ޖެންޑާގެ ބެލުމުގެ ދަށުގައި ހުރި ކުއްޖަކާ މެދު އަމަލުކުރި ގޮތުން މުވައްޒިފަކު ސަސްޕެންޑު ކޮށްފި
ދެކުނުގެ ރަށެއްގައި ޖެންޑާގެ ބެލުމުގެ ދަށުގައި ހުރި ކުއްޖަކާ މެދު އަމަލުކުރި ގޮތުން މުވައްޒިފަކު ސަސްޕެންޑު ކޮށްފިއެވެ.
ޖެންޑާ މިނިސްޓްރީން އިއްޔެ ބުނީ ދައުލަތުގެ ބެލުމުގެ ދަށުގައި ދެކުނުގެ އަތޮޅެއްގައި ހުރި ކުއްޖެއް ރޭގެ ވަގުތެއްގައި، އެކުއްޖާ ހުރި ރަށުގެ ހޮސްޕިޓަލަށް ގެންގޮސްފައިވާ ކަަމަށެވެ.
ފަރުވާ ދޭން ހޮސްޕިޓަލަށް ގެންދިޔަ އެ ކުއްޖާއަކީ ނަފްސާނީ ބައްޔަށް ބޭސް ކުރަމުން އަންނަ ކުއްޖެއް ކަމަށް ވެސް ޖެންޑާއިން ބުންޏެވެ.
"ކުއްޖާގެ ހާލު މިވަގުތު ރަނގަޅު، އަދި ސްޓޭބަލް. މިކަމާ ގުޅިގެން މި ސަރވިސްއިން ބަލަން ޖެހޭ ކަންކަން ހުރިކަމަށް ފެންނާތީ އެކަންކަން ބަލަން މިހާރު ވަނީ ފަށައިފަައި. މިކަމުގެ މައުލޫމަތު އޮމްބަޑްސް ޕާސަންއާ ވަނީ ހިއްސާ ކުރެވިފައި.ކުއްޖާގެ ކަންކަމާ ގުޅިގެން ބަލަން ޖެހޭ ކަންތައްތަކެއް ހުރުމުން އެ ކަންކަން ބަލާ ނިމެންދެން މުވައްޒިފަކު ވަނީ ސަސްޕެންޑް ކޮށްފައި" ޖެންޑާއިން މިއަދު ބުނެފައިވެއެވެ.
ޖެންޑާއިން އިތުރަށް ބުނީ، މި މުވައްޒިފު ސަސްޕެންޑް ކޮށްފައި ވަނީ ކުއްޖާއާ މުއާމަލާތް ކުރަން ޖެހޭ މޭރުމާ ހިލާފަށް މުއާމަލާތް ކުރުމާއި ކުއްޖާ ބެލެހެއްޓުމުގައި ކުއްޖާއާ މެދު އަމަލު ކުރަން ނުޖެހޭ ގޮތަށް އަމަލުކޮށްފައިވާތީ ކަމަށެވެ.
