ތަހުޒީބު މުޖުތަމައުއެއްގެ ތަސައްވުރު ހަގީގަތަކަށް ހަދަން ރައީސް ގޮވާލައްވައިފި

މާނަވީ އިންސާނީ ބިނާކުރުމާއި ޢުމްރާނީ ތަރައްގީ ހާސިލުވެފައިވާ ތަހުޒީބު މުޖުތަމައުއެއްގެ ތަސައްވުރު ހަގީގަތަކަށް ހެދުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ގޮވާލައްވައިފިއެވެ.
އެމަނިކުފާނު މިފަދައިން ގޮވާލެއްވީ، ޒުވާނުންގެ މަރުކަޒުގައި ރޭ ބޭއްވި ރާއްޖޭގެ ޖުމްހޫރީ ދުވަހުގެ މިއަހަރުގެ ރަސްމީ ޖަލްސާގައި، ގައުމާ މުހާތަބުކުރައްވަމުންނެވެ.
އެގޮތުން ޖުމްހޫރީ ދުވަހެއްގައި ޝިޢާރަކަށްވާންވީ، "ދިވެހީންގެ ރާއްޖެ – ތަހުޒީބު މުޖުތަމައު" ކަމުގައި އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
ހަމަމިއާ އެކު، ސަރުކާރުގެ ތަރައްގީގެ ސިޔާސަތު ބައްޓަންކޮށްފައި ވަނީ އިސްލާމްދީނުގެ މައްޗަށް ބިނާވެފައިވާ، މާނަވީ އިންސާނީ ބިނާކުރުމާއި، މާއްދީ ޢުމްރާނީ ބިނާކުރުމުގެ މައްޗަށްކަމުގައި ވިދާޅުވެ، ރައީސުލްޖުމްހޫރިއްޔާ ވަނީ، ގައުމެއްގެ ކުރިއެރުމުގެ ފުރާނައަކީ އުންމީދީ ވިސްނުމާއި ހަމަޖެހުމާއި އެއްބައިވަންތަކަންކަމުގައި ފާހަގަކުރައްވާފައެވެ.
ރައީސުލްޖުމްހޫރިއްޔާ ވިދާޅުވި ގޮތުގައި، އެމަނިކުފާނުގެ ތަސައްވުރަކީ ދިވެހި ގައުމިއްޔަތުގެ ތަރަހައިގެ މަތީގައި ރާއްޖެ އާ ޒަމާނަކަށް ހިނިތުންކުރުމެވެ. އެގޮތުން އިސްލާމްދީނުގެ ވަރުގަދަ ބިންގަލުގެ މަތީގައި މިނިވަންކަމާއި ސިޔާދަތު ހިމާޔަތްކުރެވިފައިވާ، ފަރުދީ އަދި ގައުމީ ފާގަތިކަން ކަށަވަރުވެފައިވާ، މޫސުމީ އަދި ދުނިޔަވީ އަސަރުތަކަށް ވިލުންތެރި ގައުމެއް ބިނާކުރުމަކީ އެމަނިކުފާނުގެ އަމާޒުކަމުގައި ވިދާޅުވިއެވެ. އަދި ހުރިހާ މާނައެއްގައި ޝާމިލު، ގުޅުންތެރިކަން ގާއިމުކުރެވިފައިވާ، އީޖާދީ އަދި އުފެއްދުންތެރި އިގުތިސާދެއްގެ ވެރި، ދުޅަހެޔޮ ތައުލީމީ ހުނަރުވެރި ރައްޔިތެއް ދިރިއުޅޭ، އިތުބާރު ލިބިގެންވާ ތަހުޒީބު މުޖުތަމައުއަކަށް ރާއްޖެ ހެއްދެވުމަށް މަސައްކަތްޕުޅު ކުރައްވާނެކަމުގެ ޔަގީންކަން ރައީސުލްޖުމްހޫރިއްޔާ ދެއްވިއެވެ.
މި ރޫހުގައި، ގައުމީ އެއްބައިވަންތަކަމުގެ މުހިންމުކަމަށް އަލިއަޅުއްވައިލައްވަމުން އެމަނިކުފާނު ވިދާޅުވީ، ދިވެހީންނާ ހަމައަށް މި ގައުމު ވާރުތަވެފައި ވަނީ އެއް ބަހަކުން ވާހަކަދައްކާ، އެއް ދީނަކަށް ތަބާވާ، އެއް ސަގާފަތެއް ހިއްސާކުރާ، އަމާން ރައްކާތެރި ގައުމެއްގެ ގޮތުގައިކަމަށެވެ. އަދި ރާއްޖެ ހޯދާފައިވާ ހުރިހާ ކުރިއެރުމެއްގެ އަސްލަކީ ދިވެހީންގެ އުންމީދީ ވިސްނުމާއި، އަހުވަންތަ އެކުވެރިކަމާއި، ގައުމީ ސަފުތަކުގެ ބަދަހިކަންކަމުގައި އެމަނިކުފާނު ފާހަގަކުރެއްވިއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.