ހާފްޓައިމްގައި ސަޕޯޓަރުންނަށް ބޭރަކަށް ނުދެވޭނެ
މި އަންނަ ހުކުރު ދުވަހު ރާއްޖޭގައި ފެށޭ އުރީދޫ ސާފް ޗެމްޕިއަންޝިޕްގައި ދަނޑަށް ވަންނަ ސަޕޯޓަރުންނަށް ހާފް ޓައިމްގައި ބޭރަކަށް ނުނިކުމެވޭނެއެވެ.
އެފްއޭއެމްއިން ވިދާޅުވީ މީގެ ކުރިން ބާއްވާ މެޗްތަކުގައި ސަޕޯޓަރުންނަށް ހާފްޓައިމް ގައި ބޭރަށް ނިކުމެވުނު ނަމަވެސް މިފަހަރު ދަނޑަށް ވަންނަ ސަޕޯޓަރުން މެޗު އެއްކޮށް ނިމެންދެން ދަނޑުގައި މަޑުކުރަން ޖެހޭނެ ކަމަށެވެ.
ސާފް ޗެމްޕިއަންޝިޕްގެ ފުރަތަމަ ދެ މެޗްގެ ޓިކެޓް މިއަދުން ފެށިގެން ވިއްކުމަށް ވަނީ ހަމަޖެހިފައެވެ. ޓިކެޓް ވިއްކާން ފެށުމަށް ހަމަޖެހިފައި ވަނީ މިއަދު ހެދުނު 10:00 ޖަހާއިރުއެވެ.
ޓިކެޓް ދޫކުރަން ހަމަޖެހިފައި ވަނީ އޮލިމްޕަސް ކުރިމައްޗަށް ހުންނަ ޓިކެޓު ކައުންޓަރުން ކަމަށް ފުޓްބޯލް އެސޯސިއޭޝަނުން ވިދާޅުވެއެވެ. އަދި ކޮންމެ މެޗެއްގެ ޓިކެޓް ވިއްކުމަށް ހަމަޖެހިފައި ވަނީ މެޗް އޮންނަ ދުވަހުގެ އެއް ދުވަސް ކުރިން ކަމަށް ވެސް އެ އެސޯސިއޭޝަނުން ވިދާޅުވިއެވެ.
ހުކުރު ދުވަހު ހަވީރު ކުޅުމަށް ހަމަޖެހިފައިވާ މެޗްގައި ބައްދަލުކުރާނީ ސްރީލަންކާއާއި ބަނގްލަދޭޝްއެވެ. އަދި އެ ރޭ ކުޅުމަށް ހަމަޖެހިފައިވާ މެޗްގައި ބައްދަލުކުރާނީ ނޭޕާލްއާއި ދިވެހިރާއްޖެއެވެ.
ރާއްޖެ ކުޅޭ ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހު ނުކުންނާނީ ބަނގްލަދޭޝްއާ ދެކޮޅަށެވެ. ތިންވަނަ މެޗުގައި އޮކްޓޯބަރު 10ގައި ރާއްޖެ ކުޅޭނީ ސްރީލަންކާއާ ދެކޮޅަށެވެ.
Ads by STO
