އަޑިއަށް ދިޔަ ދޯނިން ގެއްލުނު 5 ދިވެހިން ފެނިއްޖެ
ފަސް މީހުންނާ އެކު މިއަދު ފަތިހު ކާށިދޫން ފުރައިގެން ޅ.އަތޮޅަށް ދަތުރުކުރަމުން ދިޔަ 60 ފޫޓުގެ ސަޕްލައި ދޯންޏެއް، ޅ.އަލިގާގެ ހުޅަނގުން 4 ނޯޓިކަލްމޭލު ބޭރުން އަޑިއަށް ގޮސްގެން ގެއްލުނު ފަސް ދިވެހިން ފެނިއްޖެއެވެ.
އެމްއެންޑީއެފްގެ މީޑިއާ އޮފިޝަލަކު ވިދާޅުވީ "ވައިވިލާ" ނަމަކަށް ކިޔާ އެ ދޯނިން ގެއްލުނު ފަސް ދިވެހިން ފެނިފައިވަނީ ކޯސްޓްގާޑުގެ އުޅަނދަށް ކަމަށެވެ.
އެމީހުން ފެނުނީ 8:30ހާއިރު ކަމަށާއި އެ ފަސް މީހުން ވެސް މިހާރު ކާށިދޫއަށް ގެންދާ ކަމަށް ވެސް އެމްއެންޑީއެފްއިން ވިދާޅުވިއެވެ. އެ އެންމެންގެ ހާލު ވެސް ރަނގަޅު ކަމަށް މައުލޫމާތު ލިބެއެވެ.
ސަޕްލައި ދޯންޏެއް އަޑިއަށް ގޮސްގެން އުޅޭކަމުގެ ރިޕޯޓް އެމްއެންޑީއެފްއަށް ލިބިފައި ވަނީ މިއަދު ފަތިހު 05:59 ހާއިރެވެ. އެ ދޯނީގައި ފަސް ދިވެހިން ދަތުރު ކުރި ކަމަށާއި އެމީހުން ގެއްލިގެން ހޯދަމުން ދިޔަ ކަމަށް ވެސް އެމްއެންޑީއެފްއިން ވަނީ މީގެ ކުރިން ރިޕޯޓު ކޮށްފައެވެ.
