އިސްކޮށް ހުންނަވާ އުފައްދަވަން މަސައްކަތް ކުރައްވާ މޯލްޑިވްސް ނޭޝަނަލް ޕާޓީ (އެމްއެންޕީ)އިން މަސައްކަތް ކުރައްވާނެތޯ ކުރި ސުވާލަކަށް ޖަވާބު ދެއްވަމުން ރިޔާޒް ވިދާޅުވީ، އެމްއެންޕީއިން އަބަދުވެސް ގެންގުޅޭނީ ރައްޔިތުންނަށް އެންމެ ފައިދާ ހުރި ސިޔާސަތުތައް ކަމަށެވެ. އަދި އިދިކޮޅު ފަރާތްތަކުން އެ ބޭފުޅުންގެ ދައުރު އެންމެ ފުރިހަމައަށް އަދާ ކުރައްވަމުން ނުގެންދަވާ ކަމަށް އިޝާރާތް ކުރައްވަމުން އަބްދުﷲ ރިޔާޒް ވިދާޅުވީ، ސަރުކާރުގެ ސިޔާސަތުތަކަށް އެންމެ ފުރަތަމަ ދެކޮޅު ހަދަން ޖެހޭނީ އިދިކޮޅު ފަރާތްތަކުން ކަމަށާއި އެހެން ނަމަވެސް އެކަން މިއަދު ނުފެންނަ ކަމަށެވެ. މިގޮތުން އެގްރީމެންޓްތަކުގެ މައްސަލައިގައި މަޖިލީހުގެ ޤައުމީ ސަލާމަތާ ބެހޭ ކޮމިޓީ (241 ކޮމިޓީ)އަށް މައްސަލަ ހުށަހަޅައިފައި ނުވާ ކަަމަށް އިޝާރާތް ކުރައްވަމުން ރިޔާޒްވަނީ އެކަން ނުކުރައްވަނީ ކީއްވެތޯ ސުވާލު ކުރައްވައިފައެވެ.
"ސަރުކާރުގެ ސިޔާސަތުތަކާ އެންމެ ފުރަތަމަ އޮޕޯޒް ކުރަން ޖެހޭނީ އޮޕޮޒިޝަން. އޮޕޮޒިޝަނުން އެންމެ ފަހަރަކު ވެސް އެބައޮތްތޯ ތި ވިދާޅުވާ އެގްރީމެންޓް ބަލަން ވެގެން 241 ކޮމިޓީއަށް ވައްދައިފައި. ނެތް. ކީއްވެތޯ ނުވައްދަނީ. މަޖިލީހުގެ ރައީސަށް އެޑްރެސްކޮށް ސިޓީއެއް ފޮނުވައިފައި އޮތީމަ އޭގެ ޖަވާބުގައި އޮތް 241އަށް ހުށަހަޅަން. 241 ކޮމިޓީގައި ހިމެނޭ ހުރިހާ ޕާޓީތަކެއް. ކީއްވެތޯ ނުފޮނުވީ" ރިޔާޒް ވިދާޅުވިއެވެ.
ރިޔާޒްގެ ވާހަކަފުޅުގައި އިތުރަށް ވިދާޅުވީ އެމްއެންޕީ ވުޖޫދުވާ ހިސާބުން އެ ޕާޓީއަށް 241 ކޮމިޓީއިން ޖާގަ ލިބޭނެ ކަމަށާއި ފުރަތަމަ ކަމަކަށް ރައްޔިތުން ކަންބޮޑުވާ އެގްރީމެންޓްތަކުގެ މައުލޫމާތު ހޯދުމުގެ މަސައްކަތް ކުރައްވާނެ ކަމަށެވެ. އަދި އެ ޕާޓީގެ ވިސްނުމަކީ ޑިސިޕްލިންކޮށް، ޕްރޮފެޝަނަލްކޮށް ކަންކަން ކުރުން ކަމަށާއި ޤައުމުގައި ތިބޭ ޑިޕްލޮމެޓުންނަށް ބްލީކޮށް ހެދުމަކީ އެ ޕާޓީގެ ފިކުރެއް ނޫން ކަމަށް ވިދާޅުވިއެވެ.
