ސާފް ޗެމްޕިއަންޝިޕްއަށް ފަހު ކޮވިޑް-19 ވޭދަނަތައް އިތުރު ވެދާނެކަމުގެ ބިރު
މިދުވަސްކޮޅު މާލޭގައި ކުރިއަށްދާ ސާފް ޗެމްޕިއަންޝިޕްއަށް ފަހު ކޮވިޑް-19 ވޭދަނަތައް އަނެއްކާ ވެސް އިތުރު ވެދާނެކަމުގެ ބިރު އޮތް ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާނު ޑރ. ނަޒްލާ މުސްތަފާ ވިދާޅުވެއްޖެއެވެ.
މިވަގުތު އެއް މަސް ދުވަހުގެ ޗުއްޓީއެއްގައި ހުންނެވި ޑރ. ނަޒްލާ އޮންލައިން ނޫހަކަށް މައުލޫމާތު ދެއްވަމުން ވިދާޅުވީ ސާފް މުބާރާތަށް ފަހު ކޮވިޑް ވޭދަނަތައް މައްޗަށް ދިއުމުގެ ފުރުސަތު އޮތް ކަމަށެވެ. ސަބަބަކީ ގިނަ ބަޔަކު އެއްވާ ދަނޑުގައި މާސްކު އެޅުމާއި އިޖުތިމާއީ ގައިދުރުމިން ނުބެހެއްޓުން ކަމުގައި ވެސް ވިދާޅުވިއެވެ.
ނަމަވެސް ޑރ. ނަޒްލާ ވިދާޅުވީ ޒުވާން އުމުރު ފުރައިގެ މީހުން ކޮވިޑުން ވެކްސިންގެ ދެ ޑޯޒް ޖަހައިފައިވާ ނަމަ މި ބައްޔަށް ފައްސިވާ ވޭދަނަތައް މައްޗަށްދާ އަދަދު މަދުވުން ވެސް އެކަށީގެންވާ ކަމަށެވެ.
ސާފް ޗެމްޕިއަންޝިޕް މުބާރާތުގެ މެޗުތައް ބަލަން ދަނޑަށް ވަންނަން އަންނަ ކޮންމެ މީހެއްގެ އަތުގައި ވެކްސިން ކާޑާއި އައިޑީ ކާޑު އޮންނަން ޖެހޭ ކަމަށް އެފްއޭއެމްއިން ވަނީ ބުނެފައެވެ.
އެގޮތަށް ހަމަޖައްސައިފައި ވަނީ ދަނޑަށް ވަންނަ މީހަކީ ރައްކާތެރިކަމުގެ ފިޔަވަޅުތައް ކަށަވަރުކޮށްފައިވާ މީހަކަށް ހެދުމަށް ކަމުގައިވީ ނަމަވެސް މުބާރާތް ފެށުމާއެކު ފެނިގެން ދިޔައީ ރައްކާތެރިކަމުގެ ފިޔަވަޅުތަކަށް ކުޑަވެސް ބެލުމެއް ނެތި ބެލުންތެރިން ހަރަކާތްތެރިވާން ފެށި ތަނެވެ. އެގޮތުން މާސްކު ނޭޅުމާއި އިޖުތިމާއީ ގައިދުރުކަން ބަހައްޓާ މިންވަރު ވެސް ކުޑަކަން ފާހަގަވެއެވެ.
މިކަމާ ގުޅޭގޮތުން "ދެން"އަށް މައުލޫމާތު ދެއްވަމުން އެޗްއީއޯސީގެ އޮފިޝަލު ތަސްލީމާ އުސްމާން ވިދާޅުވީ ސާފް ޗެމްޕިއަންޝިޕްއާ ގުޅިގެން ކޮވިޑް އަލުން ފެތުރުނަ ނުދީ ކޮންޓްރޯލު ކުރުމަށް ގައިޑްލައިންތަކާ އެއްގޮތަށް ޢަމަލު ކުރުން މުހިންމު ކަމަށެވެ.
