ފޭސްބުކް ޑައުންވުމުން ޒަކަބާގްއަށް 6 ބިލިއަން ޑޮލަރުގެ ބޮޑު ގެއްލުމެއް

ރޭގެ ވަގުތެއްގައި ގަޑިއިރުތަކަކަށް ފޭސްބުކް، އިންސްޓަގްރާމް، ވަޓްސްއެޕް އަދި މެސެންޖާ ޑައުންވުމުން ބިލިއަނަރު މާކް ޒަކަބާގްއަށް 6 ބިލިއަން ޑޮލަރުގެ ބޮޑު ގެއްލުމެއް ލިބިއްޖެއެވެ.
މިއާއެކު ދުނިޔޭގެ އެންމެ މުއްސަނދި މީހުންގެ ލިސްޓުގެ 5 ވަނައަށް އޭނާ ވަނީ ވެއްޓިފައެވެ.
އިއްގެ މަދު ގަޑިއިރެއްގެ ތެރޭގައި ސްޓޮކް މާކެޓުގައި ފޭސްބުކް ވަނީ 4.9 އިންސައްތައަށް ދަށަށް ވެއްޓިފަ އެވެ. ބްލޫމްބާގްއިން ރިޕޯޓުކޮށްފައިވާ ގޮތުގައި ޒަކަބާގްގެ އަގު މީގެ ހަފްތާތަކެއް ކުރިން ހުރީ 140 ބިލިއަން ޑޮލަރުގައެވެ. ރޭގެ ހާދިސާއަށްފަހު އެ އަގު ވަނީ 121.6 ބިލިއަނަށް ވެއްޓިފައެވެ. މިއީ އިއްޔެ ލިބުނު 6 ބިލިއަން ޑޮލަރުގެ ގެއްލުމާއިއެކުއެވެ.
ދުނިޔޭގެ އެންމެ މުއްސަނދި މީހުންގެ ލިސްޓުގައި މީގެ ކުރިން ޒަކަބާގް އޮތީ ހަތަރުވަނައިގައެވެ. އެހެން ނަމަވެސް ރޭގެ ހާދިސާއަށް ފަހު އޭނާ ވަނީ ބިލް ގޭޓްސްއަށްވުރެ ފަހަތަށް ވެއްޓިފައެވެ. ބިލް ގޭޓްސްގެ އަގަކީ 125 ބިލިއަން ޑޮލަރެވެ.
ރޭ ގާތްގަނޑަކަށް 11 ޖެހިއިރު ފޭސްބުކްއާއި އިންސްޓަގްރާމް ޑައުންވިއެވެ. ހިދުމަތްތައް މުޅިން މެދުކެނޑުނީ ސާވާ ކްރޭޝްވުމުގެ ސަބަބުންނެވެ. ހިދުމަތްތައް އަލުން ލިބެން ފެށީ ރޭ ދަންވަރު 3 ޖެހިއިރުއެވެ.
ފޭސްބުކްއާއި އިންސްޓަގްރާމް ޑައުންވުމާ އެކު ޒަކަބާގް ވަނީ އާންމުންގެ ކިބައިން މައާފަށް އެދިފައެވެ. އޭނާ ބުނީ ސާވާ ޑައުންވީ ޓެކްނިކަލް މައްސަލައަކާ ގުޅިގެންކަމަށެވެ. އަދި ފޭސްބުކްއާއި އިންސްޓަގްރާމް، ވަޓްސްއެޕް އަދި މެސެންޖާއަކީ އެކަކު އަނެކަކު ގުޅުވައިލުމަށް މުހިންމު ވަސީލަތެއްކަން ގަބޫލުކުރާ ކަމަށް ވެސް ޒަކަބާގް ބުންޏެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.