ފޮށިތައް ފުނޑުފުނޑު ކޮށްލުމަށް ފަހު އެގްރީމެންޓްތައް ނެރޭނެ ދުވަސް ގާތް ވެއްޖެ: ޝުޖާއު
އިންޑިއާއާޗއެކު ދިވެހި ސަރުކާރުން ހަދައިފައިވާ އެގްރީމެންޓްތައް ރައްޔިތުންނަށް ހާމަ ކުރާނެ ދުވަސް ވަރަށް ގާތްވެއްޖެކަމަށް ޕީއެންސީގެ ނައިބު ލީޑަރު، ހުޅުމާލޭ ދާއިރާގެ ކައުންސިލަރު އިބްރާހިމް ޝުޖާއު ވިދާޅުވެއްޖެއެވެ.
އިދިކޮޅުން "މިނިވަން ކަމުގެ ދިފާއުގައި"ގެ ނަމުގައި ކުރިޔަށް ގެންދިއުމަށް ނިންމައިފައިވާ ކެންޕެއިން ލޯންޗް ކުރުމަށް މިރޭ ކާނިވާ ސަރަހައްދުގައި ބޭއްވި ޖަލްސާގައި ވާހަކަ ދައްކަވަމުން ޝުޖާއު ވަނީ އިންޑިއާއާއި ރާއްޖެއާ ދެމެދު އޮންނަ ގުޅުމަށް ވަރަށް ބޮޑަށް ފާޑު ވިދާޅުވެފައެވެ. މިގޮތުން އިންޑިއާއާ އެކު ރާއްޖެއިން ހަދައިފައިވާ އެގްރީމެންޓްތައް މިހާރުން މިހާރަށް ހާމަ ކުރަން ޖެހޭ ކަމަށް ވިދާޅުވިއެވެ.
ޝުޖާއުގެ ވާހަކަފުޅުގައި ވިދާޅުވީ، އިދިކޮޅުގައި ތިބިއިރު އެމްޑީޕީއިން ދައްކަމުން އައީ މައުލޫމާތު ހޯދައި ލިބިގަތުމުގެ ޤާނޫންގެ މުހިންމު ކަމުގެ ވާހަކަ ކަމަށެވެ. އެހެން ނަމަވެސް ސަރުކާރަށް އައިސް އިންޑިއާއާ އެކު ސިއްރު އެގްރީމެންޓްތައް ހަދައި، އެ ފޮރުވަން މަސައްކަތްކޮށްފައިވާ ކަމަށް އޭނާ ވިދާޅުވިއެވެ. އަދި މިކަން މިގޮތަށް ކުރުމުން ދިވެހި މީޑިއާތަކާއި ދިވެހި ލޮބުވެތި ރައްޔިތުން މިކަމުގެ ކަންބޮޑުވެ، އެގްރީމެންޓްތައް ހޯދުމަށް އެދުމުން، އެ ހާމަކޮށްފިނަމަ ޤައުމީ ސަލާމަތަށް ނުރައްކާވާނެ ކަމަށް ބުނުމުން އެކަމަށް ޝުޖާއު ވަނީ ރައްދު ދެއްވައިފައެވެ. މިގޮތުން ވިދާޅުވީ އެގްރީމެންޓްތައް ހޯދަނީ އޭގައި ޤައުމީ ސަލާމަތަށް ނުރައްކާ ވާފަދަ ކަންތައްތައް ހިމަނައިފައި ހުރުމުން ކަމަށާއި އެގްރީމެންޓްތައް ރައްޔިތުންނަށް ހާމަ ކުރަން ދެން މާ ގިނަ ދުވަހެއް ނެތް ކަމަށެވެ.
"އެގްރީމެންޓްތަކެއް ނުބެހެއްޓޭނެ ފޮށިތަކަށް ލައިފައެއް. ފުނޑުފުނޑުކޮށްލައިފައި ތިޔަ އެގްރީމެންޓްތައް އަޅުގަނޑުމެން ރައްޔިތުންނާ ހަމައަށް ހާމަކުރާނީ. ތިޔަ ފޮށިތަކުން އެގްރީމެންޓްތައް ނެރެ، ކޯޓުތަކުގައި ތި އެގްރީމެންޓްތައް ހާމަ ކުރަން ޖެހޭ ވަގުތު ވަރަށް ކައިރިވެއްޖެ، އިންޝާﷲ." ޝުޖާއު ވިދާޅުވިއެވެ
ޝުޖާއު ވާހަކަފުޅުގައި އިތުރަށް ވިދާޅުވީ ވިދާޅުވީ ކޮޗިން ފެރީން ދިވެހިންގެ މުދާ ވެސް އިންޑިއާއަށް އެކްސްޕޯޓް ކުރެވޭނެ ކަމަށް ރައްޔިތުން މަޖިލީހުގެ އެމްޑީޕީ މެންބަރުން އޭރު ވިދާޅުވަމުން ގެންދެވި ކަމަށާއި ނަމަވެސް އެކަން ވެގެންދިޔައީ ބިލާހަކަށް ކަމަށެވެ. އަދި އޭގެން ދިވެހި ރާއްޖެއަށް އެތެރެވާ މުދާ ނުވެސް އެނގޭ ކަމަށް ވިދާޅުވަމުން ވިދާޅުވީ، ކޮޗިން ފެރީއަކީ ނުރައްކާތެރި އެއްޗެއް ކަމަށް ކުރިން ވެސް ވިދާޅުވަމުން އައި ކަމަށެވެ.
"އަޅުގަނޑުމެން ތިޔަ ލޮބުވެތި ރައްޔިތުންނަށް ދެންނެވިން ކޮޗިން ފެރީއަކީ ނުރައްކާއެއް އެކުލެވޭ ފެރީއެކޭ. ރައްޔިތުންގެ މަޖިލީހުގެ އެމްޑީޕީގެ މެންބަރުން ދިވެހި ރައްޔިތުންނަށް ވިސްނައިދެމުން ގެންދަނީ ކޮޗިން ފެރީއާ އެކީގައި ފަސް ރުފިޔާއަށް ލިބޭ އޮރެންޖް ލިބޭނޭ ދޮޅު ރުފިޔާއަށް، ލިބުނުތޯ" އޭނާ ވިދާޅުވިއެވެ.
މިރޭގެ ޖަލްސާގައި ވާހަކަ ދެއްކެވި ހުރިހާ ބޭފުޅުން ވެސް ވަރަށް ފާޅުކަން ބޮޑު ގޮތެއްގައި އިންޑިއާއާ ދެކޮޅަށް ވާހަކަ ދައްކަވައިފައި ވެއެވެ. "މިނިވަން ކަމުގެ ދިފާއުގައި ، ދިވެހީން" ކެންޕެއިނަކީ ރާއްޖޭގައި ޤާނޫނާ ޚިލާފަށް ތިބި އިންޑިއާ ސިފައިން ދެކޮޅަށް ހިންގާ ކެންޕެއިންނެވެ. މިގޮތުން ޤާނޫނާ ޚިލާފަށް ރާއްޖޭގައި ތިބި އިންޑިއާގެ އަސްކަރީ ސިފައިންނާއި ވަސީލަތްތައް ރާއްޖެއިން ބޭލުމަށް އިންޑިއާ ސަރުކާރަށް ގޮވައިލައި ޕެޓިޝަނެއް ހުށަހަޅަން އިދިކޮޅުން މިރޭ ނިންމާ، ޕެޓިޝަންގައި މިރޭ ވަނީ ސޮއި ކުރަން ފަށައިފައެވެ.
ސާބަހޭ. ސާބަހޭ. ޝުޖާޢު