ސާފް ޗެމްޕިއަންޝިޕުގެ ޓިކެޓް މާދަމާ ހެނދުނު ވިއްކަން ފަށަނީ
މާދަމާއިން ފެށިގެން އުރީދޫ ސާފް ޗެމްޕިއަންޝިޕްގެ ޓީކެޓް ވިއްކުމަށް ހަމަޖެހިފައިވާކަމަށް ފުޓްބޯލް އެސޯސިއޭޝަން އޮފް މޯލްޑިވްސްއިން ވިދާޅުވެއްޖެއެވެ.
އެ އެސޯސިއޭޝަނުން ވިދާޅުވީ މާދާމާ ޓިކެޓް ވިއްކުމަށް ހަމަޖެހިފައި ވަނީ މިއަންނަ ހުކުރު ދުވަހު ކުޅޭ މެޗްގެ ޓިކެޓްތައް ކަމަށެވެ. ޓިކެޓް ވިއްކުމަށް ހަމަޖެހިފައި ވަނީ މާދަމާ ހެދުނު 10:00 ޖަހާއިރުއެވެ.
ޓިކެޓް ދޫކުރަން ހަމަޖެހިފައި ވަނީ އޮލިމްޕަސް ކުރިމައްޗަށް ހުންނަ ޓިކެޓު ކައުންޓަރުން ކަމަށް ފުޓްބޯލް އެސޯސިއޭޝަނުން ވިދާޅުވެއެވެ. އަދި ކޮންމެ މެޗެއްގެ ޓިކެޓް ވިއްކުމަށް ހަމަޖެހިފައި ވަނީ މެޗް އޮންނަ ދުވަހުގެ އެއް ދުވަސް ކުރިން ކަމަށް ވެސް އެ އެސޯސިއޭޝަނުން ވިދާޅުވިއެވެ.
ހުކުރު ދުވަހު ހަވީރު ކުޅުމަށް ހަމަޖެހިފައިވާ މެޗްގައި ބައްދަލުކުރާނީ ސްރީލަންކާއާއި ބަނގްލަދޭޝް އަދި އެރޭ ކުޅުމަށް ހަމަޖެހިފައިވާ މެޗްގައި ބައްދަލުކުރާނީ ނޭޕާލްއާއި ދިވެހިރާއްޖެއެވެ.
ރާއްޖެ ކުޅޭ ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހު ނުކުންނާނީ ބަނގްލަދޭޝްއާ ދެކޮޅަށެވެ. ތިންވަނަ މެޗުގައި އޮކްޓޯބަރު 10ގައި ރާއްޖެ ކުޅޭނީ ސްރީލަންކާއާ ދެކޮޅަށެވެ.
