ސީއެޗްއެސްއީގެ އިސްލާމް ޓީޗަރު ކުއްލި ގޮތަކަށް ނިޔާވެއްޖެ
ސީއެޗްއެސްއީގެ އިސްލާމް ޓީޗަރު ސުއޫދު މުހައްމަދުފުޅު މިއަދު ކުއްލިގޮތަކަށް ނިޔާވެއްޖެއެވެ.
ސުއޫދު ކުއްލި ގޮތަކަށް ނިޔާވީ، ނިދާފައި އޮއްވައި ނޭވާ ލާން އުނދަގޫވެގެން ހޮސްޕިޓަލަށް ގެންދިޔަތާ މާ ގިނައިރުތަކެއް ނުވެ ރޭ ފަތިހު ކަމަށް ސީއެޗްއެސްއީން މަޢުލޫމާތުދެއެވެ.
ސުއޫދު ނިޔާވުމާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނުގައި ވިދާޅުވެފައި ވަނީ ތަޢުލީމީ ދާއިރާއަށް އަގުހުރި ޚިދުމަތްތަކެއް ކުރައްވަމުން ގެންދެވި ސުއޫދު ނިޔާވުމާ ގުޅިގެން، ޢާއިލާއަށް، މިނިސްޓަރ އޮފް އެޑިޔުކޭޝަނާއި، މިނިސްޓްރީގެ އިސްވެރިންނާއި އެންމެހާ މުވައްޒަފުންގެ ނަމުގައި އިޚްލާޞްތެރި ތަޢުޒިޔާ ދަންނަވާ ކަމަށެވެ.
ސުއޫދު ވަނީ 22 އަހަރުގެ ދިގު މުއްދަތަކަށް ތަޢުލީމީ ދާއިރާއަށް ޚިދުމަތް ކުރައްވައިފައެވެ. އެގޮތުން އަމީނިއްޔާ ސްކޫލް އަދި ސެންޓަރ ފޮރ ހަޔަރ ސެކަންޑަރީ އެޑިޔުކޭޝަންގައި އިސްލާމް މުދައްރިސެއްގެ ގޮތުގައި މަސައްކަތް ކުރެއްވިއެވެ. މީގެ އިތުރުން ސުއޫދު ނިޔާވިއިރު އޭނާ އައީ ސީއެޗްއެސްއީގެ އިސްލާމް ޓީޗަރެއްގެ އިތުރުން އިސްލާމިކް ޔުނިވާސިޓީގެ ޕާޓް ޓައިމް ލެކްޗަރާއެއްގެ ގޮތުގައި މަސައްކަތް ކުރަމުންނެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
އިންނާ ލިއްލާހި ވައިންނާ އިލައިހި ރާޖިޢޫން.
ޔާ ﷲ ، އުސްތާޛް ސުޢޫދު އެވަނީ އިބްﷲ ގެ ހަޟްރަތަށް ރުޖޫޢަ ވެފައެވެ. އޭނާއަށް ރަޙްމަތްލައްވައި ފާފަ ފުއްސަވާނދޭވެ. އޭނާއަށް ކައްވަޅުގެ ޢަޒާބު ލުއިކޮށް ދެއްވާނދޭވެ.