"އަޅުގަނޑުމެން ދެކޮޅޭ ދިވެހިރާއްޖޭގައި ބޭރުގެ އެއްވެސް ބަޔެއްގެ މިލިޓަރީ ޕްރެޒެންސެއް ދާއިމަށް ތިބުން އެއީ އަޅުގަނޑުމެން ދެކޮޅު ހަދާ ކަމެއް. ޤައުމީ ޕާޓީން ދެކޮޅު ކަމެއް. އަޅުގަނޑުމެން މިބުނަނީ އަޅުގަނޑުމެން ބަލަން ޖެހޭ އެ އެއްބަސްވުންތަކުގައި ހުރީ ކޯއްޗެއްތޯ. އެމީހުންގެ ޕްރެޒެންސް ހުރީ ކިހިނެއްތޯ ބެލިގެންނޭ އެއަށް ސީދާ ސްޕެސިފިކްކޮށް އެއަށް އޮޕޯޒްކޮށްގެން " ރިޔާޒް ވިދާޅުވީ އަބަދުވެސް ކަންތައް ކުރައްވާނީ ހުރިހާ ރައްޔިތުންނަށް ފައިދާވާ ގޮތަކަށް ކަމަށެވެ. "އަޅުގަނޑުމެން އެމްއެންޕީއިން ޤަބޫލު ކުރަނީ އޮންނަން ޖެހޭނީ ދިވެހިންނަށް އެންމެ ރަނގަޅަށް ކަންތައް ވާނެ ގޮތަކަށް ހުރިހާ ފަރާތްތަކަށް، ވަކި ބައެއްގެ އުނގަށް ވެއްޓިގެނެއް ނޫނޭ. އެއްވެސް ޤައުމެއް އެއީ މާ މުހިންމު ޤައުމަކަށް ވެގެން ނުވާނެ. އަޅުގަނޑުމެން ވީހާ ވެސް ބޮޑަކަށް، ވީހާ ވެސް ގިނަ ޤައުމުތަކުގެ އެހީތެރިކަމާއެކުގައި ދިވެހިންނަށް ފައިދާވާނެ ކަންތައްތަކެއް ހޯދުމަށޭ އަޅުގަނޑުމެން މަސައްކަތް ކުރަން ޖެހޭނީ."
އެމްއެންޕީ ކުރިޔަށް އޮތް ދުވަސްތަކުގައި މަސައްކަތް ކުރާނީ އިދިކޮޅުގައިތޯ ނުވަތަ ސަރުކާރާއެކުގައިތޯ ކުރި ސުވާލަށް ޖަވާބު ދެއްވަމުން ރިޔާޒް ވިދާޅުވީ އެ ނިންމުން ނިންމާނީ ޕާޓީގެ ކައުންސިލުން ކަމަށެވެ
"އަޅުގަނޑުމެންގެ ޕާޓީ ރެޖިސްޓްރީވާ ހިސާބުން އަޅުގަނޑުމެންގެ ޕާޓީގެ ކައުންސިލުން ނިންމާނެ އަޅުގަނޑުމެންނަކީ ސަރުކާރާ އެކުގައި ތިބި ބައެއްތޯ ނުވަތަ ނޫންތޯ" ރިޔާޒް ވިދާޅުވިއެވެ.
އަބްދުﷲ ރިޔާޒް އަދި ދަނގެތީ ދާއިރާގެ މެންބަރު މުޙައްމަދު ނާޒިމް އިސްކޮށް ހުންނަވައިގެން ސިޔާސީ ޕާޓީއެއް އުފެއްދުމަށް 5،000 މީހުންގެ ފޯމާ އެކު އިލެކްޝަން ކޮމިޝަނަށް ވަނީ ހުށަހަޅައިފައެވެ.
