"ހޭ އަރުވައިލާނެ" ކަމަށް ބުނެ އިންޒާރު ދިނުމުން، ފުލުހުން އެކަން ނުބެލި މައްސަލައެއް
"ހޭ އަރުވައިލާނެ" ކަމަށް ބުނެ އަންހެން ކުއްޖަކަށް މީހަކު އިންޒާރު ދިނުމުން، ފުލުހުން އެކަން ނުބެލި މައްސަލައެއް ފެންމަތިވެއްޖެއެވެ.
މިކަން ފެންމަތިވެފައި ވަނީ މީސް މީޑިއާ އެކްޓިވިސްޓް ލަމްހާ އަސްލަމް، މިކަމާ ގުޅޭގޮތުން ރޭ ކުރި ޓްވީޓަކާ ގުޅިގެންނެވެ.
ލަމްހާ ބުނެފައި ވަނީ އޭނާގެ އެކުވެރިއަކާ ދިމާލަށް މީހަކު، "ހުރި ތަނަކުން ހޯދައިގެން ހޭއަރުވައިލާނަން" ކަމަށް ބުނެ އިންޒާރު ދިނުމުން، އެކުވެރިޔާ ގޮވައިގެން ފުލުހުންގެ ހެޑްކުއާޓާސްއަށް ދިޔަ ކަމަށެވެ. ނަމަވެސް އެއީ "އިންޒާރެއް" ކަމަށް ނުބެލެވޭ ކަމަށް ފުލުހުންގެ އޮފިސަރު ވިދާޅުވި ކަމަށް ބުނެފައި ވެއެވެ.
މިކަމާ ގުޅޭ ގޮތުން "ދެން"އަށް މައުލޫމާތު ދެމުން ލަމްހާގެ އެ އެކުވެރިޔާ ބުނީ، އޭނާއަށް އިންޒާރު ލިބުނީ މީގެ އަހަރުތަކެއް ކުރިން އޭނާ ކުރި ޓްވީޓަކާ ގުޅިގެން ކަމަށެވެ.
"އަޅުގަނޑު ޓްވީޓު ކުރީ އަންހެން ޓީޗަރަކު ސްކޫލެއްގެ ދަރިވަރަކަށް ހަނގާ ކުރުމާ ގުޅިގެން. އެ ޓީޗަރުގެ ފިރިހެން ކޮއްކޮ ދެން ގުޅީ، އެ ހާދިސާ ދިމާވި (ހަނގާގެ ޝިކާރައަށްވި) ކުއްޖާގެ ނަން ހޯދަން. ނަން ނުބުނާނަން ކަމަށް ބުނީ އޭނަ ރުޅި އައިސްގެން ބުނީ ކަލޭ ހުރި ތަނަކުން ހޯދައިގެން ހޭ އަރުވައިލާނަމޭ، ކަލެއަށް ރަށަކަށް ވެސް ނޭރެވޭނޭ މާލެއަކު ވެސް ނޫޅެވޭނޭ" އެ އަންހެން ކުއްޖާ ކިޔައިދިނެވެ.
އޭނަ އިތުރަށް ބުނީ މިކަމާ ގުޅިގެން ރޭ ފުލުސް އޮފީހަށް ގޮސް މައްސަލަ ހުށަހެޅުމުން އެތަނުގައި އިންނެވި އޮފިސަރު ވިދާޅުވީ، އިންޒާރެއް ކަމަށް ހަމައެކަނި ބެލެވެނީ އެއީ މަރުގެ އިންޒާރެއްވާ ނަމަ ކަމަށެވެ.
މިކަމާ ގުޅިގެން ފުލުހުންގެ ބަހެއް އަދި ލިބިފައެއް ނުވެއެވެ.
