އަމީން އަނެއްކާ ވެސް ހައްޔަރުކޮށްފި
އައިއެސް ޖަމާއަތުގެ ފަރާތުން ރާއްޖޭގައި ހަރަކާތްތެރިވާ އެންމެ އިސް މީހާ ކަމަށް ތުހުމަތު ކުރާ ޏ. ފުވައްމުލަކު މާދަނޑު/ ކަރިއްޔާވިލާ މުހައްމަދު އަމީން އަނެއްކާ ވެސް ހައްޔަރު ކޮށްފިއެވެ.
މިކަމާ ގުޅޭގޮތުން ފުލުހުންގެ މީޑިއާ އޮފިޝަލަކު ވިދާޅުވީ، އަމީން ހައްޔަރު ކުރީ އިއްޔެގެ ވަގުތެއްގައި ކަމަށާއި އިތުރު މައުލޫމާތެއް މިވަގުތު ދެވެން ނެތް ކަމަށެވެ.
އަމީން 30 ދުވަހަށް ހައްޔަރު ކުރުމަށް ކްރިމިނަލް ކޯޓުން ހުކުމް ކުރީ މިދިޔަ އާދީއްތަ ދުވަހުގައެވެ.
އޭނާ ބަންދުކުރުމަށް އަމުރެއް ނެރެފައި ވަނީ އޭނާގެ މައްޗަށް ކޮށްފައިވާ ޓެރަރިޒަމްގެ ދައުވާތައް ބާތިލްކޮށް، އޭނާ މިނިވަން ކުރުމަށް ހައިކޯޓުން ކުރި ހުކުމް ސުޕްރީމް ކޯޓުން ބާތިލްކުރުމަށް ފަހުއެވެ. ހައި ކޯޓުގެ އެ އަމުރާ ގުޅިގެން އަނެއްކާ ވެސް އަމީން ބަންދުކުރުމުގެ އަމުރަކަށް ޕްރޮސިކިއުޓާ ޖެނަރަލް (ޕީޖީ)ގެ ފަރާތުން ކްރިމިނަލް ކޯޓުގައި ވެސް ވަނީ އެދިފައެވެ.
ސަލްޓަން ޕާކުގައި 2007ވަނަ އަހަރު ބޮން ގޮއްވި މައްސަލައިގައި އަމީންގެ މައްޗަށް ތުހުމަތު ކުރިއެވެ. ނަމަވެސް އެ މައްސަލައިގައި ހައްޔަރު ކުރަން އުޅުމުން އަމީން ވަނީ ފިލައިގެން ލަންކާއަށް ގޮސްފައެވެ.
އަމީން ހޯދަން އެއިރު ރެޑް ނޯޓިސް ނެރެ، އޭނާ ލަންކާއިން ހައްޔަރު ކުރުމަށް ފަހު 2012ވަނަ އަހަރު ދޫކޮށްލިއެވެ.
