އެޗްޑީސީން ހުޅުމާލޭގައި ކުރިއަށް ގެންދާ ކޮމިއުނިޓީ އާބަން ފާމިން މަޝްރޫއު އިފްތިތާހްކޮށްފި
ހުޅުމާލޭގައި ދިރިއުޅޭ އަންހެނުން ބާރުވެރި ކުރުވުމާއި މުޖްތަމައުގައި އުޅޭ މީހުންގެ ތެރެއިން އަޅައިލުން އެންމެ ބޮޑަށް ބޭނުންވާ "ވަލްނަރަބަލް" ފަރާތްތަކާއި، ކޮވިޑް19ގެ ސަބަބުން މާލީގޮތުން އެންމެ ބޮޑަށް އަސަރުކޮށްފައިވާ ފަރާތްތަކަށް، ދެމެހެއްޓެނިވި ގޮތެއްގެ މަތިން އެކަށީގެންވާ އާމްދަނީއެއް ހޯދޭނެ މަގު ފަހިކޮށްދިނުމަށް ޓަކައި ހައުސިން ޑިވެލޮޕްމަންޓް ކޯޕަރޭޝަނުން ހުޅުމާލޭގައި ކުރިއަށް ގެންދާ ކޮމިއުނިޓީ އާބަން ފާމިންގެ މަޝްރޫއު ރަސްމީކޮށް އިފްތިތާހުކޮށްފިިއެވެ.
މިކަމަށް ޓަކައި މިއަދު ހުޅުމާލޭގައި ބޭއްވި ހާއްސަ ރަސްމިއްޔާތެއްގައި މިމަޝްރޫއު އިފްތިތާހް ކޮށްދެއްވައިފައި ވަނީ ފިޝަރީޒް މެރިން ރިސޯސަސް އެންޑް އެގްރިކަލްޗަރ މިނިސްޓަރު ޑރ. ހުސައިން ރަޝީދު ހަސަނެވެ.
މިމަޝްރޫއުގެ ދަށުން ދަނޑުވެރިކަން ކުރަން 16 ގުރޫޕަކާ ހަވާލުކޮށްފައިވާކަމަށް އެޗްޑީސީން ބުނެފައި ވެއެވެ. މިއަދު ބޭއްވި ރަސްމިއްޔާތުގައި ހުޅުމާލޭގައި އާބަން ފާމިންގެ މަސައްކަތްކުރާ ފަރާތްތަކަށް އެ މަސައްކަތްކުރުމަށް ބިން ވެސް ވަނީ ހަވާލުކޮށްފައެވެ.
އެޗްޑީސީން ވިދާޅުވި ގޮތުގައި މި މަޝްރޫއަކީ އެކުންފުނިން ބޭރުގެ ބަޔަކާ ގުޅިގެން ކުރިއަށްގެންދާ ގުޅިގެން ހިންގާ މަޝްރޫއެވެ. މިގޮތުން މިމަޝްރޫއު ހިންގައިފައި ވަނީ ޖަޕާނުގެ ހިލޭ އެހީގެ ދަށުންކަމަށް ވެސް އެ ކުންފުނިން ވިދާޅުވިއެވެ.
އާބަން ފާމިންގެ މަޝްރޫއު އިިފްތިތާހް ކުރުމަށް ބޭއްވި މިހާއްސަ ރަސްމިއްޔާތުގައި އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުރުން ހުޅުމާލެ ދާއިރާގެ މަޖިލިސް މެމްބަރު އަލީ ނިޔާޒު ވެސް ވަނީ ބައިވެރިވެޑައިގެންފައެވެ. އަދި ޖަޕާނުން ރާއްޖެއަށް ކަނޑައަޅުއްވައިފައި ހުންނަވާ ސަފީރު ކެއިކޯ ޔަނާއިއާއި ޔޫއެންޑީޕީން ރާއްޖެއަށް ކަނޑައަޅުއްވައިފައި ހުންނަވާ ރެސިޑަންޓް ރިޕްރެސެންޓޭޓިވް ވޭރާ ހާކިމް ވަނީ ބައިވެރިވެވަޑައިގަންފައެވެ.
Ads by STO
