ދެ މަގާމުގައި ހުންނެވޭނެ ކަމަށް ވިދާޅުވުމުން ކުރީގެ އުއްތަމަ ފަނޑިޔާރުގެ ފާޑުކިޔުން
އދ. ގެ އާންމު މަޖިލީހުގެ ރައީސްގެ މަގާމާއި ރާއްޖޭގެ ފޮރިން މިނިސްޓަރުކަމުގެ މަގާމުގައި ވެސް ހުންނެވިދާނެ ކަމަށް އަބްދުﷲ ޝާހިދު ވިދާޅުވުމުން ކުރީގެ އުއްތަމަފަނޑިޔާރު ޑރ. އަހުމަދު އަބްްދުﷲ ދީދީ ފާޑުވިދާޅުވެއްޖެއެވެ.
ޝާހިދު ވިދާޅުވީ ފޮރިން މިނިސްޓަރު ކަމުގައި ހުންނަވައިގެން އދ.ގެ އާންމު މަޖިލީހުގެ ރަައީސްގެ މަގާމުގައި ހުންނެވުމަކީ މައްސަލައެއް ނޫން ކަމަށާއި ދުނިޔޭގެ ވަރަށް ގިނަ ގައުމުތަކުގެ ފޮރިން މިނިސްޓަރުން އެ ގޮތަށް އަމަލު ކުރައްވާފައިވާ ކަަމަށެވެ. އަދި މިނިސްޓަރުން ގޮތުގައި ތިއްބަވައިގެން ރާއްޖޭގެ އެހެން ބޭފުޅުން ވެސް އެކި މަގާމުތައް ފުރުއްވައިފައިވާ ކަމަށް ޢަބްދުﷲ ޝާހިދު ވިދާޅުވިއެވެ.
"ދެން ދައްކާނެ އެހެން ވާހަކައެއް ނެތިއްޔާ ކޮންމެވެސް ވާހަކައެއް ދައްކާލަން ޖެހޭނެތާ. އަޅުގަނޑު ދެން އެ ވާހަކަ ދައްކަވާ ބޭފުޅުންނަށް ވެސް ހިތުގައި ބުރަކަމެއް ނެތް. އެއީ ދެން އެ ނޫން ވާހަކައެއް ނެތިއްޔޭ އިނގޭތޯ. ސިޔާސަތެއް ވެސް ނެތީ. ބުނާނެ އެއްޗެއް ވެސް ނެތީ. އެހެންވެ ދެން ކޮންމެ ވެސް ވާހަކައެއް ދައްކަނީ،" ފޮރިން މިނިސްޓަރު ޝާހިދު ވިދާޅުވިއެވެ.
ޝާހިދުގެ އެ ވާހަކަތަކަށް ރައްދު ދެއްވަމުން ކުރީގެ އުއްތަމަ ފަނޑިޔާރު ޑރ. ދީދީ ވިދާޅުވީ ދެ މަގާމުގައި ހުރެގެން ކަންބޮޑުވުން ފާހަގަކުރާ ފަރާތްތަކުން އެކަން ކުރަނީ ސައްހަ ދުސްތޫރީ އަދި ގާނޫނީ އަސާސްތަކެއްގެ މައްޗަށް ބިނާކޮށް ކަމަށާއި ދައްކާނެ ވާހަކައެއް ނެތިގެނެއް ނޫން ކަމަށެވެ. އަދި އދ. ގެ އާންމު މަޖިލީހުގެ ރައީސްކަން ވަރަށް ގިނަ ގައުމުގެތަކުގެ ފޮރިން މިނިސްޓަރުން އެ މަގާމުގައި ދެމިތިބެ ކުރައްވައިފައިވާ ކަމަށް ދޭހަވާ ގޮތަށް ޝާހިދު ވިދާޅުވި ވިދާޅުވުމަކީ ހަގީގަތާ ހިލާފު ވާހަކައެއް ކަމަށް ވެސް ޑރ. ދީދީ ވިދާޅުވިއެވެ.
