މި ފެންނަނީ އަނެއްކާ ވެސް ވަޒީފާއަށް ބިރު ދައްކާ މަންޒަރު: ވައްޑެ
މި އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ވެރިކަން ކުރާ މޯލްޑިވްސް ޑިމޮކްރަޓިކް ޕާޓީ (އެމްޑީޕީ)ގެ ދާއިރާތަކުގެ އިންތިޚާބާ ދިމާކޮށް ސަރުކާރުގެ ކުންފުނިތަކާއި ވުޒާރާތަކުގައި އުޅުއްވާ ފަރާތްތަކުން އެ ތަންތަނުގެ މުވައްޒިފުންނަށް ވަޒީފާގެ ބިރު ދައްކަމުން އަންނަ ކަމަށް އެމްޑީޕީގެ އުނގޫފާރު ދާއިރާގެ މެންބަރު މުޙައްމަދު ވަހީދު (ވައްޑެ) ވިދާޅުވެއްޖެއެވެ.
އެމްޑީޕީގެ ރައީސް ނަޝީދަށް ތާއީދު ކުރައްވާ ފަރާތްތަކުންދަނީ ސަރުކާރުގެ ވުޒާރާތަކާއި ކުންފުނިތަކުގެ ވެރިން އިންތިޚާބާ ދިމާކޮށް ބާރުގެ ބޭރުން ނުހަމަ ގޮތުގައި ބޭނުން ކުރަމުންދާ ކަމަށް ތަކުރާރުކޮށް ވިދާޅުވަމުންނެވެ.
މިއަދު ވައްޑެ ކުރެއްވި ޓްވީޓެއްގައި ވިދާޅުވީ، 2018 ވަނަ އަހަރު އެމްޑީޕީން، މިވެރިކަން ގެނައުމަށް ވީ އެންމެބޮޑު އެއް ވަޢުދަކީ ވަޒީފާގެ ބިރުދެއްކުން ހުއްޓުވާނެ ކަމަށެވެ. އެހެން ނަމަވެސް މިއަދު އެ ޕާޓީގެ އެތެރޭގެ އިންތިޚާބާ ދިމާކޮށް، ސަރުކާރުގެ އިސް ބައެއް ބޭފުޅުންނާ ކުންފުނިތަކުގެ ވެރިން ވަރަށް ހުތުރުކޮށް މި ބިރު އަލުން އެބަފަތުރާ ކަމަށް ވައްޑެ ވިދާޅުވިއެވެ. ވައްޑެ ވިދާޅުވީ، އިންތިޚާބުގައި މިފަދަ ފަރާތްތަކުން ޕާޓީ ސާފު ވާނެ ކަމަށް އުންމީދު ކުރައްވާ ކަމަށެވެ.
ވައްޑެ ވަނީ މީގެ ކުރިން ވެސް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ޑެޕިއުޓީ ލީޑަރު އަދި ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން އެމްޑީޕީގެ އިންތިޚާބަށް ނުފޫޒު ފޯރުވަމުންދާކަމަށް ބުނެފައެވެ.
އިންތިޚާބުގެ ދުވަސް ކުޑަތަންވާ ވަރަކަށް އިންތިޚާބުގައި ރައީސް ނަޝީދާއި، ރައީސް ޞާލިހަށް ތާއީދު ކުރާ މެމްބަރުންގެ ވާދަވެރިކަން ބޮޑުވެ، ޕާޓީގެ ކޮންޓްރޯލް ހޯދުމަށް ދަނީ ކެންޕެއިން ކުރައްވަމުންނެވެ.
